GEEHHOEEMAÁ 9

1Malaykamoó kooán tarumbeéta gari ufaáhh. Aníng tsatsee/ír naa gawaá doorí wa /et ngiri ár, iri hú' gawaá daanduú yaamu. Tsatsee/irí gweermór bohongwdá' aa tsarere'eet gari sleér. 2Tsatsee/irí bohongwdá' nguwa gwét, quui niri baraá bohongwdá' wa ti'ít adór quuír baraá bohóngw asltá ur. Tsee/amá nee doori kiri giwís nee quuír baraá bohongwdá' daahh. 3Ingigi niri ti'ít baraá quuidá' wa ale, iri hardát gawaá yaamí alé. Ingigidá' kari aleesleemuú i haniís oo adór aleesleemuudá' oo xeeraawe i koon, baraaká' yaamuuwo. 4Kiri báy gídaabá, “Gitsór yaamu ma hhitiimara', laqaá umuúqo gár naa/a, laqaá tam umuúqo xa'anoowo, ala a mukdá' layár Mungú ga koomaaká gawaá gitsee/er'ine.” 5Ingigidá' kari hara'ayár i haniís gídaabá mukdá' munguwa tsú/, ala ngu slahhe'eemis har qoomár slahheeraá kooane. Slahhe'eemisuuín kudá' a adór slahhe'eemisuú xeeraangw, hee bunga kiíhh. 6Qoomaadae muu gwa'ara ga leeleehh, ala ka baloó ariiká. Nee inooín ka ilatleeruus tawa qatli, ala gwa'ara gi ilagóp. 7Tlehhemuú ingigirí a adór faraásír taa amohhe'eés slaqwarár wa ale. Gawaá sager'ine gár i kona' a gár adór slamángw miisli. Nee gitsee/er'ín a adór gitsee/ér muu. 8Se'engw'ín a adór se'éngw /ameena. Nee sihhinaaín a adór sihhinaá diraangw. 9Gaambór'ín ar da/eewa a adór gaambór muqsli. Nee afór hhampe'eeri'ín a adór afór gaarduudá' faraási i uuruxuna' bir slaqwarár ayá'. 10Nee inooín hhayser'ín i laqeelaá koón adór tidár xiiraawe. Nee /uureemooín awa muu ngur slahhe'eemisiya' slahheeraá kooane i gawaá hhayser'ín. 11Nee inooín i waawutmoó koná'. Waawutmoowí a malaykamoó bohongwdá' aa tsarere'eet. Umuuwós tsifrír Ebraniaro a Abadoni, nee tsifrír Grikiro a Apolioni, gídaabárós a Hhitirusmo. 12Slahha'amuú geera aa waaraáhh. Ga/aawaak, slahha'amuú tsár aa meét, i lawee'. 13Malaykamoó lahhoó' tarumbeéta gari ufaáhh. Afór wák ngiri axaás. Afoorí amór i dahh a amór xareemaadá' tsiyáhh awa gawaá meésadár ilahhooa, tidár miisli, ar geerá Mungú i dirii'. 14Afoorí malaykamooduú lahhoó', kudá' tarumbeétár koóm, guri beér, “Malaykeedá' tsiyáhh gweereek, tidá' taa tseék dír yaaeedá' ur ta babay Frati.” 15Malaykeerí kana amohhe'eés as qoomaadá' nee baaladá' nee slahhangwdá' nee kurkudá'. Malaykeerí tsiyáhh kari gweér as gídaabá daqtá wák ar muu ngiwa tsu/ baraá daqoorayduú tám oo múk baraaká' yaamu. 16Askaáridá' aa tsa/aan gawaá faras i alé, faaror'ín a kume mibeeri tsár sagaáwa kume mibaangw. Aníng faaror'ín ana axaás. 17Baraá iigu'utueene faras nee mukdá' aa gawaadá' i tsa/an una ár. Mukdá' gawaá farás i dirií' gaambuín awa da/eewe ki da/aten adór asltá wa ale, slám ki qurbo/, nee slám ki qurtsee/atayen. Sagér farásuudá' a adór sagér direeri, nee baraá afer'ine gár ti'imiit a asla nee quui nee asltá xaraasl ar kiberiti. 18Daqtá wák kana tsuú/ ar muxtaarí tám baraá daqooraydá' tame oo múk baraaká' yaamu. Kuna tsuú/ ar asla nee ar quui nee ar asltá xaraasl ar kiberiti. Muruuwí nina ti'imiít baraá afér farsuú wa ale. 19Asma /uuruú farsuuwí i baraá afer'ín nee baraá hhayser'ín. Hhayser'ín a adór dayshe, i sagér koón. Nee inooín i slahhe'eemisiyá' ar hhayser'ín. 20Nee múk aa meet, oo taa tsu/iiká ar muxtaarí, gadiyeédár dabaaín kaa hhu'u'unká, neetlaame kaa mayká xirfayeemisuwo. Nee slám munguaá murslaaqat kaa mayká haratlintaaooro, kudá' taa tleéhh ar miisli nee ar lapiyá nee ar muqsla nee ar tlaa/e nee xaai. Mungi'iiká' i xumisiiaaká nee i axamisiiaaká, slám i hii'imitiiaaká. 21Mukwí tsu/utar'ín sleeme gaa hhu'u'uniká, nee da/ari'ín kudá', nee tsaatu'uumar'ín nee fiisor'ín sleeme.

will be added

X\