GEEHHOEEMAÁ 8

1Deelmoó bee/i kufúlidár faanqw ngiwa gweér, tari xasliít gawaá dooriiwo har qoomár niinawe. 2Aníng malaykeedá' faanqw, tidá' sihhimiit geerá Mungú wa ale ngiri ár. Malaykeedá' kari tarumbeétár faánqw i haniís. 3Malaykamoó hatlá' niri hardáh iri sihiít dír geerá meésár ilahhooa. Inós xooslmoó miisli gu kón oo muruudá' xarángw tsuú' koóm ku i da/a/an ilahhooár wa ale. Muruudá' xarángw tsuú' koóm oo yaariír kuri inós i haniís, as nguwa haragaasi dinkwa nee firór múk hhohhó' oo Mungú gawaá meésár ilahhooa, tidár miisli. Meésaarí dír i diri' a dír geerá kitángw aleesleemu. 4Nee quuír muruudá' xaraangw tsuú' iri tsa/aán dír geerá Mungú dinkwa nee firór múk hhohhó' oo Mungú. Quuirí dír i dahh a dír dákw malaykamo. 5Nee malaykamo xooslmoodá' ilahhooa ka i da/a/an guri taataáhh, guri dalaá/ aslto, tidá' gawaá meésár ilahhooár i dirii'. Xooslmoodá' guri kwaáhh gawaá yaamuú i alé. Qoomaadár kilae kududuhaay niri hardáh, nee afoo nee mankari nee kunseeli. 6Nee malaykeedá' faanqw, tidá' tarumbeétár faanqw ga koom, inooín tiri amohhe'eesiyé' as tarumbeéta kawa ufaahhi. 7Malaykamoó geera tarumbeéta gari ufaáhh. Tluwoó tlaa/e iri tluúw, nee asltá taa aleedoók nee tseere, muruuwí kuri kwaáhh baraá yaamuú i alé. Bartaka wák baraá baduudá' tame awa yaamu asla gari /ák. Bartá wák ar xaai sleeme asla gari /ák, baraá baduudá' tame awa xaai. Nee gitsór naa/ sleémeero asla gari /ák sleeme. 8Malaykamoó tsár tarumbeéta gari ufaáhh. Gár adór tloomár ur ar asltá wa oh kari kwaáhh baraá tlawi. Bartá wák baraá baduudá' tám awa tlawi iri tseere tleehhít. 9Muruudá' slaáf oo baraá tlawi daqtá wák iri qátl baraá daqooroó tame. Nee miringeedá'h baraá tlawtá wa hi'iimiit daqtá wák kari hhitín baraá daqooroó tame. 10Malaykamoó tám tarumbeéta gari ufaáhh. Tsatsee/ír ur niri hú' gawaá doorí wa ale. Tsatsee/idá' i ót adór tsaa'astá wa ale. Tsatsee/idá' iri hú' gawaá yaudá' baraaká' yaamu. Ala a yau sleémeerowooká. A yaaér wák baraá umuúqo yaudá' tame. Nee slám iri hú' gawaá kutloó ma'aay. 11Umuú tsatsee/idá' ku babay “Qarqaraay.” Nee bartá wák baraá baduudá' tame awa ma'aay iri qarqarút. Múk yaariír iri qaátl as ma'aydá' asma adoodá' ma'aydá' kiwa qarqareés. 12Malaykamoó tsiyáhh tarumbeéta gari ufaáhh. Bartá wák baraá baduudá' tám awa tsee/amahe kari óh, iri gíp, nee awa slahhaangw nee awa tsatse/ sleeme. Gwa/atamaayér tlaatla/aangw bartá wák iri /aaruúr baraá baduudá' tame. Nee gwa/atamaayér xweera sleeme iri adoodár /aaruúr. 13Aníng gwareesi ngiri ár ar tlatlaw ar baraá tla/ángw doorír alé, ngiri axaás i tseeamiín ar afór ur, i kat, “Múk baraá yaamuú wa hoót, a tsaxwa sakwasleemar'ín ngiwa wa /akuuti, qoomár malaykeedá' tám ar aa met tarumbeétar'ín binga ufáhh. Asma malaykeedá' taa amohhe'és kawa ufaahhi.”

will be added

X\