GEEHHOEEMAÁ 5

1Aluuwo kitaábu una ár. I baraá dákw doó /iyáy oo kudá' aa iwiit gawaá kitangwduú aleesleemu. Kitaábuudá' i gooír kón baraá guruuwo nee gawaá daanduuwo sleeme. Nee slám kitaábuuwí kwaa tseék ar kufúlaay faanqw. 2Malaykamoó aleesleemuú koóm nguri ár. Inós ina axweés ar afór ur, iri oó', “Heé hariím a heemá kitaábuuwí nguwa gweeri nee kufúlaywose?” 3Ala hee i kaahh gawaá dooriiwo, laqaá tam baraá yaamuuwo, laqaá baraá guruú yaamuuwo oo kitaábuudá' gwa aleeslay gweeraro, laqaá tam nguwa i qaytsiiti. 4Aníng niri /aa/amiím ar gurhaami as adoodá' heé taa ár iwa kahhi, oo hariím kitaábuudá' gweeraro laqaá nguwa i qaytsiiti. 5Nee heé wák baraá bariiseedae aníng ina báy, “Ma /aa/amiimaar. Qaytsiít, Dirángw tlahhoó Yuda i deer, oo hhay Daudi. Inós arba/ati gaa sláy. Gawaá adoorihe inós i harín kitaábu nguwa gweeri nee tam kufúlaywós kudá' faanqw sleeme.” 6Hamtidae Deelmoó bee/i una ár aa sihiít dír tla/ángw kitangwduú aleesleemuú i alé, nee tla/ángw muruudá' slaáf oo tsiyáhh, nee tla/ángw bariiseedá' mibeeri tsár nee tsiyáhh. Deelmooduú bee/i bura ga/eér, inós a adór deelmoó taa gaás. Inós xareemaá faanqw gi kón, nee ilaá faanqw. Ilaadá' faanqw a Qeeruú faanqw oo Mungú, kudá' taa ya/aáw baraá yaamu sleémeero. 7Deelmooduú bee/i niri hardáh, kitaábu guri taataáhh gawaá dákw doó /iyáy wa ale oo kudá' aa iwiit gawaá kitangwduú aleesleemu. 8Qoomár kitaábuudá' nguwa taataáhh, muruudá' tsiyáhh oo slaáf nee bariiseedá' mibeeri tsár nee tsiyáhh tari tumbarara'aát dír geerá Deelmoó bee/i. Umuúqo heewo baraine i marímbár úr kón, nee slooqa'aá miisli awa muruú xarángw tsuú' koomá' oo ta da/a/an ilahhooár wa ale. Muruuwí xarángw tsuú' koóm an firór múk hhohhó' oo Mungú. 9Inooín daa'ángw /abén ngun daaiyá', gídaabá, “Kuúng a hariín kitaábu kuwa taatahh nee kufúlaywós kuwa gwet, asma kuúng tuna gaás, nee muu una tláxw dír Mungú i alé ar tseereerók, múk umuúqo tlahhaywo nee umuúqo tsifriro, nee umuúqo mar'eefo nee umuúqo xoorooro. 10Kuúng inooín kiri waawuti'iimár i sleér, nee kiri geeraharuusér saaliingw tléhh as Mungúrén kuwa sagadiyuusi. Nee inooín yaamu ngiwa sa waawuti'ii'ina'.” 11Aníng niri qaytsiít, afór malaykér yaariir ana axaás. Malaykeedá' kitangwduú aleesleemu gwa harwét, nee muruuduú tsiyáhh oo slaáf, nee bariiseedá'. Nee faaror'ín a kumér kúm. 12Inooín tari daá' ar afór ur ta kaahi, “Deelmoó bee/i, kudá' taa gaás, inós i harín aleesleemu nguwa slay, nee daqaari'iima, nee sagaalooa, nee /uuru, nee xirif, nee ilaiwa/ame nee tsuuqa.” 13Aluuwo aníng afór mura' sleémeero kudá' taa tleéhh ana axaás, kuduú gawaá doori nee kuduú baraá yaamu, nee tam kuduú baraá guruú yaamu, nee kuduú baraá tlawi sleeme. Muruuwí sleémeero aníng una axamiís tawa daai, ta kaahi, “Kudá' aa iwiit gawaá kitangwduú aleesleemu, nee Deelmoó bee/i, inooín tsuuqa a kooín, nee xirif, nee ilaiwa/ame nee aleesleemu ay alhhe'eesay wasle.” 14Nee muruudá' tsiyáhh oo slaáf iri oó', “Amin.” Nee bariisee iri tumbarara'át, iri sluufimís.

will be added

X\