GEEHHOEEMAÁ 3

1“Gooiimeek amór malaykamooduú múk Kríshaanáy oo baraá Sardír i dirií', “ ‘Axweesantí dír i dahh a dír kudá' qeereemadá' faanqw oo Mungú gu koóm, nee tsatse/uudá' faanqw. Aníng iidíguú tlehhemi'iiwók u xuú'. Kuúng tuwa xui a sláf, ala laatí kuúng aga gwá'. 2Gawaá adoorihe, daarkiít. Slafingwdá' niiná oo aa meet baraawoge /uuruú i qaaseek dír ira faakiiká. Asma aníng tlehhemi'iiwók iga ár i ganaaiiaaká dír geerá Mungúeene. 3Gawaá adoorihe axweesantadá' adór kara ilaót nee adór kara axamís inslaweek, nee ka ót, ta hhu'u'uún. Ala kuúng bar aga dal'iká, aníng ni hardáh amoorók i aleeró adór fisusmo, ala qoomaadá' aníng ni hardah kuúng a xu'uká. 4Ala kuúng múk niiná u koón baraá Sardiro, oo tlabaaín gaa slasla/areemisiiká. Inooín ta al hi'iimiit nee aníng, tlabaaín awa /awak kaa dahaás, asma inooín i hariná'. 5Heedaádá' arba/ati gaa slay, inós ku tlabaá awák i dahaas, nee umuuwós u baloó fiitsaaká baraá kitaábuuduú slafiingo. Nee slám aníng umuuwós un ya/aám dír geerá Baabuúeene nee dír geerá malaykeerós gídaabá inós an kwe'eé'.’ ” 6“Heé iaá koóm, axweesantí ngi axaasi, tí Qeeru i kaahi dír múk Kríshaanáy.” 7“Gooiimeek amór malaykamooduú múk Kríshaanáy oo baraá Filadelfiár i dirií', “ ‘Axweesantí dír i dahh a dír kudá' Hhoohhoó', kudá' looeemaá axweés, kudá' gweermór Daudi ga koóm. Inós afkuú do' bar ngwa gweér, heé tseegaro gu aleesláw i kaahh. Nee inós bar ngwa tseék, heé gweermooro gu aleesláw i kaahh. 8Aníng iidíguú tlehhemi'iiwók u xuú'. Qaytsiít, aníng afkuú do' oo taa gweér ngwa qaás dír geeraawók i alé, ala heé tseegamooro gu aleesláw i kaahh. Aníng a xuú' gídaabá /uuruú niiná u koón, nee slám kuúng axweesante'eé' aga ót, nee aníng iga si'iká. 9Ga/aaweek, mukko i deer oo Neetlángw eeharahaár. Inooín ta kaahi atén a múk Yahudi, ala laatí a loeká, ala inooín a lamuuse. Aníng mukwí ngu /uurutís as iwa amoorók i hardahi, nee iwa tumbarara'aati dír geeraawók i alé, as inooín ngiwa tsaahhiya' gídaabá aníng kuúng u slaá'. 10Kuúng axweesante'eé' tidá' daanduú qiqtliingw aga ót. Gawaá adoorihe aníng kuúng u xuúm qoomaadár iiara'aduuwo, tidá' hardah baraá yaamu sleémeerowo, as muu sleémeero oo baraaká' yaamu kuwa iiari. 11Aníng ni hardáh ar gaanslaay. Tidá' ta koon ooha hhe'eeseek, as hee slamaangók munguwa hayóh. 12Heedaádá' arba/ati gaa slay, aníng inós un uhumoó Doó Mungúeé' tleéhh, nee baraadaádae iri ti'iitiiká baloó ale. Nee gawaawose aníng umuú Mungúeé' un gooiím, nee umuú gixsár Mungúeé', Yerusalemudá' /aben, tidá' awdiit gawaá dooriiwo amór Mungúeé' wa ale. Nee slám aníng umuueé' kudá' /abén u gooiím.’ ” 13“Heé iaá koóm axweesantí ngi axaasi, tidá' Qeeru i kaahi dír múk Kríshaanáy.” 14“Gooiimeek amór malaykamooduú múk Kríshaanáy oo baraá Laodikiár i dirií', “ ‘Axweesantí dír i dahh a dír kudá' ta babay Amin. Inós an lamabu'usmooduú inkihhimuúe koóm nee oo looeemaá axweés. Inós an iimu/úngw muruudá' sleémeero Mungú aa tleéhh. 15Aníng iidíguú tlehhemi'iiwók u xuú', adór kuúng tur tsatsa'aareeká nee slám adór tar da/a/aandaaká. Geeraawo alók a tsiní kuúng barnaxes tun tsatsa'areema hhe'eés, laqaá barnaxes an da/a/aán. 16Ala daxta kuúng hám a tawó matláxw. Kuúng tu tsatsa'aareeká, nee slám a da/a/aandaaká. Gawaá adoorihe aníng kuúng u waá/ gawaá afkwe'eene. 17Kuúng a kat, “Aníng a daqaarmo. Án tina kilooeé' daqaaritiís, slám gár iwa /aaruur i káhh.” Ala laatí kuúng a xu'uká gídaabá kuúng a liitlakusmo, kuúng a heé gurtleemuú slaá', nee a narkutmo, nee heé taampa, nee slám a /aankwets. 18Gawaá adoorihe gár kuúng uwa hariím a adoorí an tléhh, Miislidá' taa hamaátl ar baraá asla dir'eé' tiwa tlaxw, as kuúng tawa daqaarmo tleehhit, nee tlabaadá' /awak kiwa tlaxw, nee kiwa dahas, as /aankwetsuuwók kudá' murér koóm mukuwa ara'ár. Nee slám maasáy na tlaxweek, ilaawók kiri slík, as kuúng tawa xumis. 19Mukdá' sleémeero aníng ni slaa' un iigahhamiít nee un muúx. Gawaá adoorihe kuúng ilakaaharu tleehheek, hhu'u'uúm. 20Ga/aaweek, aníng a sihhimiít afkuú dó' wa ale, a ateetiím. Hee barnaxes afor'eé' gaa axaás, nee afkuú do' guri gweér, aníng a dáh amoorós, aníng niri al/ayiím nee inós, nee inós iri al/ayín dinkwa nee aníng. 21Heedaádá' arba/ati gaa slay, aníng inós u iwiitiís dinkwa nee aníng baraá kitangw'eé' kuduú aleesleemu, adoodá' aníng arba/ati ngira sláw, niri iwiít dinkwa nee Baabuúeé' baraá kitaangós kuduú aleesleemu.’ ” 22“Heé iaá koóm, axweesantí ngi axaasi, tidá' Qeeru i kaahi dír múk Kríshaanáy.”

will be added

X\