GEEHHOEEMAÁ 22

1Aluuwo malaykamoodá' yaaér ma'aá slafíngw koom ngiri laqán. Yaaeedá' ma'aywós i gwa/aatiyá' adór looa. Yaaeerí dír i dahh a baraá kitangwduú aleesleemu oo Mungú nee oo Deelmoó bee/i, 2nee iri waaráhh ar baraá tla/ángw loohír gixsa. Nee dír afaá yaaeero, bihhaá bartaqá' nee bihhaá bartihe xa'anoó slafiingw i deer. Xa'anoowí i laqwalín sagaáwa mibá nee tsár gawaá kurkú wake. Na/'iiwós giri hamaareemiis umuúqo slahhaango. Nee loo/ór xa'anoowí múk xoordu gun hungu/uumís. 3Gár taa lu'ús nee Mungú ka baloó ariiká baraá gixsarihe. Ala kitangwduú aleesleemu oo Mungú nee oo Deelmoó bee/i i baraá gixsadá' i dirii'. Nee sagadiyuuseerós inós gu sagadiyús. 4Inooín gitsee/awós ngi ga/ayá', nee umuuwós kwaa gawaá gitsee/er'ín i gooín. 5Xweera baraadae i kahhiyá'. Gwa/ateemaá tsaa'asi inooín gár kis yaahamiisi i káhh, tam gwa/ateemaá tsee/amá sleeme. Asma Aakoó Mungú inós an gwa/ateemaaín, nee inooín tari waawuti'ii'ín ay alhhe'eesay wasle. 6Aluudae malaykamoodá' iri báy, “/Aymi'iiká' a awa ló' nee awa hariimá' haratlintaaoro. Aakoó Mungú, Mungúduú qeeruú aaruuse, inós malaykamoowós ngwaa ya/aáw as muruudá' hardáh ar gaanslaay nguwa dír sagadiyuuseerós i laqan.” 7“Ga/aaweek, aníng ni hardáh ar gaanslaay. Múk amohhoó' a kudá' axweesanoó aaru'uuma gwa oh, kudá' baraá kitaábuuwí i dirií'.” 8Ánuú Yohana muruuwí una axaás nee nguri ár. Nee muruuwí nguwa hhe'eés axaasaro nee arto, aníng niri tumbarara'aát dír ya'aá malaykamoodá' muruuwí ngwa laqan, as inós nguwa sluufimiis. 9Ala inós aníng iri báy, “Adoosíng ma tlehhiitaar. Asma aníng sleeme a sagadiyusmo dinkwa nee kuúng nee hhaeewók kudá' aaruuseero, dinkwa nee kudá' sleémeero awa axweesanoó kitaábuuwí ngwa oohiye'. Ala kuúng Mungú na sluufimiseek.” 10Inós aníng iri báy, “Axweesanoó aaru'uuma oo kitaábuuwí mu tseegaar ar kufúli, asma qooma aa naká/. 11Heé malguumiís i kumiiti baraá malgu'uumarose. Heé slasla/aár i kumiiti baraá slasla/aruwose. Heé gan'amuú tlehhahhiít i kumiiti gan'amu nguwa tlehhiiti, nee heé hhoohhoó' i kumiiti kuwa hhoohhoeemisi.” 12“Ga/aaweek, aníng ni hardáh ar gaanslaay, nee slaqwer'eé' i dinkwa nee aníng, as umuúqo heewo nguwa buu' ar adoodá' tlehhemuuwós. 13Aníng an Alfa nee Omega, kuduú geera nee kuduú alhhe'eesaay. Nee slám aníng an iimu/uungw nee alhhe'eesaay.” 14Múk amohhoó' an kudá' inqwaruuín gu hhuuntsiít. Asma inooín ki ya/aámár i haniis ar mamaá xa'anooduú slafiingw kiwa /ayi, nee tawa baraá gixsadá' i dahi ar afeerós. 15Amór tsee/aá gixsaro seeaawe i deer, nee múk da/aluuse, nee múk fuquuse, nee tam mukdá' múk tsuú/ nee mukdá' munguaá hatlá' haratlintaatií', nee mukdá' sleémeero oo axweesantá lama ga slaá' nee oo ga axweemamiís. 16“Ánuú Yesu malaykamooeé' nguna ya/aáw as muruuwí nguwa lamabu'un dirhúng i alé, kuungá' múk Kríshaanáy oo baraá gixsadaá dimbadimbé. Aníng a heedá' baraá tlahhoó Daudí daáhh. Aníng a xwaylár Daudi. Aníng a tsatsee/idá' gwa/aat ar matlatle ar ta babay Haymú.” 17Nee Qeeru nee dasiidá' ta duxuuti ta kaahi, “Qwaláng.” Nee heé adoodá' gaa axaas i ooi, “Qwaláng.” Nee heé waxiít ni hardahi, nee umuúqo heé ma'aá slafiingw gi slaá' ngi taataahhi awa bu'utu wasl. 18Umuúqo heewo oo axweesanoó aaru'uuma gu axamiís, kudá' baraá kitaábuuwí i dirií', aníng inós u gurbuú' gídaabá. Hee barnaxes garka gaa doók gawaá axweesanaywí i alé, daqaní Mungú muxtaadá' taa gooín baraá kitaábuuwí i aleeró ga huuw daanduú heewí i alé. 19Nee hee barnaxes garka gaa /aareés dír axweesanoó kitaábuuwí oo aaru'uumaro, daqaní Mungú hariímár heedá' ga hingees baraá xa'anoó slafiingo nee baraá gixsadá' hhoohhooe. Hariímarós ar ta hingeesi an tidá' iidíguuwós taa gooín baraá kitaábuwí i alé. 20Kudá' muruuwí gu lamabu'uúm inós i kaahi, “Eeít, aníng ni hardáh ar gaanslaay.” Amin. Qwaláng, Aako Yesu. 21Aako Yesu kuungá' sleémeero nu tsuuqi. Amin.

will be added

X\