GEEHHOEEMAÁ 2

1“Gooiimeek amór malaykamooduú múk Kríshaanáy oo baraá Efesór i dirií', “ ‘Axweesantí dír i dahh an dír kudá' tsatse/uú faanqw gwa oh ar dakós oo doó /iyáy, kudá' hi'iimiít baraá tla/ángw kiteeridá' faanqw awa miisli awa tsa'asoó koomá'. 2Aníng iidíguú tlehhemi'iiwók u xuú', nee daawitimeerók nee qiqtliingók. Nee slám a xuú' gídaabá múk tlákw sa qiqtliingo u aleesleeraaká. Slám mukdá' ugwa iiát, kudá' káh gídaabá, inooín a ya/abuuse, ala laatí a ya/abuuseerooká, kiri tsáhh gídaabá a lamuuse. 3Slám kuúng ana qiqtliín nee slahha'amaayér yaariir ana slaasleér as aníng, slám aga slaaqatiká.’ 4Ala aníng axweesantaka a koóm daanduuwoge gídaabá, ‘Kuúng sla'aarirók tidár geera aga meér.’ 5Gawaá adoorihe, inslaweek didá' kuúng tawa hú', hhu'u'uúm, nee tlehhemi'iiwók kudá' geera ta tlehhahhit ki tléhh. Ala adoorí barnaxes aga tlehhiká, aníng niqo hardáh amoorók, nee aníng daqaní kitaangók kudá' tsa'astá koóm u hingeés dirós tidá' i dirii'i, bar kuúng aga hhu'u'uundiiká. 6Ala kuúng gár hhoo' diroge a tí gídaabá, kuúng tlehhema'aá múk Nikolai iga áhh. Aníng sleeme tlehhemi'ii'ín iga aáhh.” 7“Heé iaá koóm, axweesantí ngi axaasi, tí Qeeru i kaahi dír múk Kríshaanáy, “ ‘Heedaádá' arba/ati ga sláw, aníng u ya/aámár i haniís ar mamaác xa'anooduú slafiingw ngiwa /ayi, kudá' baraá asalmoó Mungú i dirií'.’ ” 8“Gooiimeek amór malaykamooduú múk Kríshaanáy oo baraá Smirnár i dirií', “ ‘Axweesantí dír i dahh a dír kuduú geera nee oo alhhe'eesaay. Inós geeraawo ina gwaá' ala iri slaáf. 9Aníng slahha'amaayeerók a xuú', nee liitlakweerók. Ala kuúng a daqaarmo. Nee slám a xuú' /ooslislíngw mukdá' káh, atén a múk Yahudi, ala laatí a inooineeká, ala inooín laatí a múk Neetlángw eeharahaár. 10Slahha'amaayeedá' kuúng ta sleer ma da'ayuutaar. Ga/aaweek, Neetlaangw kuungá' bahh'alé nu tsegiit baraá doó tseegamo, as tunduwa iiari. Nee kuungá' slahha'amu u sleerá' deelo mibaangw. Kuúng masók a inkihhimuúd koón tam ay gwa'ara, daqaní aníng slamángw slafiingw ngu haniís.’ ” 11“Heedaádá' iaá koóm axweesantí ngi axaasi, tí Qeeru i kaahi dír múk Kríshaanáy, “ ‘Heé arba/ati ga sláw, inós ku slahhe'eesiiká nee gwa'araadár tsár.’ ” 12“Gooiimeek amór malaykamooduú múk Kríshaanáy oo baraá Pergámó i dirií', “ ‘Axweesantí dír i dahh a dír kudá' paángadá' afa xaraasl badu tsaraawo ga koóm. 13Kuúng dír ta hot aníng a xuú'. Kuúng dír ta hot a didár kitángw aleesleemu oo Neetlaangw. Ala án kuúng iga sa tlankká, slám ana kumamít aníng iwa haratlinti' tam qoomár de'emaá Antipa tawa lamabu'usmooeé', slám a lamabu'usmooeé' oo inkihhimuú koóm. Inós kuna gaás baraá tla/angwhúng i alé, didár Neetlangw i hooti. 14Ala aníng axweesanoó niiná u koóm daanduuwoge. Kuúng mukko u koón diroge, oo intsaahhatimisuú Balaamu gu eeharahaár. Inós an kudá' Balaki gwa intsaahhatimis adór múk Israeli ngur al/ayi, as masók inooín fu'unaydá' kiwa /ayi, kudá' taa ilahhooár wa hanimiís dír munguaá murslaaqat, nee slám tawa fuqusi. 15Nee slám malé alé kuúng mukko u koón oo intsaahhatimisuú múk Nikolai gu eeharahaár. 16Gawaá adoorihe, hhu'u'uúm. Nee bar hhu'u'uundaaká, aníng ni hardáh amoorók, nee aníng niri slaáqw nee inooín ar paangár gawaá afkueé' daahh.’ ” 17“Heé iaá koóm, axweesantí ngi axaasi, tí Qeeru i kaahi dír múk Kríshaanáy, “ ‘Heedaádá' arba/ati ga sláw, aníng maánadá' taa luú/, tidá' gawaá dooraá daahh, a haniís. Nee tlaa/anoó /awaák nguri haniís. Nee gawaá daanduú tlaa/anoodae umuú /abén kwaa gooín, oo ta baloó tsaahhiiká nee hee, aqo har heedaádá' gu sláw.’ ” 18“Gooiimeek amór malaykamooduú múk Kríshaanáy oo baraá Tiatírár i dirií', “ ‘Axweesantí dír i dahh a dír Garmoó Mungú, kudá' ilaawós gwa/aatá' adór tsángw asla, nee ya'aawós a adór muqslír tlaxo ur, tidá' ló'wa gwa/aat. 19Aníng tlehhemi'iiwók i xuú', nee sla'aarirók, nee haratlintaaoorók, nee gadiyeérók nee qiqtliingók. Nee slám a xuú' gídaabá tlehhemi'iiwók kudá' alhhe'eesaay ki ak yaariir ta kudá' geeraawo. 20Ala aníng axweesantaka a koóm daanduuwoge gídaabá. /Ameenidá' ta babay Yesebeli a aleeya/a/aán. Inós ti babeer a aaruso'o, nee sagadiyuuser'eé' gari intsaahhatimís nee gari qwaarés as tawa fuqusi, nee fu'unaydá' kiwa /ayi awa taa ilahhooár wa haniís dír munguaá murslaaqat. 21Aníng pa/aangw una haniís dirós i alé as iwa hhu'u'uun. Ala fuqtós tidá' ga sla'aká nguwa hhu'u'uun. 22Qaytsiít, aníng inós a qaatiís ar tiqti, nee mukdá' nee inós alfuquusá' u slahha'amkwaá yaariír i haniís, inooín barnaxes ta hhu'u'unká nee tlehhema'aá /ameenidá' birkaa mayká. 23Nee aníng na/'iiwós i faák tsu/utaaro. Nee múk Kríshaanáy sleémeero gari xuu' gídaabá aníng an kudá' munér muu ga tsee/ariím nee inslawaywo. Nee aníng umuúqo heewo baraahunge un buú' ar adoodá' inós wa hariím as tlehhemi'iiwós kudá' aa tlehhiít.’ ” 24“ ‘Ala kuungaásingá' aga mete' dír Tiatira, kuungá' intsaahhatimisuuwí tlákw ugwa eehadi'iiká. Kuungá' muruudá' ugwa xui'iiká, kudá' inooín tawa kaahi a lu/aaroó muruú Neetlaangw. Án kuungá' nu baw gídaabá án huuwár hatlá' ngi qaasaaká daandeemoohúng i aleeró. 25Ala a tisíng ta koonda' na ooha hhe'eesaak ay dír án ni hardah. 26Heedaádá' arba/ati gaa slay, nee adoodá' aníng ni slaa' gari tlehhahhiit ay alhhe'eesaay, aníng heewí u waawutmoó wa qaás daanduú múk xoorduwo. 27Nee inós múk xoordu guri sawaawuti'ii'ín ar hhartá muqsli, nee guri parhhamiis adór qaambeesamá wa ale. Asma tam aníng waawuti'iimarí ana sláw dír Baabuúeé' wa ale. 28Nee slám aníng tsatsee/idár matlatle a dirós i haniís.’ ” 29“Heé iaá koóm, axweesantí ngi axaasi, tí Qeeru i kaahi dír múk Kríshaanáy.”

will be added

X\