GEEHHOEEMAÁ 19

1Alaá muruuwihe afór ur ngiri axaás ar adór afór boo/oó yaariír oo gawaá doori. Afoorí iri ó', “Haleluya. Ba/ama a ar Mungúrén, nee xirif nee /uuru. 2Asma sakwasleemarós a ar ló' nee i ganá'. Inós tsaatuso'oodá' ur, tidá' yaamu gaa hhitiin ar tsaatu'uumarós, gaa sakwasleemuút. Mungú inós gana sakwasleemuút asma inós sagadiyuusér Mungú gana tsú/.” 3Tari malé oó', “Haleluya. Quuirós i gawtí tlatleér ay alhhe'eesay wasle.” 4Bariiseedá' mibeeri tsár nee tsiyáhh, nee muruudá' slaáf oo tsiyáhh tari tumbarara'amiít dír geerá Mungú i alé, kudá' aa iwiit gawaá kitángw aleesleemu. Mungú kuri sluufimiís, tari ooín, “Amin. Haleluya.” 5Afór baraá kitángw aleesleemuú daahh iri ó', “Mungúrén na diidi'iimisaak, kuungaásingá' sleémeero awa sagadiyuuseerós, kuungaásingá' Mungú ilaiwawa/á/, múk ninákw nee múk urene.” 6Afoo ngiri axaás ar adór afór boo/oó yaariír, nee adór afór ma'aá yaariír awa wa/amiimá' baraá wa/ángw i alé, nee slám adór afór xuuraaír /uuruú koom. Afoorí iri ó', “Haleluya. Asma Aakoó Mungúrén, Aleesleemusmoó mura' sleémeero, inós waawuti'iima gaa sláy. 7Gimsé', qwalaa/aré', baraa/aré', Mungú u xirfuú i haniisaán. Asma qoomár duuxór Deelmoó bee/i aa xeér, nee dasidár duuxo taa qaró amohhe'és. 8Nee slám Mungú dasidá' gaa ya/aámár i haniís kawa tsiitisi ar inqwaruú /awák oo hhohhó', kudá' ló'wa gwa/aát.” Inqwaruudá' /awák oo hhohhó' a tlehhemi'iidá' ganaa'á' awa múk hhohhó' oo Mungú. 9Inós aníng iri báy, “/Aymi'iiká' gooiimeek, gídaabá, ‘Múk amohhó' a kudá' taa dahi'ís baraá duuxór Deelmoó bee/i.’ ” Iri malé báy, “Axweesanaywí a axweesanoó ló' oo Mungú.” 10Aníng niri tumbarara'aát dír ya'aawós i alé as inós nguwa sluufimiis. Ala inós aníng iri báy, “Adoosíng ma tlehhiitaar. Asma aníng sleeme a sagadiyusmo dinkwa nee kuúng nee hhaeewoge, kudá' sleémeero awa lamabu'úngw Yesu ngu koomá'. Ala kuúng Mungú na sluufimiiseek.” Asma lamabu'úngw Yesu an qeeruú aaru'uuma. 11Aluuwo doori ngiri ár naa gweeriitiyé'. Nee faraasír /awaak ngiri baraadá' wa ár. Nee heé faraasidá' gaa i tsa/an ku babay Inkihhimusmok nee Loousmo. Inós sakwasleema ga tleehh nee slaqwara ar gan'amu. 12Ilaawós a adór tsángw asla, nee gár gawaá sagós a slam'aá yaariir. Inós kwaa umuú i gooín oo hee i xuiiká, aqo har inós kilós. 13Inós kwaa tsiitiís ar inqwaarír taa tumquús ar baraá tseere, nee umuuwós ku babay Axweesantá Mungú. 14Nee boo/oó gawaá doorí dirií' guri eehaár, taa tsa/án gawaá farsuú /awák. Inooín inqwaruú kaa i tsiitimiís a inqwaruudá' /awák oo ló'wa hhohhó'. 15Nee paángár xaraasl i baraá afkós wa ti'iimít, as inós múk xoordu nguwa darahhi ar paángadá'. Inós inooín gi sawaawuti'ín ar hhartá muqsli. Nee inós bohongwduú na/'aá sabiíbu kiwa tsoo/iti gu adarah, bohongwduú wahángw buhhtaá Mungú Aleesleemusmoó mura' sleémeero gu koóm. 16Nee inós kwaa umuú i gooín baraá inqwaarirose nee gawaá kutl/umoowose gídaabá, “Waawutmoó waawitá nee Aakoó bariisee.” 17Aluuwo malaykamoó wák nguri ár aa sihhiít gawaá looa. Inós iri tseé' ar afór ur iri oó' dír tsir/o sleémeero ar gawtí tlatlaw, “Qwalaasé', burumburiitaré' dír muruú /aymaadá' ur oo Mungú. 18Qwalaasé', fu'unaá waawitá /ayaak, nee fu'unaá geeraharuusér askaári, nee fu'unaá askaári, nee tam fu'unaá faras, nee awa mukdá' farsuú i tsa/a/ám, nee fu'unaá muu sleémeero, awa múk lawaale nee múk lawaaleerooká, awa múk ninákw nee múk urene.” 19Aluuwo makito'oodá' ana ár, nee waawituú baraá yaamu nee askaárir'ín. Inooín tana burumburiít as tawa slaqwi nee kudá' gawaá daanduú faraásír i dirií' nee askaárirose. 20Makito'oodá' kari óh dinkwa nee aarusmooduú lama. Aarusmoowí a kudá' tlehhema'aá waa/oo/amór koomá' gaa tlehhiit geerá makito'oodá' wa ale. Nee slám inós muu guna al/agín ar tlehhemi'iiwós kudá'. Múk taa al/aáy a kudá' layár makito'o gaa ilaoh nee oo murslaaqatuú makito'oodá' gwa i tumbarara'aat. Kuká' tsaraawo kiri kwaáhh slaf i alé baraá tlawtadá' asla iwa ohahiin ar kiberiti. 21Nee mukdá' aa meet kuri tsuú/ ar paángár kudá' aa iwiit gawaá daanduú faraási. Paángarí dír i dahh a gawaá afkós. Nee tsir/o sleémeero iri áx fu'unay'ine.

will be added

X\