GEEHHOEEMAÁ 18

1Alaá muruuwihe malaykamoó hatlá' nguri ár. Malaykamoowí i awdiit gawaá doorí wa ale. Inós aleesleemuú úr gu kón. Yaamu kiri gwa/atís xirfuuwose. 2Malaykamoowí iri tseé' ar afór ur iri oó', “Babelidá' ur aa hú'. Inós aa hotángw neetlaamér tlakw tleehhít, nee slám a mar'ír neetlaameedá' slasla/aren, nee a mar'ír umuúqo tsir/ír tlaakw, tidá' ta ahhiiti. 3Asma múk xoordu sleémeero wahangwduú tsaatu'uumarós gwa wáh. Wahangwdá' i buhhtaá Mungú huwahuuw. Nee waawituú baraá yaamu aa fuquús nee inós. Nee múk halaanu'uumár tlehhiít baraá yaamuuwo, aa daqaari'iít ar daqaari'iimarós tidá' ur ar har qoomay wasl.” 4Aníng afór hatlá' ngiri axaás ar gawaá dooraá daahh. Afoorí i kat, “Muk'eé', kuungá' ti'iité' baraawose, as ma dinku'uumisaara' nee inós baraá tlakweemaawose, nee slám as kuungá' mutunduwa muúx ar muxtaarós tidá' inós kawa muxi. 5Asma tlakweemaawós naa tlahhiyé' nay hardahiyé' gawaá doorí alé. Nee Mungú tlakweemaawós sleémeero gaa insláy. 6Kuungá' inós buaak ar adoodá' inós ira bu'uún. Ka buá' sagaáwa tsár wa ale ar tlehhemi'iiwós kudá'. Inós wahaasaak ar wahaangw oo adór kudá' inós muu ngura wahamís, ala dirose doogaak sagaáwa tsár wa ale. 7Slahha'amu nee gurhaami dirós i haniisaak ar adoodá' inós tira xirfayeemís, nee ira hót ar slafíngw diihhooa. Asma inós i kat baraá muunuúwós i aleeró gídaabá, ‘Aníng a waawuto'o, slám a kwaalo'orooká. Aníng gurhaami a baloó araaká.’ 8Ala as inós iwa adoorí kat, muxtaarós i baraá looár wák i hardát, pu/i nee gurhaami nee giyeét. Inós kari xaawúy kángw kilá' wa aleeró ar asla. Asma Aakoó Mungú oo inós gaa sakwasleemuut, inós i /uuruú kón.” 9Nee waawituú baraá yaamu, kudá' aa fuquus nee inós, nee oo aa aldiihhouus nee inós, inooín tari tsuunqumiis qoomár quuír asltá inós gaa xaawuur bar kaa ár. 10Inooín tari amór saáw i sihhiit as tawa da'ayumiiti slahhe'eemisuuwós kudae. Tari ooi, “Gixsadá' ur ar Babeli, gixsadá' /uuruú koom, hhiintluuwók ku gawít, asma gawaá looár wake sakwasleemarók naa hardát.” 11Nee mukdá' halaanu'uumár tlehhiít baraá yaamuuwo, inooín sleeme ta /aa/amín nee ta tsuunqumiis as inós. Asma heé muruuín kudá' gu tlaxuúm i kaahh daxta. 12Muruuín kudá' ta tlaxwaaxun a kwí, miisli nee lapiyá, tlaa/eedá' tlaxo uren nee kwasluudá' tlaxo uren, inqwaruudá' /awák oo hhohhó' nee kudá' siira/atén, inqwaruudá' natsatsaá' nee kudá' da/atén, umuúqo xa'anoó xaraangw tsuú', nee umuúqo xooslmoó taa tleéhh ar xareemaá daawe, umuúqo xooslmoó taa tleéhh ar xa'anoó tlaxo úr, nee kudá' taa tleéhh ar muqsla, laqaá ar muqslár da/aten, laqaá ar tlaa/eedá' tlaxo uren awa ta babay marimári. 13Nee slám qafoodá' xa'ano awa xaraangw tsuuá', xa'anoodá' ta babay mdalasini, nee muruudá' xaraangw tsuú' oo ta baraá di/itá i qamaamin, xwatsoodá' ta da/a/an awa xaraangw tsuuá', nee di/itadá' xaraangw tsuu', nee di/itadá' na/amo, tidá' xaraangw tsuu'. Nee slám difaái nee di/itá xa'anoodá' ta babay miseituni, puuruú /awák nee balángw angaáno, hikwa nee bee/aangw, faras nee gaardu, lawaale nee tam múk hatlá' sleeme. 14Án kiíng i baw, “Na/'aá xaai kudá' muunuúwók i slai naa ilaawók wa qwaariyé'. Muruuwók sleémeero kudá' tlaxo urén nee kudá' xirfuú koóm, aa ilaawók wa qwaár sleeme. Nee slám muruuwí muu gu baloó ariiká.” 15Mukdá' halaanu'uumár tleéhh ar muruuwí, kudá' daqaari'iima gaa slay ar Babeli, tari amór saáw i sihhiít as slahhe'eemisuuwós kuwa da'ayuumiti, tari /aa/amín nee tari tsuunqumiís. 16Tari ooín, “Hhiintluuwós ku gawít, Gixsadá' ur, tidá' taa tsiitiís ar inqwaruú /awák oo hhohhó', nee inqwaruú siira/atén nee oo da/atén, tidá' taa parootuús ar miisli nee ar tlaa/edá' tlaxo uren nee ar kwaslaá hhohho'. 17Asma daqaari'iimarí sleémeero aa qwát gawaá looár wák i alé.” Nee umuúqo heewo oo miringér gan'aamiís baraá tlawto, iri sihhiít amorqá' saáw i ale, nee mukdá' sleémeero oo aa'aá káw ar baraá tlawi ar miringe, nee tam kudá' sleémeero oo baraá miringér wa gadiyuús, kuká' sleémeero tari sihhiít amór saáw i alé. 18Mukwí iri ló'wa /aa/amín qoomár quui kawa ár ar gixsár Babeli asla ngiwa al ót. Tari oó', “Gixsár ur ar adór tí i deéro?” 19Hhape kari kwakwaáhh gawaá sager'ín i aleeró, tari /aa/amín ar afór ur nee tari tsuunqumiís, tari oín, “Gixsadá' ur hhiintluuwós ku gawít. Asma muu sleémeero oo miringér koóm ar baraá tlawtá wa hi'iimiit, inooín tana daqaari'iít ar daqaari'iimár gixsarí. Ala hamí daqaari'iimarós sleémeero aa qwát gawaá looár wák i alé.” 20Kuungá' doóri, nee kuungá' múk hhohhó' oo Mungú, nee ya/abuuse nee aaruuse, kuungá' qwalala/é' as inós. Asma Mungú gixsarí gaa sakwasleemuút as tlehhemi'iiwós kudá' inós naa kuungá' i tlehhít. 21Malaykamoó wák oo /uuruú koóm tlaa/ano guri taataáhh oo adór tlaa/ár xoosliingw. Tlaa/anoowí guri kwaáhh baraá tlawtí alé, iri oó', “Gixsár ur ar Babeli, kiíng ti kwaahh ar /uuruú adór tlaa/anoowí ar alé, nee slám ti ariiká baloó alé. 22Nee slám mukdá' marímbadá muúx, nee tam múk /ayluuse nee múk filímbír ufhhaám nee múk tarumbeetár ufhhaám, afor'ín ka malé axaasiiká baraawoge baloó ale. Nee slám mukdá' gadiyér dimbadimbé ar daba' ga xuú', inooín ki baloó ariiká baraawoge. Nee slám afór tlaa/ár xoosliingw ka baloó axaasiiká baraawoge. 23Nee slám gwa/ateemaá tsaa'asi ki baloó ariiká baraawoge. Nee afór garmoó duuxuxuúm nee ar dasír ta duxuuti ka baloó axaasiiká baraawoge malé alé. Asma mukók kudá' halaanu'uumár tleéhh, inooín a múk aleesleemuú koóm baraá yaamuuwo, nee xoordu sleémeero kina al/agín ar da/ariwók.” 24Baraá gixsarihe tseerér aaruuse kaa ár, nee ar múk hhohhó' oo Mungú, nee ar mukdá' sleémeero oo taa tsuú/ baraá yaamuuwo.

will be added

X\