GEEHHOEEMAÁ 17

1Malaykamoó wák niri hardáh. Inós a malaykamoó wák baraá malaykeedá' faanqw, tidá' slooqa'aá faanqw kooma. Inós iri axweés dir'eé' i alé iri oó', “Qwaláng amoorí. Aníng sakwasleemár tsaatuso'oodá' ur ngi laqaám dirók i alé. Inós a tidá' aa iwit gawaá ma'aá yaariír i alé. 2Waawituú baraá yaamu aa fuquús nee inós. Nee mukduú baraá yaamaá hoót kwaa oonitimís ar wahángw tsaatu'uumarós.” 3Malaykamoodá' aníng iri ar tláy ar baraá qeeru ay baraá xanxaay. /Ameeni ngiri ár aa iwít gawaá makito'ór daa/aat ló'wa ale. Makito'oorí i háts umér /ooslisliingo. Sagér faanqw ga koón nee xareemi mibaangw. 4Nee slám /ameenidá' kaa tsiitiís inqwaruú siira/atene nee oo da/atén. Inós kaa parootuús ar miisli nee ar tlaa/edá' tlaxo uren nee ar kwaslaá hhohho'. Inós i xooslmoó koón oo miisli baraá dakose. Xooslmoowí aa haáts muruú tlakwe nee umuúqo slasla/aruú tsaatu'uumarose. 5Nee baraá gitsee/awose umuú lu/aaráy kwaa gooín gídaabá, “Gixsár Babeli ar ur, aayór tsaatuuse sleémeero nee aayór slasla/aru sleémeero oo baraá yaamu.” 6Aníng ngiri tsaáhh gídaabá /ameenidá' kaa oonitiís nee tseerér múk hhohhó' sleémeero oo Mungú nee ar tseerér mukdá' taa tsuú/ as Yesu kuwa lamabu'ún. Aníng inós ngiwa ár niri waa/oó/ ló'wa ale. 7Malaykamoodá' aníng iri báy, “Gár ta waa/oo/amiin a milá? Aníng lu/aaroó /ameenirí ngu oó' dirók i alé, nee oo makito'oorí /ameenirí ga gagariim, makito'oorír sage faanqw nee xareemi mibaangw. 8Makito'oodá' taa aán inós geeraawo i deer, ala hamí i káhh. Nee inós i ti'ít baraá bohongwdá' aa tsarere'eét wa ale, nee iri tleér amór qwanaay. Nee múk baraá yaamuú wa hoót, kwí umer'ín taa gooinká baraá kitaabuú slafiingw iimír yaamu kiwa tleehhiiká, inooín ta waa/oo/ qoomár makito'oodá' bar kaa ár. Asma makito'oorí geeraawo i deer, ala hamí i káhh, nee aluuwo i hardát. 9“Baraá kaangwihe gár ta slai a fuquraangw, kuduú sagaalooár koóm. Sageedá' faanqw a tlom'aá faanqw awa /ameenidá' aa al iwít. Nee slám sageedá' a waawitaá faanqw. 10Waawituú kooán kwaa daraáhh qaroó alé, nee oo wák i deer. Oo hatlá' naa hardahiiká. Kwí bir naa hardáh, inós deelór iwa hooti ka ureeká. 11Nee makito'oodá' geeraawo dáw nee hamí i káhh, inós an waawutmooduú dakaát. Nee slám inós an waawutmoó wák baraá wawitaádá' faanqwe, nee inós i baraá qwanoó káy. 12“Xareemidá' mibaangw awa taa aán a waawitaá mibaangw. Inooín waawuti'iima kaa slayká. Ala inooín waawuti'iima ka sláy tawa adór waawitá ar har qoomár looár wák dinkwa nee makito'oodá'. 13Inooín axweesantaín a wak. Gár inooín ta slai a makito'oodá' kan /uuruuín i haniís nee aleesleemuuín. 14Inooínaká' ta slaaqw nee Deelmoó bee/i. Ala Deelmoó bee/i inooín gi ar baa/, asma inós a Aakoó bariisee, nee slám inós a Waawutmoó waawitá. Nee mukós kudá' taa ateét nee oo taa tsawaár nee oo inkihhimuúj koóm, inooín baali ngi slayá' dinkwa nee inós.” 15Aluuwo malaykamoodá' iri báy, “Ma'aydá' taa aán, kudá' /ameenidá' tsaatuso'o aa al iwít, a muu nee boo/aay nee xoordu nee tsifri. 16Nee xareemidá' mibaangw awa taa aán, nee makito'oodá', kuká' /ameenidá' tsaatuso'o ngi aahhiyá'. Inooín /ameenidá' ka liitlakuso'o tleehh nee kari /aankweetsiis, fu'unaywós kiri /aay, nee kari xaawúy ar asla. 17Asma Mungú inslawaywí gwa qaás baraá muner'ín i aleeró as kawa tleehhi tidá' inós i slai, nee inooín tiwa axweesani slaslaya' gídaabá waawuti'iimar'ín kawa haniisi dír makito'oodá', ay dír axweesanoó Mungú i boo/i. 18“Nee /ameenidá' taa aán a gixsadá' ur, tidá' waawuti'iimár koom daanduú waawituú baraaká' yaamuuwo.”

will be added

X\