GEEHHOEEMAÁ 15

1Aluuwo layár hatlá' ana gawaá doorí wa ár. A layár ur nee ar waa/oo/amór koom. Layaarí a malayke faanqw ar muxtár faanqw ga koom. Muxtaarí faanqw a tidár alhhe'eesaay. Asma buhhtaá Mungú naa boo/iyé' ar muxtaarí. 2Aluuwo garka ngiri ár, a adór tlawtá gwa/aat adór kioór wa ale, ar taa aleedoók nee asla. Mukdá' makito'oodá' gara baa/, nee murslaaqatuuwós kudae, nee faarór umuuwós kudá', mukwí sleeme una ár. Inooín taa sihhiít afaá tlawtadá' gwa/aat ar adór looár wa ale. Inooín ta marímbár Mungú kón. 3Nee slám inooín daa'ángw ta daai a oo Musa, sagadiyusmoó Mungú, nee daa'ángw Deelmoó bee/i, ta kaahi, “Aakoó Mungú, Aleesleemusmoó mura' sleémeero, tlehhemi'iiwók ki uren, nee i wa/oo/amór koná'. Waawutmoó xoordu sleémeero, kuúng lohuwók i ganaaiyá' nee slám awa ló'. 4Aáko, heé kuúng u da'ayumiitaaká a heemá, nee heé umuuwók xirfayeemiisaaká a heemá? Asma oo hhoohhoó' a kuúng kilók. Xoordu sleémeero ni hardahiyá' nee niri dír geeraawók i tumbarara'amitiyá', asma tlehhemi'iiwók awa ganaa'á' naa geehhouyé'.” 5Alaá muruuwihe niri qaytsiít, Doó Mungú nguri ár, kuwa gweér. Do'wí a heémadár lamabu'uungw, tidár gawaá doorí i dirii'. 6Malaykeedá' faanqw, tidá' muxtaadár faánqw koom, niri ti'ít baraá Doó Mungú wa ale. Inooín kaa tsiitimiís ar inqwaruú /awák ló'wa ale, oo miirií/. Nee slám gawaá da/eewer'ine gár taa tsegiít a him'ér miisli. 7Nee oo wák baraá muruudá' slaáf oo tsiyáhh slooqa'aá faanqw awa miisli giri hanmiís dír malaykeedá' faanqw. Slooqi'iiká' naa hatsiyé' buhhtá Munguhe. Inós an kudá' slaáf ay alhhe'eesay wasle. 8Doó Mungú iri haats quuiro, tidá' amór xirfuú Mungú daahh nee amór aleesleemuuwós. Slám heé dahmuú baraá Doó Mungú gwa aleeslay i kaahh ay dír malaykeedá' faanqw muxtaadá' faanqw ngay hhe'es.

will be added

X\