GEEHHOEEMAÁ 14

1Aníng niri qaytsiít, Deelmoó bee/i nguri ár aa sihhiít gawaá tloomár Sayuni. Nee múk kume tsiiruú wák nee mibeeraá tsiyáhh nee tsiyáhh aa sihhiít dinkwa nee inós. Gawaá gitsee/ér mukwihe gár taa gooín a umuú Deelmoó bee/i nee umuú Baabuúwós. 2Aníng afoo ngiri axaás ar gawaá dooraá daahh. Afoodá' a adór afór ma'aá yaariir awa wa/amiimá' baraá wa/ángw i alé, nee a adór afór xuuraír ur. Afoorí naa axaás a adór afór múk marímbár muúx, qoomár inooín marímbar'ín ngiwa muxiya'. 3Inooín daa'ángw /abén kuna daá' dír geerá kitangwduú aleesleemuú wa ale, nee dír geerá muruudá' slaáf oo tsiyáhh, nee dír geerá bariiseedá'. Ala heé daa'angwdá' intsaahharo gwa aleeslay i kaahh, aqo har mukdá' kume tsiiruú wák nee mibeeri tsiyáhh nee tsiyáhh, kudá' taa tlaáxw baraá yaamuú wa ale. 4Mukwí an kudá' taa slasla/aareemisiiká dír /ameenaaro. Inooín taa duuxuxunká. Inooín Deelmoó bee/i kun eeharahaar amór inós iqo kaya. Inooín kaa tlaáxw baraá múk wa ale as tawa bu'úngw geera oo Mungú nee oo Deelmoó bee/i. 5Nee gawaá afer'ine lama i káhh. Asma inooín tlakweema kaa tleehhiiká. 6Malaykamoó hatlá' nguri malé ár, i gawtí dirii' baraá tla/ángw doori. Malaykamoowí i Ya/abtór hhó' kón ar alhhe'eesay wasl, ar i alki/ituú ay dír múk baraá yaamuú wa hoót, dír umuúqo xoorooro nee tlahhaywo nee umuúqo tsifriro nee muko. 7Iri tseé' ar afór ur iri oó', “Mungú ilaiwawa/aak, nee xirfayeemisaak. Asma siiwa naa hardát ar inós sakwasleema ngiwa tleehhi. Gawaá adoorihe, inós i tumbarara'amiitaak, asma inós an tleehharusmoó doori nee yaamu nee tlawi nee kutloó ma'aay.” 8Aluuwo malaykamoó hatlá', oo tsár, aluudá' ngiri haár, iri oó', “Gixsadá' ur ar Babeli aa hú'. Gixsarí an tidá' xoordu sleémeero gaa wahamis ar wahangwduú tsaatu'uumarós. Wahangwdá' i buhhtaá Mungú huwahuuw.” 9Malaykamoó hatlá', oo tám, niri aluudá' haár, iri tseé' ar afór ur iri oó', “Umuúqo heewo oo makito'oorí ga i tumbarara'aát nee murslaaqatuuwós kudá', nee oo layár makito'o gaa slay gawaá gitsee/awose laqaá gawaá dakós, 10heé adoorí wahángw buhhtaá Mungú gu wah, kudá' taa baraá xooslmoó buhhtaawós i tleéhh, slám kwa aleedoogiiká nee ma'aay. Nee slám heé adoorí ku slahhe'eemiis ar asla nee ar asltadá' xaraasl ar kiberíti dír geerá malaykeedá' hhohhó' wa ale, nee dír geerá Deelmoó bee/i. 11Quuír slahhe'eemisuuín in tsa/aán gawtí alé ay alhhe'eesay wasle. Mukdá' makito'oodá' gaa i tumbarara'amiit, nee murslaaqatuuwose, nee umuúqo heewo oo umuú makito'oodá' gwa slay tawa layaarós, inooín amohhooár ta slay i káhh tlaatla/aangw nee xweeraawo.” 12Baraá kaangwihe múk hhohhó' oo Mungú, kudá' hara'ayár Mungú gaa oh nee oo aa kumiit Yesu haratlintaaooro, inooín gár ta slai a qitla. 13Aluuwo afór gawaá dooraá daahh ngiri axaás i kat, “Gooiimeek, ‘Múk amohhoó' a kudá' qaátl baraá Aakoó i alé iimír hamí.’ ” Qeeru iri oó', “A ló', asma inooín ta hunguu/ alaá daawitimer'ine. Asma mamaá tlehhemi'ii'ín ti alkoná' nee inooín.” 14Aníng niri qaytsiít, hunkír /awaak ngiri ár. Nee gawaá hunkirihe oo wák aa iwiít. Inós a adór Garmoó hee. Gawaá sagose gár i kon a slamángw miisli, nee baraá dakose gár i kon a tsatoó xaraásl. 15Malaykamoó hatlá' niri ti'iít baraá Doó Mungú wa ale, iri tseeamín ar afór ur amór kudá' aa iwiit gawaá hunkidá' i alé iri oó', “Tsataywók taataahheek, ar bu'uumeek, asma qoomár bu'uungw aa xeér, asma balángw baraá yaamu aa hamaár.” 16Nee kudá' aa iwiit gawaá hunkír i alé, tsataywós guri ya/aáw baraá yaamuú i alé, yaamu kiri bu'ún. 17Malaykamoó hatlá' niri ti'iít baraá Doó Mungú wa ale, do'duú gawaá doorí i dirií'. Malaykamoowí sleeme i tsatoó xaraásl kón. 18Malaykamoó hatlá' niri ti'iít baraá meésaadár ilahhooár wa ale. Malaykamoowí inós a kudá' aleesleemuú asltá koóm. Kwí iri tseé' ar afór ur amór kudá' tsatoó xaraásl koóm, iri oó', “Tsataywók kudá' xaraásl taataahheek, /ar'aá na/'aá xa'anooduú sabiíbu oo baraá yaamu bu'uumeek, asma na/'aá sabiíbu naa ló'wa hamaariyé'.” 19Malaykamoodá' tsataywós guri ya/aáw yaamí alé, na/'aá xa'anooduú sabiíbu oo baraá yaamu giri bu'ún. Na/'iidá' sabiíbu giri kwaáhh baraá bohongwdá' na/'aá sabiíbu kiwa tsoo/iti, bohongwdá' úr oo buhhtaá Mungú. 20Na/'aá sabiíbu kiri baraá bohongwdá' wa tsoo/iít, tsee/aá gixsár wa ale. Tseere niri baraá bohongwdá' wa wá/, iri hardát ay afi qoomár afér faras, bihheero a adór kilomeétár tsiire tám.

will be added

X\