GEEHHOEEMAÁ 13

1Aluuwo makito'o ana ár i baraá tlawtá wa ti'iimít. Xareemiwós a mibaangw nee sage ngi koon a faanqw. Nee gár gawaá xareemiwós a slam'i mibaangw. Nee gár gawaá sageerós a umér /ooslisliingw. 2Makito'oodá' naa ár slaqsaywós a adór du'uma. Ya'aawós a adór kudá' makito'ór ta babay duúbu. Afkós a adór afkwá diraangw. Dayshimoodá' úr makito'oorí gari /uuruú i haniís, nee kitaangós oo aleesleemu, nee gari aleesleemuú yaariír i haniís. 3Nee sagós oo wák una ár a adór ságw taa tliqiís ar tliqsantá gwa'ara, ala inkahhayduú gwa'ara kwa hungu/uús. Yaamu sleémeero makito'oodá' ngiri sa waa/oo/iyé', kari eeharahaár. 4Dayshimoodá' úr kuri xirfayeemiís asma adoodá' makito'oodá' ngiwa aleesleemuú i haniís. Makito'oodá' sleeme kari xirfayeemiís, tari káh, “Heé slaqás nee makito'oorí a heemá? Nee slám heé makito'oorí ga aleesláw slaqwaraaro a heemá?” 5Makito'oodá' kari afkwá i haniís oo /ayma'aá uren awa /ooslisliingw ngiwa ar axwes. Slám aleesleemu guri sleér oo gadiyeét ngiwa tlehh slahheeri mibeeri tsiyáhh nee tsár. 6Makito'oodá' afa guri awátl, Mungú guri /ooslisliín, nee umuú Mungú sleeme, nee hotángw Mungú, nee tam kudá' sleémeero awa gawaá doorí wa hootá'. 7Slám kari ya/aámár i haniís as iwa slaqw nee múk hhohhó' oo Mungú nee nguwa ar ba/. Aleesleemu guri sleér gawaá umuúqo tlahhaywo nee umuúqo muko nee tsifriro nee umuúqo xoorooro. 8Muu sleémeero oo baraá yaamuú wa hoót makito'oodá' ka i tumbarara'aat, kudá' umer'ín taa gooiniká baraá kitaábuuduú slafiingw iimír iimu/úngw yaamuuwo. Kitaábuuwí oo slafiingw a oo Deelmoó bee/i, kudá' taa gaás. 9Hee bar iia ga kón, i axaasi. 10Hee bar kwa tseegamór i gooín, aqo kun tseek. Nee hee bar kwa gaasár i gooín ar paánga, aqo kun gaas ar paánga. Baraá kaangwihe múk hhohhó' oo Mungú gár i slai a qitla nee haratlintaao. 11Aluuwo makito'ór hatlá' ngiri ár. Makito'oorí i ti'iimít yaamuú wa ale. Makito'oorí xareemiwós a tsár, a adór xareemaá deelmoó bee/i. Makito'oorí bir axwés afoorós a adór tidár dayshimoó úr. 12Makito'oorí aleesleemuudá' sleémeero oo makito'oodár geera gun ar gadiyús dír geerá makito'oodár geerá wa ale. Makito'oorí yaamu gina harakeemís, nee múk baraá yaamuú wa hoót sleémeero, as makito'oodár geera kawa i tumbarara'ati. Makito'oodár geera ar tliqsantá gwa'ara gaa sleer, iri hungú/. 13Makito'oodár tsár layaá uren gin tlehhít, tam asla in awét gawaá doorí wa ale ay baraá yaamu, dír geerá múk i alé. 14Nee inós múk baraá yaamuú wa hoót gun paslimís ar layuuwós kudá' i tlehhit dír geerá makito'oodár geerá wa ale. Inós mukdá' gawaá yaamuú wa hoót gun babeer gídaabá, “Murslaaqat tleehhaak oo slaqsoó makito'oodá' taa inkahháy i qaás ar paánga, nee iri male sláf.” 15Makito'oodár tsár aleesleemu guri malé sleér oo murslaaqatuudá' nguwa hiinsluú i qas, as murslaaqatuudá' iwa axweesi. Nee slám aleesleemu guri sleér oo iwa hara'ayiyiin gídaabá mukdá' sleémeero oo murslaaqatuuwí gwa sii' i tumbarara'ataro, inooín ki tsu/i. 16Nee inós muu sleémeero guri hara'ayiyiín gídaabá kuwa layár i qaasi baraá dákw doó /iyáy i alé, laqaá gawaá gitsee/a. Múk aa hara'ayiín a múk ninákw nee oo urén, daqaare nee narkuute, múk lawaale nee kudá' lawaaleerooká sleeme. 17Nee slám iri hara'ayiyiín gídaabá heé layaarí ga koomaaká, inós gaa mingiwa tlaáxw laqaá mingiwa weeriís. Layaarí an umuú makito'oodá' laqaá faarór umuuwós. 18Diirí an dír sagaalooár slaa'. Heé fuqurángw koóm faarór makito'oorí ngi faari. Asma faaroorós a faarór hee. Nee faaroorós a tsiire lahhoó' nee mibeeraá lahhoó' nee lahhoó'.

will be added

X\