1 Layár ur iri geehhouúr gawaá doorí wa ale. Layaarí a /ameenír taa tsiitiís ar tsee/amá, nee slahhaangw i baraá tsa/a'aá ya'aawós i dirii'. Nee gár gawaá sagós a slamángw tsatse/uú mibá nee tsár. 2 /Ameenirí inós a tsiiháy, i /aa/amiín asma asltá xwayla nee as slahha'amaayér xwayla. 3 Layár hatlá' iri geehhouúr gawaá doorí wa ale. Layaarí a dayshimoó yangaariír oo daa/aát. Dayshimoowí sagér i kon a faanqw nee xareemi a mibaangw. Nee gawaá sageerose gár i kon a slam'aá faanqw. 4 Hhaysaá dayshimoowí tsatse/uú gawaá doori nguna duuruxuné' nguri kwakwaahhiyé' gawaá yaamí alé. Tsatse/uú taa duuruxún a bartá wák baraá baduudá' tám awa tsatse/uú doori sleémeerowo. Dayshimoodá' iri sihhiít dír geerá /ameenidá' xwaylár slaa', as na/aywós nguwa gu/i qoomár inós bar na/aay ngwa sangw xwayluúr. 5 /Ameenidá' na/oó garma guri laqwál. Na/aywí an kudá' xoordu sleémeero gi de'eém ar hhartá muqsli. Na/aywós kurir tláy hamtidár kilae ay amór Mungú, ay amór kitaangós kuduú aleesleemu. 6 /Ameenidá' iri góp ay baraá xanxaay. Amoodae dirós kaa amohhe'eés nee Mungú as kawa amoodá' wa /aymiisi deelo kumuú wák nee tsiire tsár nee mibeeraá lahhoó'. 7 Gawaá dooriiwo slaqwara niri ti'ít. Mikaeli nee malaykeerós tari slaáqw as dayshimoodá' úr kuwa baali. Dayshimoodá' úr dinkwa nee malaykeerós tari slaáqw sleeme nee inooín. 8 Ala dayshimoodá' nee malaykeerós taa baalinká, pa/angw'ín iri qwaár gawaá dooriiwo. 9 Dayshimoodá' úr kunguri kwakwaáhh, dayshimooduú aáng, kudá' ta babay Ibilisi nee Netlaangw. Inós an kudá' muu sleémeero gi al/agagiím. Kunguri kwaáh baraá yaamu. Malaykeerós sleeme kingiri kwaáh dinkwa nee inós. 10 Aníng afór ur ngiri axaás gawaá doorí i alé, i kat, “Iimír hamí ba/ama nee /uuru nee waawuti'iima a ar Mungúrén, nee aleesleemu a oo Kristowós. Asma sakwasleemusmooduú hhaeerén kwaa yaamí kwaáhh, kudá' inooín gi sakwasleemaamuút dír geerá Mungúrene tlaatla/aangw nee xweeraawo. 11 Inooín sakwasleemusmoodá' kuna arbaá/ ar /uuruú tseerér Deelmoó bee/i nee ar axweesantá lamabu'ungw'ín. Asma inooín slafingw'ín ngwa slai'iiká, tam gwa'ara sleeme ngaa ilaguuwi'iiká. 12 Gawaá adoorihe, kuungá' doóri, bara/é', nee kuungaásingá' sleémeero awa baraasíng wa hootá' sleeme. Kuungá' yaámu nee tlawi, a tsaxwa sakwasleemarhúng kawa wa /akuta'. Asma Neetlaangw, inós naa amorhúng i aweér. Inós i xaraaslamaayér yaariír kón, asma gaa xuú' gídaabá deeloorós ar aa met ka ureeká.” 13 Dayshimoodá' ngiwa ár gídaabá kwaa kwaáhh baraá yaamí alé, /ameenidá' na/oó garma gwa laqwal gari gusiisín. 14 /Ameenidá' kari hhampe'eeraá tsár i haniís awa gwareesidá' ur, as inós iwa /akut ay baraá xanxaay, ay dirós tidá' inós kawa /aymaamisi qoomár kureeraá tám nee tlaqi. Didá' ka saaw dír dayshimoodae. 15 Dayshimoodá' ma'aá adór yaae giri duúx baraá afkós wa ale alaá /ameenidá' wa ale, as yaaeedá' /ameeni ngiwa hayot. /Ameenidá' kari alee/iís nee yaamu. 16 Yaamu afa nguri awaatliyé', yaaeedá' kari guú/, tidá' dayshimo aa duúx baraá afkós wa ale. 17 Dayshimoodá' /ameenidá' gari i buúhh, iri slaqwarár áy dír xwaylár /ameenidá', tidá' aa met. Inooín a mukdá' hara'ayár Mungú gaa oh, nee a mukduú lamabu'úngw Yesu gu koóm. 18 Dayshimoodá' iri sihhiít gawaá hhasángw afaá tlawi.
