GEEHHOEEMAÁ 11

1Hhartá daai kingiri aníng i haniís, aníng tiri báy, “Tláw, Doó Mungú qoomeeseek, nee meésaadár ilahhooa, nee múk baraadá' wa sluufimiís ku fát. 2Ala afeenidá' tsee/aá Doó Mungú i dirii' maweek, ma qoomeesaar. Asma afeenidá' kaa múk xoorduú i haniís. Nee inooín gixsár Mungú ka adarah ar ya'aaín slahheeri mibeeri tsiyáhh nee tsár. 3Nee aníng lamabu'uuser'eé' ar tsár a ya/aámár i haniís. Inooín tari aarirín deelo kumuú wák nee tsiire tsár nee mibeeri lahhoó'. Inooín kaa tsiitiís ar gunyadu.” 4Lamabu'uuseerí tsár a xaaiidá' ta babay miseitúni, kudá' tsár. Nee slám a tsaa'asaydá' tsár, kudá' sihhimiít dír geerá aakoó yaamuú wa ale. 5Nee hee bingi slahhe'eemisuú wa slaa', asla in baraá afer'ín wa ti'imít, nee wakuuser'ín tidá' gari /ák. Gawaá adoorihe, hee bingi slahhe'eemisuú wa slaa', inós kun gaas ar adoorí. 6Lamabu'uuseerí i hara'ayár koón ar doori ngiwa tsek, as tluwaay miwa tluúw qoomaadár aaru'uumar'ine. Nee slám i hara'ayár koná' ar ma'aay kiwa tseere tleehhi nee yaamu ngiwa muxiya' ar umuúqo muxtaaro ar qoomaadá' inooín ta slai. 7Ala inooín lamabu'ungw'ín bar ngwa hhe'eesiyé', Makito'oodá' baraá bohóngw aa tsarere'eét daahh, iri sláqw nee inooín, nee inooín giri bá/ nee gay tsú/. 8Nee tu'uín kiri geexáy baraá loohidár gixsár ur. Gixsadá' baraá qeeruuwo umuuwós ta babay Sodoma nee Misri. Nee slám gixsarí an tidá' Aakooín kwa i kikií' gawaá msalaábár i alé. 9Gawaá deelór tám nee tlaqto muu tu'uká' kiri didá' wa ara'ar. Mukwí amór i dahhi a baraá umuúqo mar'afto nee tlahhaywo nee tsifriro nee xooro. Nee mukwí ta ya/anká tu'uín kiwa fooli. 10Nee múk baraá yaamuú wa hoót i qwalalaa/ nee iri baraa/ as inooín, nee tiri kilooín ilahhooár i hanmisiyá'. Asma aaruuseerí tsár mukdá' baraá yaamuú wa hoót guna slahhe'eemís. 11Deeloorí tám nee tlaqi iwa waaráhh, qeeruú slafíngw koóm oo amór Mungú daáhh tu'udá' giri i dáh. Inooín tari sihhiít ar ya'aaín. Nee mukdá' xumiís daér yaariir guri eér. 12Aluuwo aaruuseedá' tsár afór ur kari axaás ar gawaá dooraá daahh, giri beér, “Tsa/amaré' ay amoorí.” Tari tsa/án gawaá doorí aleeró baraá hunkáy. Nee wakuuser'ín tidá' giri ga/eér. 13Qoomaadár kilae kunseeli niri hardát, bartá wák ar gixsa iri hú', baraá baduudá' mibaango awa gixsa. Múk kumér faanqw kuri tsuú/ nee kunseelidá'. Nee múk aa meet dae guri eér, Mungú doori kuri xirfayeemiís. 14Slahha'amuú tsár aa waaraáhh. Ga/aaweek, slahha'amuú tám i lawee' ar gaanslaay. 15Malaykamoó faanqw tarumbeéta gari ufaáhh. Afór yaariir ar uren iri ilawáts gawaá doorí wa ale, iri ó', “Waawuti'iimár baraá yaamu daxta ar Aakoorén nee Kristowós. Nee inós a waawutmo ay alhhe'eesay wasle.” 16Nee bariiseedá' mibeeri tsár nee tsiyáhh, tidá' dír geerá Mungú wa iwiiwiit baraá kiteeraá aleesleemuuwo, tari tumbarara'amiít dír geerá Mungú i alé, Mungú kuri sluufimiís, 17tari ooín, “Atén kuúng u sluufimiisaán, Aakoó Mungú Alesleemusmoó mura' sleémeero. Kuúng a kudá' dáw nee kudá' daadáw iimír aange sleeme. Asma kuúng aleesleemuuwók kudá' úr ugwa ót nee aga waawuti'iín. 18Múk xoordu ina buúhh. Ala xarasleemaawók naa hardahiyé'. Nee slám qooma naa hardát ar múk aa qaatl kuwa sakwasleemuuti. Nee slám qooma naa hardát ar sagadiyuuseerók kawa slaqwe'ín i haniisi, sagadiyuuseerók tidár aaruuse, nee mukók kudá' hhohhó', tam mukdá' sleémeero oo kuúng u ilaiwawaá/, barnaxes a múk ninákw laqaá barnaxes a múk urén. Nee slám qooma naa hardát ar mukdá' yaamu gi hhititiím kuwa hhitin.” 19Aluuwo Doó Mungú, kudá' gawaá doorí dirií' kuri gweér, nee sandakmooduú alqadór Mungú iri geehhoúy baraá do'ós wa ale. Mankari iri werere'eliín, afoo kari axaás, xuuraai iri xuurú', kwarara/a iri kwarará/, nee tluwoó yaariír oo tlaa/e iri tluúw.

will be added

X\