GEEHHOEEMAÁ 10

1Malaykamoó hatlá' nguri ár oo aleesleemuú koóm, i awdiit gawaá doorí wa ale, kwaa tsiitiís ar hunkáy. Nee gár gawaá sagós i dirii' a ga/alér tluwaay. Slám gitsee/awós a adór tsee/amá. Nee ya'aawós a adór uheemaá asla. 2Baraá dakose gár i kon a kitaábuú niiná oo taa gweér. Yaaeerós ar doó /iyáy gari qaás daanduú tlawi. Nee yaaér doó basáy gari qaás gawaá daanduú yaamu. 3Malaykamoowí iri tseé' ar afór ur adór aahhór diraangw. Nee qoomár iwa tseé' kududuhoó faanqw iri axweés. 4Qoomár kududuhoó faanqw iwa hhe'eés axweesanto, aníng ana slaá' /aymi'iidá' ngiwa gooiim. Afoo niri hardát ar gawaá dooraá daahh, iri beér, “Aymi'iisíng taa axweés nee kududuhoó faanqw kufúlír tseegeek ki lú/, mi gooiimaar.” 5Malaykamoodá' naa ár, kudá' aa sihhimiit daanduú tlawtá wa ale, nee daanduú yaamu, inós dakós oo doó /iyáy guri gawtí tleés gawaá doori. 6Inós lo'o gari huúw ar Mungú kudá' slaáf tam ay alhhe'eesay wasle. Inós an kudá' doori gaa tleehh, nee muruudá' oo baraadá' i dirií'. Slám yaamu gina tleéhh, nee muruudá' baraadá' i dirií'. Nee tlawi gana tleéhh, nee muruudá' baraadá' i dirií' sleeme. Malaykamoodá' lo'o ngiwa huúw, iri oó', “Daxta qooma aa fák. 7Ala bál afór malaykamooduú faanqw bar kaa axaás, qoomár tarumbeétarós barnga ufaáhh, qoomaadá' an qoomár muruudá' Mungú aa slaá' kudá taa luú/ kuwa boo/eesi, adoodá' inós ngira alki/iít dír sagadiyuuseerós tidár aaruuse.” 8Afoodá' aníng naa axaás gawaá doorí wa ale, iri amor'eé' axwés malé alé iri beér, “Tláw, kitaábuudá' niiná oo taa gweér taataahheek oo dákw malaykamoó i dirií', malaykamoodá' aa sihiit daanduú tlawtí alé nee daanduú yaamu.” 9Malaykamoodá' nguri daqáw nguri báw, “Kitaábuusíng niiná haniisang.” Aníng iri báy, “Taataahheek, ku /ák. Inós i qarqaar baraá guruuwoge, ala baraá afkoge i nuqunuuq adór danú wa ale.” 10Kitaábuudá' niiná nguri taataáhh gawaá dákw malaykamoodá' wa ale, nguri /aáy. Ala gawaá afkueene i nuqunuuq adór danú wa ale. /Aymaaro nguwa hhe'eés, iri qarqaruút baraá guruueene. 11Aluudae aníng tiri báy, “Gár kuúng uwa hariím a aaru'uuma an malé dúx daanduú múk yaarire, nee daanduú xoordaá yaarire nee slám daanduú tsifrír yaarire nee waawitú yaarire.”

will be added

X\