GEEHHOEEMAÁ 1

1Gaarí a gár Mungú aa geehhoeés dír Yesu Kristo, as Yesu Kristo muruudá' hardáh ar gaanslaay nguwa laqan dír sagadiyuuseerós i alé. Kristo malaykamoowós guri ya/aáw amór sagadiyusmoowós Yohana, as muruuwí nguwa dirós i laqan. 2Nee Yohana muruudá' sleémeero aa ár guri alki/iít. Inós axweesantá Mungú gari lamabu'ún, nee lamabu'úngw Yesu Kristo sleeme. 3Heé amohhoó' a kudá' axweesantá aaru'uumarí ga soomuús. Nee múk amohhoó' a kudá' ga axamiís nee gari oh tidá' taa baraaká' i gooín. Asma qooma aa naká/. 4Ánuú Yohana muruuwí una gooiím dír múk Kríshaanáy oo baraá gixsadaá faanqw awa baraá yaamaá Asia. Mungú kuungá' nu tsuuqi nee nu waydí haniisi. Inós an kudá' dáw, nee kudá' daadáw nee kudá' hardáh. Nee slám gurtleemu nee wayda amór i dahhi a amór qeeruudá' faanqw, kudá' dír geerá kitaangós oo aleesleemuú i dirií', 5nee amór Yesu Kristo. Inós an lamabu'usmoodá' inkihhimuúa koóm, nee slám inós an heé geera oo naa waaslee/ baraá múk aa qaátl wa ale. Nee slám inós a waawutmoó waawitá sleémeero baraá yaamuuwo. Inós atén tin slaa', nee tina gweér baraá lawaali'iimár tlakweemaá wa ale ar tseereerós. 6Inós atén tina waawuti'iimár i sláy, tiri geeraharuusér saaliingw tleéhh, as atén Mungú, Baabuúwós, kuwa sagadiyuusaan. Xirif nee aleesleemu i dirós ay alhhe'eesay wasle. Amin. 7Qaytsiít, inós ni hardah ar baraá hunkáy. Umuúqo heewo guri ar ar ila', tam mukdá' inós gwa mutin sleeme guri ar. Nee muu sleémeero oo baraaká' yaamu iri /aa/amín ar gurhaami as inós. Eeít, adoorí an adoodá' tleehharuut. Amin. 8Aakoó Mungú i kaahi gídaabá, “Aníng an Alfa nee Omega, aníng an iimu/uungw nee alhhe'eesaay.” Aníng an kudá' dáw, kudá' daadáw, nee kudá' hardáh, kuduú Aleesleemusmoó mura' sleémeero. 9Aníng a Yohana, hhiyaahúng, kudá' aa al dinku'uus nee kuungá' baraá slahha'amaayeero, nee baraá Waawuti'iima, nee baraá qiqtliingw baraá Yesuwo. Qoomarkaaro aníng ana hardáh baraá yaamaá kaahaar awa tla/ángw tlawi, awa ta babay Patmo. Gár nisa didá' i hardáh a axweesantá Mungú ana alki/iít nee Yesu una lamabu'uúm. 10Bál Deelór Aakoowo Qeeru aníng ina i hardáh, afór ur ngiri axaás ar axwees aluueé' wa ale. Afoorí a adór afór tarumbeéta. 11Afoorí ina beér, “Gár kuúng ta aan gooiimeek baraá kitaábuú i alé, nee daqaní kay ya/áp amór múk Kríshaanáy oo baraá gixsadaá faanqw, gídaabá amór kuduú Efeso, nee Smirna, nee Pergamo, nee Tiatira, nee Sardi, nee Filadelfia, nee Laodikia.” 12Aníng niri warqáw as afoodá' amor'eé' i axwees ngiwa ar. Nee qoomár niwa warqáw, kiteeraá faanqw awa tsa'asoó koomá' ina ár, awa taa tleéhh ar miisli. 13Nee baraá tla/ángw kiteeridá' tsa'asoó kooma'a, heeko una ár oo adór slaqsoó garmoó hee. Hiiyoó naa dahaás aa hardáh ay baraá ya'a', nee tla/aangós gwa tseék ar himú miisli. 14Se'éngw sagós ku /awák adór se'éngw bee/aangw oo ló'wa /awák, nee adór tlaa/aá tluwaay. Nee ilaawós i gwa/aatiyá' adór tsángw asltá wa ale. 15Nee ya'aawós a adór muqslír tlaxo ur, ar taa hamaatla hhe'eés ló'wa ale ar baraá asla. Nee afoorós a adór ma'aá yaariir awa wa/amiimá' baraá wa/ángw i alé. 16Nee baraá dakós oo doó /iyayhe i tsatse/uú faánqw kón, nee paángár afa xaraasl badu tsaraawo i baraá afkós wa ti'iimít. Slám gitsee/aawós i gwa/aatiyá' adór tsee/amaá wa ale qoomár tsee/amá bira siirií/. 17Aníng qoomár nguwa ár, niri huú' dír ya'aawós i alé adór heé aa gwaa'. Dakós oo doó /iyáy nguri qaás gawaaeé' i alé, iri oó', “Ma da'ayuumitaar. Aníng a kudá' oo geera nee kudá' oo alhhe'eesaay, 18kudá' slaáf. Aníng geeraawo aga gwaá', nee qaytsiít hamí a slaáf ay alhhe'eesay wasle. Nee slám aníng gweermo a koóm ar gwa'ara nee ar didár múk aa qaatlb. 19Gawaá adoorihe, muruudá' kuúng taa aán gooiimeek, kudá' dáw nee tam kudá' sangw hardáh sleeme. 20Lu/aaroó tsatse/uudá' faanqw, kudá' kuúng taa aán baraá dakw'eé' oo doó /iyáy, nee oo kiteeridá' faanqw awa miisli awa tsa'asoó koomá', gídaabárós a tí, tsatse/uudá' faanqw a malaykér múk Kríshaanáyduú baraá gixsadaá faanqw. Nee kiteeridá' faanqw awa tsa'asoó koomá' a múk Kríshaanáyduú baraá gixsadaá faanqw.”

will be added

X\