FILEMONI 1

1Ánuú Paulo oo taa tseék as Kristo Yesu barwaárí ngina gooiím dinkwa nee Timoteo hhiyaarén, amoorók Filemoni, sla'aarusmoorén, oo gadiyér tleéhh dinkwa nee atén, 2nee amór Afia, hho'oorén, nee amór Arkipo, askaarmoó Kristo adór aníng wa ale, nee amór múk Kríshaanáy kudá' baraá do'ók wa burumburiimamiít. 3Mungú Baabuúrén nee Aako Yesu Kristo kuungá' nu tsuuqi nee nu waydí haniisi. 4Deelo sleémeero án Mungú un sluufimiís as kuúng, nee un inslasláw baraá firor'eene, 5asma iidíguú sla'aarirók u axamiís nee haratlintaaór ta koon dír Aako Yesuwo nee dír múk hhohhó' sleémeerowo. 6Án kuúng gár uwa aleefiriiriim a tí gídaabá kuúng masók haratlintaaoorók an lamabu'uún dír múk hatlá' i alé. Gawaá adoorihe atén sleémeero tsuuqadá' sleémeero masók ki tsaahha hhe'eesaán, kudá' ta koomaan baraá Kristowo. 7Asma qwal/uú yaariír ugwa sláw nee gurkwa/asa, as sla'aarirók, asma munér múk taa hhehhe'eés kaa qwal/atís nee kuúng, hhiyaaeé'. 8Gawaá adoorihe, baraá Kristowo aníng geeraawo a aleesláw ar kuúng uwa hara'ayiim tidá' kuúng tawa hariin tleehhamooro. Ala a sla'aaká kuúng uwa hara'ayiim. 9Ala án kuúng u firiím adoorí kawa tlehh as sla'aari. Ánuú Paulo a aako, nee slám a baraá tsegma as Kristo. 10Aníng kuúng u firiím as na/ay'eé' Onesimo. Inós aníng una laqwaál ar baraá Yesu baraá tsegmoó wa ale. 11Inós bál geera kuúng uga gaa wa buuiiká, ala hamí u ló' wa gaa wa buu', kuúng nee aninge. 12Hamí ngun ki/ís amoorók i alé inós u kilá', nee inós a adór muunuúeé' oo kilá'. 13Aníng ana slaá' iwa amor'eé' wa hooti, as aníng iwa sagadiyuusi daanduuwók wa ale, baraá tsegmuuwí ni diriia as Ya/abtór hho'. 14Ala aga slaiiká gaa ngiwa kilooeé' tleehh, aqo adór kuúng ta kat, asma sla'aarirók mawa harakeés masók a adór kuúng ta sla'. 15Gaarí dooqa an gár kusa paraátl diroge qoomár niinawe, as kuwa malé sleer, tay al hotá' ay alhhe'eesay wasle. 16Iimír hamí inós a adór lawaalmoowooká, ala a lawaalmo ba/a. Inós a hhiya' oo sla'aarusmo. Ar ló' aníng u slaá', ala kuúng u ak slá' asma a heewók, nee hamí a hhiyaawók baraá Kristowo. 17Ala kuúng aníng bira tsáhh adór tar dinku'usmoowók baraá haratlintaaooro, inós ilaooheek adór ánuú kilá' wa ale. 18Nee kuúng bura /aytín, laqaá kuúng bur iinús gaaro, gaasíng daanduueé' gooiimeek. 19Aníng Paulo al/axweesantí ngina gooiím ar dakw'eé' oo kilá', gídaabá aníng ngi buú'. A mak sla'aaká uwa inslawtis ar gídaabá kuúng a iinar'eé' koón. Iinadá' a slafiingók oo kilá'. 20Ala hhiyaaeé', gár ni slaa' bu'utuuwo a tí, Alee/iisáng gawaá kaangwihe ar loohír hariím baraá Aakoowo. Muunaáeé' qwal/aseek ar baraá Kristo. 21Tí ngina kuúng i gooiím asma ngiwa xuu' ar gídaabá kuúng adoodá' án naa firiím a tléhh, nee kari harwaaráhh. 22Aníng kuúng u firiím, dír hotaeé' amohhe'eeseek, asma aníng aga haraxuú' gídaabá, Mungú án i alee/iis ar niwa amorhúng i hardah adoodá' kara firiindé' dír Munguhe. 23Epafra kuúng u intsihhiimiis, kudá' taa tseék dinkwa nee aníng asma Kristo Yesu. 24Tam Marko nee Aristarko nee Dema nee Luka, kudá' nee aníng algadiyuusá', kuúng u intsiihhiimisiyá' sleeme. 25Aakoorén Yesu Kristo munerhúng ngi tsuuqi.

will be added

X\