FILIPI 2

1Slafingwhúng baraá Kristoowo i /uuruú huwahúwi? Sla'aarirós nu gurkwa/amísa? Dinku'uumár baraá Qeeru i deéro? Hhooa nee gurtleemu i koondá'a? 2Ala bar adoosíng, muunuú wák koomaak, as qwal/uueé' iwa boo/i. Kuungá' kiloohúng ti sla'aslae', dinku'uumár baraá qeeru koomaak, nee umuúqo daqto ti axweesanaay axamise'. 3Umuúqo gaaro ma tlehhiitara' ar fola, laqaá ar daara/aangw. Ala masók umuúqo heewo tin kilós niinaweemiis. 4Muruú múk hatlá' i slai na leelehhiitaak, ala a muruudá' kuungá' ta sla'a' kiloseeká. 5Kuungá' masók muunuú adór kuduú Kristo Yesu un koondá'. 6Inós iimír iimu/uungo tlehhemuuwós a adór kuquú Mungú. Inós nee Mungú i qoná'. Ala inós ina ya/án qoomtidá' nee Mungú tawa qon ngiwa geexay. 7Baraá sla'aarirose uraydá' tawa adór Mungú guri geexáy, iri adór lawaalmo tleehhiít. Iri hee tleehhiít adór atén wa ale; Iri geehhooúy ar slaqsoó hee. 8Tiri kilós niinaweés, iri hoót ar ilaiwa/ame ay gwa'araarós, eeít, gwa'araadár gawaá msalaába. 9Gawaá adoorihe gaarí an gár Mungú nguwa gáwtí tsaa/asa hhe'eés, nee guri umuudá' úr i haniís, umuudá' umee sleémeero ga baá/. 10Asma muu sleémeero umuuwí ngu i tumbarara'atia, mukdá' gawaá doorí i dirií' laqaá mukdá' baraá yaamí dirií' nee tam kuduú baraá gi'i. 11Nee umuúqo heewo ngi ooi gídaabá, “Yesu Kristo a Aako,” as Mungú kuwa xirfayeesi. 12Sla'aaruuser'eé', án qoomár niwa dirhúng i dirii', kuungá' axweesantaeé' ana ilaiwawa/é' umuúqo daqto. Ala a gár gídaabár koom tawa adoodár kumita' tam qoomár án niwa kaahh. Gadiyeét tleehhaak ar dae nee ar daaraxaay, as ba/amarhúng kawa boo/esa'. 13Asma Mungú in baraahúng wa gadiyuus. Inós nun munér i hanmiis ar muruudá' i slai kuwa sla'a' tleehhamooro. Nee /uuru sleeme ngun hanmiis oo tidá' inós i slai kawa tlehha'. 14Umuúqo gaaro bar tlehhitá', ma tlehhitaara' ar qununu/aay nee tlaampa'aamis. 15Gawaá adoorihe heé kuungá' nu dakuusár i ara'ár i kaahh, as kuungá' tawa na/'aá Mungú tleehhita' awa ta dakuusár i faditiiká, laqaá awa al/ayma wasl, nee awa xaslxaanslír kooma'aaká baraá tla/ángw qartír sageegawden ar aa amooqwat. Kuungá' baraá tla/ángw qartihe tundu gehhó' tawa adór tsatse/uú gawaá doorí dirií', 16asma kuungá' Ya/abtór hho' ar slafiingw an alki/itá' dir'ín i alé. Gawaá adoorihe kuungá' a xirfuueé' bál deeloodár Kristoowo, asma aníng aga tawó ti'i'iimiiká, laqaá aga tawó daawiimiitiiká gadiyeede. 17Haratlintaaorhúng a ilahhooár án ni hanmiis dír geerá Mungú i alé. Bar adór garka tseerer'eé' iwa ku'uta gawaá daanduú ilahhooarí, aníng a qwalaá/ sleeme. Slám qwal/uueé' kwí ngway qasiís dirhúng i alé. 18Qwalaala/é' kuungá' sleeme, qwalaala/é' dinkwa nee aníng. 19Án haraxu'uti a koóm baraá Aako Yesuwo Timoteo nguwa ya/aaw ar gaanslaay iwa amorhúng i hardahi, as muunuúeé' iwa qwalaa/i iidíguuhúng bura axaás. 20Heé hatlá' i kaahh oo nee aníng ti kaangw slawá' oo inós gu baá/, slám heé hatlá' i kaahh oo kuungá' nu sa daawiimiít adór inós wa ale. 21Awa hatlá' sleémeero muruú ta leelehhiiti a muruuín kilooín ala a gadiyér Yesu Kristoowooká. 22Ala kuungá' Timoteo u xuá' adór ir inkihhimuú kón. Inós gadiyeét gaa tlehhaahhiít ar Ya/abtór hho' dinkwa nee aníng, adór baabá nee garmaawós. 23Kwí an kudaádá' án ni ya/aawár wa slaa' amorhúng i alé ar gaanslaay, barnaxes adór kwasleemar'eé' aga xuú'. 24Nee aníng haraxu'uti a koóm sleeme baraá Aakoowo, gídaabá anuú kilá' ni hardáh amorhúng i alé deeloorí tseewe. 25Gár án naa ár ar hariím a hhiyaarén Epafradito ngun ya/aáw amorhúng i alé. Inós nee aníng aga algadiyuusaán, slám inós a slaqwarusmoó wák dinkwa nee aníng. Inós kuungá' nguna ya/abé' amor'eé' alé as aníng iwa sagadiyuusi, nee tidá' án ni slaa' ngiwa hanmiisi. 26Inós kuungá' sleémeero nuna ló'wa inslasláy, iri ló'wa daawiimiít as kuungá', asma adoodá' kuungá' kara axasé' gídaabá inós i tiiq. 27Ar ló', inós aa ló'wa tiíq, afkwá bohoongw ngun wa kií/. Ala Mungú inós guri gurtláy. Tam aníng sleeme Mungú ina gurtláy, as gurhaamir'eé' miwa doogiín. 28Gawaá adoorihe ilakaaharu una ló'wa tleéhh inós nguwa ya/aaw amorhúng i alé, as kuungá' tawa qwal/a' bura aandé', nee slám as gurhaamir'eé' iwa /aaruur. 29Gawaá adoorihe, inós ilaoohaak ar qwal/uú yaariír, adór hhiya' oo baraá Aako. Múk adór inós ilaiwawa/aak. 30Asma inós ina dáh baraá tsaxwa, iri nakaá/ gwa'araaro as gadiyér Kristo, as aníng iwa alee/iisi, alee/isaydá' kuungá' taa harslaaqaté'.

will be added

X\