FILIPI 1

1Ánuú Paulo nee Timoteo, sagadiyuusér Kristo Yesu, barwaárí ngina gooiimaán amór múk hhohhó' oo Mungú sleémeero oo baraá Kristo Yesu oo baraá Filipír i dirií', dinkwa nee geeraharuuser'ín nee sagadiyuusér múk Kríshaanáy. 2Mungú Baabuúrén nee Aako Yesu Kristo kuungá' nu tsuuqi nee nu waydí haniisi. 3Án Mungú un sluufimiís umuúqo qoomár barnaxes kuungá' naa insláw. 4Qoomár barnaxes a firiiriím, án kuungá' sleémeero nun aleefiraariím ar qwala/. 5Asma kuungá' aga dinku'uusé' nee aníng Ya/abtór hho' alki/ituuwo iimír bál geera nee tam ay laarí sleeme. 6Gár án ni haratlintatii' a tí gídaabá, kudá' gadiyér hhoo' gaa iimu/un baraá munerhúng wa aleeró, inós gadiyeédá' ga alhhe'ees ay bál deelór Kristo nay xeer. 7A gár hariím dir'eene adoorí ngiwa inslaslaw daanduuhunge, asma kuungá' a baraá muunuúeé' dir'á'. Asma kuungá' sleémeero tsuuqaá Mungú iga sleeré' adór aníng wa ale qoomár aníng tiwa tseék, nee tam qoomár Ya/abtór hho' ngiwa aleekal/aám nee looeemaawós ngiwa laqaqaám. 8Mungú ga xuu' adór án kuungá' sleémeero nur artá wa slaá', asma nuwa ló'wa slaa' ar sla'aaridár amór Kristo Yesú daahh. 9Gár aníng kuungá' nuwa aleefiriiriim a tí, gídaabá sla'aarirhúng i kumit iwa ló'wa doogiigiin dinkwa nee sagaalooa nee xu'uti sleémeerowo, 10as kuungá' sakwasleemár ganaa' kawa aleesleera' tsatto baraá umuúqo gaaro. Daqaní kuungá' a múk hhó' oo xaslxaanslír koomaaká bál deeloodár Kristo birna hardát. 11Nee kuungá' tundu hatsiis gan'amuwo, kudá' Kristo i tlehhiiti baraá munerhúng wa ale, as ilaiwa/amér Mungú nee xirfuuwós. 12Hhaee'eé', gár ni slaa', kuungá' masók an xuá' gídaabá slahha'amaayeedá' sleémeero aníng naa sláw Ya/abtór hho' gaa ila/iká, ala gana alee/ís tsiyaayaaxaro. 13Asma aníng gár tisa tseék a as tawa eeharusmoó Kristo, nee adoorí aa xu'utít dír askaári nee muu sleémeero oo diirí dirií'. 14Nee tseegamor'eé' hha'aá yaariir awa Kríshaanáy gaa haratlintaao gawdés baraá Aakoowo, tari uraaráy baraá pihhu'uumaaro ar Ya/abtór hho' kawa alik/iiti ar dae wasle. 15A gár xu'uti gídaabá muu bahh'alé i deer oo iidíguú Kristo gu alki/iít as da/i nee gila, ala tam adoorihe awa hatlá' i dayá' sleeme awa iidíguú Kristo ngu alki/iitá' ar muunuú hhoó'. 16Kuká' iidíguuwí ngun alki/iitiyá' as sla'aari, asma ka xuu' gídaabá aníng tina qaás as Ya/abtór hho' ngiwa aleekal/aam. 17Ala kudá' hatlá' a gídaabaheeká iidíguú Kristo nguna alki/iitiyá' ar muunuú hhoó', ala as fola. Inooín ka xui a slahha'amaayer'eé' kan dook baraá tseegamooro. 18Ala a gaarooká. Aníng a qwalalaá/, asma iidíguú Kristo kuqo alki/iit umuúqo loohiro, barnaxes ar muunuú tlaákw laqaá ar muunuú hhoó'. Nee slám aníng a kumiít qwal/amaayeero, 19asma aníng a xuú' gídaabá alhhe'eesaywo án ti gweer, as án kuungá' iwa aleefiriiriinda' nee as Qeeruú Yesu Kristo aníng iwa alee/iimisi. 20Gár án ni haraxuu' nee ar ni harahhiif a tí gídaabá, aníng a baloó muruutaaká baraá umuúqo gaaro. Haraxu'utir'eé' a tí gídaabá umuúqo gaaro ar án ni slaw xirfuú Kristo gu laqaán ar geehhooeema dír muu sleémeerowo, adoodá' Kristo kura xirfayeés aáng, nee tam hamí sleeme kuqo xirfayees, as muruudá' án ni slaw barnaxes ar slafingw'eé' laqaá ar gwa'arar'eé'. 21Asma dir'eene slafiingw an Kristo, nee gwa'ara gár ak hhoo' ngi húp. 22Ala án bar kumiít hotaango, pa/aangw u koóm oo gadiyeérí ar gídaabár úr koom ngiwa koom tleehhamooro. Ala gawaá adoorihe ar ni tsawaar a xuaaká, slafiingw nee gwa'araro. 23Aníng a baraá baraatsarár i dirií'. Aníng a ló'wa slaá' niwa tlaw, niwa hotángw aw amór Kristo, asma adoorí a tsiní kángw kilá' wa ale. 24Ala aníng niwa kumiit slafiingo a gár gídaabár koom ak alé as kuungá'. 25Aníng kaangwí u xuú'. Gawaá adoorihe a xuú' gídaabá aníng a kumiít slafiingo, dinkwa nee kuungá' sleémeero as kuungá' nuwa alee/iis, nee qwal/uuhúng nguwa dook baraá haratlintaaooro. 26Aníng binda amorhúng i hardáh malé alé, pa/ángw yaariír daqaní u koondá' oo Kristo Yesu kuwa xirfayeemisa' as aníng. 27Daxta gár gídaabár koom a kuungá' masók an hotá' ar adoodá' Ya/abtór Kristo kawa hariím. Án barnaxes naa hardáh amorhúng, laqaá barnaxes naa hardahiiká, gár án ni slaa' masók an axaás gídaabá kuungá' aga sihhitano hhe'esé' baraá haratlintaaoro ar wakleeli'iimár baraá Qeeru, nee haratlintaaór Ya/abtór hho' kawa aleeslaqwa' ar muunuú wák. 28Wakuuserhúng ma da'ayuumitaara' baraá umuúqo gaaro. Kuungá' bar pihhu'uumár koondá', gaarí a laya dir'ine gídaabá inooín i qwaariyá'. Ala dirhunge a laya gídaabá kuungá' a ba/aandá'. Nee layaarí amór i dahh a amór Mungú inósuú kilá'. 29Kuungá' qeemu ugwa sleeré' oo Kristo kuwa haratlintié'. Ala a har qeemuuwí kiloseeká, ala tunduna slahhe'eemiís sleeme as inós. 30Asma kuungá' sleeme a slaqwá' baraá slaqwaraarí aníng ni slaaqw. Kuungá' aáng aníng iga aandé', niwa slaáqw, nee hamí aga axasé' adór aníng nir kumiít slaqwaraarihe.

will be added

X\