MATAYO 8

1Yesu iwa gawaá tloomár wa aweér, boo/oó úr oo muu guri eehaár. 2Heé tiqtír tsatimituú koóm iri amoorós i hardáh, guri i tumbarara'aát, iri oó', “Aáko, kuúng bar slá', i aleesleér iwa hhehhe'es.” 3Yesu guri dakós i gan'aás guri kwatiít, guri báy, “Án a slaá', hhoohhooúw.” Hamtidár kilae tiqtirós tidár tsatimit iri hungú/. 4Yesu iri oó', “Ga/aaweek, tí ma heé bawaar, ala tláw, ti laqaan dír geeraharusmoó saalíngw múk Yahudi. Muruudá' Musa aa hara'ayín haniiseek, tí i lamabu'uungw tleehhit dir'ine.” 5Yesu iwa dáh baraá gixsár Kapernaumu, geeraharusmooko askaári iri hardáh dír Yesu, iri oó', 6“Aáko, lawaalmooeé' i dír dó' wa tiiq, tiqtír sol'omituuwo, i ló'wa slahhaa'.” 7Yesu iri oó', “Án ni hardáh, ngu hungu/uusár áw.” 8Geeraharusmooduú askaari iri oó', “Aáko, aníng a hariimaaká ar kuúng niwa dat baraá dooeé' alé. Ala kuúng /aymu na ooeek, nee lawaalmooeé' i hunguu/. 9Asma aníng sleeme múk i baliít i deer, slám askaárír án ni baliit i deer. Kwí bura báw, ‘Tláw,’ aqo in tláy, nee kwí bura báw, ‘Qwaláng,’ aqo nin hardah. Nee lawaalmooeé' bura báw, ‘Adoorí tleehheek,’ aqo gan tleehh.” 10Yesu /aymi'iidá' ngiwa axaás, iri waa/oó/, iri oó' dír mukdá' nee inós ti alkoomá', “Án a kah, haratlintaaór ur ar adór tí aga baloó ariiká tam dír heé wake baraá múk Israeliwo. 11Án a kah, múk yaariír ni hardah, oo da/aá daáhh nee /uwaawo. Inooín ta al iwiit dír muruú /ayma dinkwa nee Abrahamu nee Isaka nee Yakobo baraá waawuti'iimár dooriiwo. 12Ala mukduú waawuti'iimarí kun kwaahh tsee/áy alé baraá giwti, an didá' tawa /aa/amin nee sihhina' kiwa qirirtliimisi.” 13Ala Yesu geeraharusmooduú askaari guri báy, “Tláw waátl, tisíng taa haratlintí' i tleehharut diroge.” Lawaalmoowós kudá' iri hunguú/ siiwaadár kilae. 14Yesu iri hardáh dír doó Petro. Aayór harér Petro gari didí áy, i gawaá qatani, i tíq ga/atanto. 15Yesu dákw aayoodá' guri kwatiít. Ga/atanto iri huungú/, iri tleér, guri sagadiyús. 16Qoomár tsiindoowo múk yaariír oo neetlaamér koóm kuna huwahuúw dír Yesu. Inós neetlaameedá' gari hingeemiís ar /aymi'iiwós, muu sleémeero guri hungu/uumiís oo tiqtír dimbadimbé. 17Asma /aymuudá' aarusmo Isaya aa káh iwa boo/i, gídaabá, “Inósuú kilá' slaqwaatlakweerén gana óh, nee tiqtirén gari gagaár.” 18Yesu ngiwa ár gídaabá boo/oó úr oo muu ngwa harweér, iri oó', “A gayuuqá' i waaraahhaán.” 19Intsaahhatusmooko wák oo hara'ayár Musa guri i daqáy guri báy, “Intsaahhatusúmo, án kuúng u eehaár umuúqo dír ta keera.” 20Yesu iri oó', “Intsaawe i mar'ór koón, nee tsir/o i maray'ín koóne, ala Garmoó Hee tam dír sagós ngu i qaasi i káhh.” 21Eeharusmoowós oo hatlá' ina oó', “Aáko, ala ya/ám, baabuúeé' ngu ala foól.” 22Ala Yesu guri báy, “Án eeharáng. Mawaagáy múk adór tu'u, tuaá muk'ín ngi foliitiye'.” 23Yesu iri tsa/án gawaá miringamo, eeharuuseerós guri eehát. 24Fur'a tlawi gari ló'wa leexwaanduúr, tam ma'aay niri tsifaqamiitiyé' baraá miringamoó i alé. Ala Yesu qoomaadae aa guú'. 25Eeharuuseerós guri i daqeér, guri tlés guri beér, “Aáko, atén ti ba/amis, aga qwaaraán.” 26Giri báy, “Mas da'ayumitá', kuungaásingá' haratlintaaór niina.” Hamtidár kilá' iri tláy, fur'a nee tlawi giri iigahhaát, umuúqo gaaro iri xaslít. 27Mukdá' iri waa/oó/, tari oó', “Heewí a heé adoomá, asma tam fur'a gu ilaiwaawá/ nee tlawto.” 28Yesu iri gayuuqá' i waaraáhh, baraá yaamaá múk Gerasi. Nee múk tsár oo neetlaame tiri doogiyé', i baraá /aantaá dahhiyá'. Slám a múk xaraásl. Tam hee waarahhamaá loohidá' gi qiitliiká. 29Tari tseé', tari oó', “Atén nee kuúng a milá, Garmoó Mungú? Nina hardáti as atén tiwa slahhe'eemis dír qoomaarén ira xeeriiká?” 30Daqtaka yaariir ar baynu i deer ar qaw, dir'ín tidaádae ka saaw. 31Neetlaameedá' Yesu guri harhheehhe'és, iri ó', “Atén birta gús, ti meer, atén a dahamaá awaán baraá daqtá baynuuqá'.” 32Gari báy, “Tlawsé'.” Tari ti'iít, tari dahamaá áy baraá baynuudá'. Naxés daqtá baynuudá' sleémeero iri /e/eetiín ar gaanslaay ay baraá tlawi, iri baraá ma'áy qátl. 33Ala de'eamuusér baynuudá' iri ta'aiín, tari tláy ay baraá gixsa. Iidíguudá' sleémeero kuri alki/iít, nee iidíguú neetlaameedá' sleeme. 34Múk gixsadá' tindiri ti'iít as Yesu nguwa artá ay. Nee qoomár kuwa ár, kuri harhheehhe'eés iwa quutli baraá ayaaine.


Copyrighted Material
Learn More

will be added

X\