MATAYO 25

1“Qoomaadae waawuti'iimár doori slaqsaywós a adór dasú mibaangw oo taa'aduuín gaa oh, tari tláy as heé duuxuuxuúm kuwa al'awér ay. 2Dasú kooán a daktana, nee oo kooán a fuquruuse. 3Kuduú daktana taa'aduuín ngiri taataahhiyé', ala di/i ngaa huuwi'iiká. 4Ala kudá' fuquruuse di/i ngi koná' baraá xooslar'ine dinkwa nee taa'aduuín. 5Heedá' duuxuuxuúm niwa adaá/, sleémeero tari gufmiís, tari guú'. 6“Qoomár dakiingo naxés gaa tsimaahhi, ‘Xaysé', heedá' duuxuuxuúm hanoos, tlawsé' ti'iité', al'awaak.’ 7Dasú aáng iri tláy sleémeero ar gaanslaay, taa'aduuín kiri amohhe'eés. 8Kudá' daktana kudá' fuquruuse ngiri bayé', ‘Di/itá niinawe ti qeere', asma taa'aduurén i gwagwa'aná' as di/i iwa fák.’ 9Ala kudá' fuquruuse tari oó', ‘Aasla'áy, di/tí atén nee kuungane ti bu'uká. A tsiní bara tlaxwtá eeré' dír mukdá' di/itá weerimiís.’ 10Inooín tawa tláy, tawa di/itá tlaxór áy, heedá' duuxuuxuúm nay hardáh. Nee kudá' taa amohhe'eesiye' nee inós tari al dáh baraá duuxór i alé. Piindo kari qaás. 11“Aluuwo dasuduú hatlá' nay hardáh tari oó', ‘Aáko, Aáko, do' duuxeek.’ 12Giri i ilawaáts giri báy, ‘A ló', án a kah, án kuungá' nu xuaaká.’ ” 13Naagáy Yesu iri oó', “Dalaaé', asma deelo a xua'aaká laqaá siiwa.” 14“Slaqsaywós a adór heé aa'aá káw. Lawaaleerós gari ateét, daqaari'iimarós gari saayín dabaá lawaaleedí alé. 15Gari qasmiís ar har qoomoó aleesleemuú umuúqo heewo. Oo wák guri talaántár kooán i haniís, nee oo tsár guri talaántár tsár i haniís, nee kuduú tám guri talaántár wák i haniís, iri aa'aá káy. (Talaánta gídaabárós a peesmooko taa tleéhh ar miislír tlaxo ur ló'wa ale.) 16Kudá' taa talaántár kooán i haniís, iri tláy hamtidár kilá', gari ar halaanuús, talaántár kooán ar hatlá' gari sláy. 17Tam kudaáduú talaántár tsár gaa slay, inós sleeme gari ar halaanuús, talaántár tsár ar hatlá' gari sláy. 18Ala kudaáduú talaántár wák gaa slay, iri tláy, bohoongw guri foól, peésár aakoowós gari tiíp baraadí alé. 19“Deelór yaariir iwa waaráhh, aakoó lawaaleedá' niri waátl, faaro kari altleéhh nee lawaaleedá'. 20Kuduú talaántár kooán gaa slay niri hardáh, talaántár kooán ar hatlá' ngiri huúw, iri oó', ‘Aáko, kuúng talaántár kooán ngina hanís. Qaytsiít, talaántár kooán ar hatlá' ngaa sláw baraá halaanu'uumaro.’ 21Aakoowós iri oó', ‘I qoón, kuúng a lawaalmoó hhoó' nee oo inkihhimuún koóm baraá tidá' niina tuy saayini. Án kuúng u muruú yaariír i saayiím daxta. Qwál daháng baraá qwal/uueé'.’ 22“Kudaáduú talaántár tsár gaa slay niri hardáh, iri oó', ‘Aáko, kuúng talaántár tsár ngina dir'eén i hanís. Qaytsiít, talaántár tsár ar hatlá' ngaa sláw baraá halaanu'uumaro.’ 23Aakoowós iri oó', ‘I qoón, kuúng a lawaalmoó hhoó' nee oo inkihhimuú koóm. Kuúng a inkihhimuú koón baraá tidá' niina tuy saayini. Án kuúng u muruú yaariír i saayiím daxta. Qwál daháng baraá qwal/uueé'.’ 24“Kuduú talaántár wák gaa slay niri hardáh sleeme, iri oó', ‘Aáko, án kuúng u xuú' adór tar /akusmo. A bu'uún didaádá' gár taa dahás iwa kahh, nee an burumburiín didaádá' gár taa intlát iwa kahh. 25Aníng ana da'ayuút, talaántarók ngiri yaamí foól. Areek, talaántarók tidá' ooheek.’ 26“Aakoowós iri oó', ‘Kuúng a lawaalmoó tlaákw nee oo tli/usmo. Kuúng bar xú' gídaabá aníng a bu'uúm didaádá' gaa ngiwa dahaasiiká, nee a burumburiím didaádá' gaa ngay intlahiiká, 27kuúng gár uwa hariím geeraawo a peésar'eé' an ar halaanús, as án binda kií/, peésar'eé' ngiwa slaw, dinkwa nee slaasláwarose.’ 28Iri oó', ‘Talaántasíng i kon hayoohaak, hanisaak dír heeqá' oo talaántár mibángw koóm. 29Asma umuúqo heewo oo gár koóm, ka haniis, nee kari dooga hhe'ees. Ala kudá' oo gár koomaaká, tam tidá' niina i kon ka hayoh. 30Nee lawaalmooduú gídaabár koomaaká amór saaw ti i kwahhe', baraá giwtír tsee/a. Didaádá' an dír tawa /aa/amin nee sihhina' kiwa qirirtliimisi.’ ” 31“Garmoó Hee ni hardah ar baraá xirfuuwós nee malayke sleémeero tidá' hhohho' dinkwa nee inós. Qoomaadae iri iwiit gawaá kitaangós kuduú xirfuú koóm, 32nee xoordu sleémeero giri burumbuur dír geeraawós i alé, giri partliit adór de'eamusmo bee/aangw nee aara ngir partlatliti. 33Bee/aangw guri qaas amór dakós oo doó /iyáy. Nee aara giri qaas amór dakós oo doó basáy. 34“Waawutmo iri ooi dír mukduú dákw doó /iyáy, ‘Qwalaasé', kuungaásingá' awa taa tsuúq nee Baabuúeé'. Waawuti'iima aalaak, tidá' taa qaroó amohhe'eés kuungá' wa ale, iimír tlehhmuú yaamu. 35Asma qoomár án niwa qwariit, kuungá' iga /aymisé'. Qoomár án niwa waxiit, iga wahasé'. Qoomár án tawa dahaaymo, iga dahi'isé'. 36Qoomár án tawa /aankwets, iga tsiitisé'. Qoomár niwa tiiq, iga neetleesi eeré'. Nee qoomár tiwa tseék, iga artá eeré'.’ 37“Mukduú gan'amuú koóm tari ooi, ‘Aáko, ahaá a xaylá kuúng tawa qwarit, uri /aymiisaán? Laqaá tawa waxit uri wahaasaán? 38Slám a xaylá uwa araán tawa dahaaymo, uri dahi'isaán? Laqaá tawa /aankwets uri tsiitisaán? 39Nee a xaylá uwa araán tawa tiq, uri neetleesi awaan, laqaá tawa baraá doó tseegamo, uri artá awaán?’ 40Nee waawutmo iri ooi, ‘Án a kah, umuúqo gaaro ar taa tlehhé' dír oo wák baraá hhaee'eé' kudá' ninakwe, a ngina aníng i tlehhé'.’ 41“Aluuwo mukdá' dákw doó basáy i dirií' guri báy, ‘Quutlé' dir'eene, kuungaásingá' tunda lu'ús, tlawsé' baraá asltá baloó gwaa'aaká, tidá' taa amohhe'eés as Neetlaangw nee malaykeerós. 42Asma qoomár án niwa qwariit, iga /aymisi'iiká. Nee qoomár niwa waxiit, iga wahasi'iiká. 43Qoomár tawa dahaaymo, iga dahi'isi'iiká. Nee qoomár tawa /aankwets, iga tsiitisi'iiká. Qoomár niwa tiiq, iga neetleesi eeri'iiká, nee qoomár niwa baraá doó tseegamo, iga artá eeri'iiká.’ 44“Mukdá' sleeme iri ooi, ‘Ahaá Aáko, a xaylá atén kuúng uwa araán tawa qwarit, laqaá tawa waxit, laqaá tawa dahaaymo, laqaá tawa /aankwets, laqaá tawa tiq, laqaá tawa baraá doó tseegamo, ar uwa sagadiyusaniiká?’ 45Inós iri ooi, ‘Án a kah, umuúqo gaaro ar taa tlehhi'iiká dír oo wák baraá hhaee'eé' kuká' ninakwe, a ngina aníng i tlehhi'iiká.’ 46Nee kukaáká' niri tlayá', niri dahamaá ayá' baraá sakwasleemár alhhe'eesay wasl. Ala mukdá' ganaá' tan dahamaá áy baraá slafíngw alhhe'eesay wásl.”

will be added

X\