MATAYO 16

1Múk Farisayo nee múk Sadukayo Yesu kuri i daqáy as kuwa iiari, kuri firín laya ngiwa laqan ar gawaá dooraá daahh. 2Yesu giri báy, “Looa bir darát, kuungá' a kata', ‘Matlo, doori ki /awaak, asma doori kiwa daa/aát.’ 3Looa binda tleér a kata', ‘Laarí tluwaay i tluuw, asma doori ki daa/aat, slám i hunkoó koná'.’ Kuungá' a hhaahhafuuse. Afaá doori tsatsahhaango i aleesleerá', ala layár de'emuuká' tsatsahhaango mas aleesleera'aaká. 4Qartá tlakw nee ar tsaatuuse i layár leelehhít. Ala layár ta slay i káhh, aqo har layár Yona kilós.” Giri geexáy iri quútl. 5Eeharuuse iri tleér iri waaráhh ay gayuuqá'. Mikaáte kari gunqaareés huwto. 6Yesu iri oó', “Qaytsité', ti harmagahhe' nee gadá' mikaáte ir sluufaasluf ar múk Farisayo nee múk Sadukayo.” 7Eeharuuseedá' iri kilooín tlánk tari káh, “Gár adoorí ngisa oó' asma adoodá' mikaáte ngiwa gunqareesaán.” 8Ala Yesu inslaway'ín guri tsaáhh giri báy, “Ahaá, ma kiloohúng tlankusá', kuungá' awa haratlintaaór niina. Asma adoosíng mikaáte kawa koonda'aakáhe? 9Aga tsahhi'iikáhe tam hamí? Slám a insleera'aakáhe mikaáteedá' kooán, tidá' múk kumér kooán aa /aáy, katatoó taa hatsisé' a magá'? 10Nee slám mikaáteedá' faanqw, tidá' múk kumér tsiyáhh aa /aáy, katatoó urén taa hatsisé' a magá'? 11Ala mas insleera'aaká ar gídaabá gár adoorí án ngisa oó' a mikaáteerooká. Ala ti harmagahhe' nee gadá' mikaáte ir sluufaasluf ar múk Farisayo nee múk Sadukayo.” 12Nee qoomaadae eeharuuse gari sangw tsáhh ar gídaabá, gaa ádbayká tiwa harmagahhiya' nee gadaádár mikaáte ir sluufaasluf, ala gina adoodá' báy as tiwa harmagaahhiya' nee intsaahhatimisuú múk Farisayo nee múk Sadukayo. 13Yesu iri tláy amór yaamaá Kaisaria Filipi. Eeharuuseerós gari yaahaás gari báy, “Muu gár i kaahi a milá daanduú Garmoó Heewo, inós a heemá?” 14Eeharuuse iri ó', “Ta kaahi kuúng a Yohanudá' Baatimaamiís. Bahh'alé ta kaahi a Eliya, nee bahh'alé ta kaahi a Yeremia, laqaá aarusmoó wák baraá aaruuseedár aange.” 15Yesu iri oó', “Ala kuungá' ma kata' daanduueene, aníng a heemá?” 16Simoni Petro iri oó', “Kuúng a Kristo, Garmoó Mungú kudá' slaáf.” 17Yesu iri oó', “Simóni, garmoó Yona, kuúng a heé amohhoó', asma kaangwi heé ngwa dirók i xu'utis i kaahh, ala aqo Baabuúeé' kuduú gawaá doorí dirií'. 18Ala aníng kuúng u baw, kuúng a Petro, gidaabárós a tlaa/a. Gawaá tlaa/arihe aníng mukdá' aníng iga haratlintii' u gawdeemiís. Tam gwa'ara sleeme muk'eé' kwí gu aleesleeraaká arba/ato. 19Nee aníng gweermór waawuti'iimár doori ngi haniís dirók i alé. Nee umuúqo gaaro ar kuúng ta tsek baraaká' yaamuuwo, gawaá dooriiwo sleeme kaa tseék. Slám umuúqo gaaro ar kuúng ta gwet baraaká' yaamuuwo, gawaá dooriiwo sleeme kaa gweér.” 20Siiwadár kilae eeharuuseeros gari hara'ayín ló'wa ale gari báy, “Kaangwí mu hee bawaara' gidaabá án tawa Kristo.” 21Iimír qoomaadae Yesu eeharuuseerós gurbu'uungo gari iimu/ún gídaabá, “Aníng gár tiwa hariím an Yerusalemúr káw, nee slahhe'eemisuú yaariír nguri sláw dir bariisér wa ale, nee geeraharuusér uren ar saalíngw múk Yahudi nee intsaahhatuusér hara'ayár Musa, nee tiri gaas. Ala bál tame niri waaslee/.” 22Yesu kurir bihhí suruúk nee Petro kuri iigahhaát, kuri báy, “Aasla'áy Aako, tisíng kuung muwa ar sleér.” 23Yesu iri warqáy amór Petro, iri oó', “ Quútl dir'eene Kuúng a Neetlaangw. Kuúng a dukutsmo dir'eene. Asma inslawoó kuúng ta inslasleer oo Munguheeká ala a oo Neetlaangw.” 24Qoomaadár kilae Yesu eeharuuseerós gari báy, “Umuuqo heewo oo aníng i eehartá wa slaá' gar kuwa hariím a sla'aarirós gan gunqarees, nee msalaábarós gari gagaar, aníng iri eehaar. 25Asma heé slafiingós gu ba/amisár wa slaá', gun qwaarees. Nee heé slafiingós qwaareesaro gwa ya/an as aníng, a gun ba/amis. 26Ala hee yaamu sleémeero tim ngi slaya, gár i bu'uya' a milá, bar slafiingós oo amór Mungú aa qwaár? Laqaá hee gár i duuxi a umós ar slafiingós ngur ki/isi? 27Asma Garmoó Hee i hardah ar baraá xirfuú Baabuúwós dinkwa nee malaykeerós. Qoomaadá' an qoomár umuú heewo nguwa bui ar qoomoó tlehhemi'iiwós. 28Án a kah, muu i deer baraá tla/ángw mukwí sihhimiita, oo gwa'ara ga baloó araaká, ay dír Garmoó Hee kway ari birna hardáh ar baraá waawuti'iimarós.”

will be added

X\