MARKO 5

1Tari hardáh gayuú tlawi baraá yaamaá múk Gerasi. 2Hamtidár kilae niwa gawaá miringamoó wa aweér, tina doogiyé' nee heeko neetlaame aa eér, i amór /aantaá daahh, 3asma inós amoodár /aantu gan hootaatín. Tam heé ila/aro gwa aleeslay i kaahh, tam tseegamooro. Tam qutúr sleeme ila/aro guna harslaaqaát. 4Asma daqtá yaarire ku tseegaagiit ar qutúr daba' nee ya'aawo, ala gun tlaqaqaat. Tam heé /uuruuwo gwa aleeslay i kaahh. 5Nee deelo slémeero xweera nee tlaatla/aango amoodár /aantu gin wa iwaawiit, nee gawaá tlom'i. Nee slám in tseeamaamín nee tin tlaaqaaqán ar tlaa/e. 6Heedaádá' Yesu nguwa amorqá' saáw i ár, guna i ta'aín, guri i tumbarara'aát, 7iri tseé' ar afór ur i kaahi, “Yésu, Garmoó Mungú Gawa, án nee kuúng a milá? Un firiím ar umuú Mungú, mi slahhe'eemisaar.” 8Asma geeraawo Yesu neetlaame gana báy, “Kuungá' neetlaáme, dír heesíng geexawaak.” 9Yesu guri yaahaás, “Umuuwók a heemá?” Iri oó', “Umuueé' a Daqa, asma atén ti yaariír.” 10Heeduú neetlaamér koóm Yesu guri ló'wa harhheehhe'eemiís, asma neetlaameedá' mingiwa huúw baraá ayaá hatlá'. 11Nee daqtá ur ar baynu i deer didaádae ar ta de'en bihhaá tloomár wa ale. 12Neetlaameedá' Yesu guna harhheehhe'eemís guri beér, “Atén ti hup amór baynu asma kiwa awaan.” 13Yesu iri ya/án. Neetlaameedaádá' heedaádá' guna geexeér, baynu giri eér. Daqtadár baynu sleémeero iri /ét ar ti'iingw baráy alé, iri /ét baraá tlawi. Daqtadá' iri baraadí qátl, faaroorós a kume tsár. 14De'eamuusér baynu iri góp, iidíguudá' guri alki/ít baraá gixsár wa ale nee inslaawaydae. Muu niri ti'iít kawa ari gadá' aa tleehharut. 15Tari daqáy amór Yesú i alé, heedaádá' geeraawo neetlaamér koóm kuri ár, aa iwiít, i tlabaawós kón, nee fuquraangose. Inós an kudaádá' geeraawo daqtadá' koóm. Tari da'ayuút. 16Nee mukdaáduú tlehhemi'iidaádá' gaa geerí ar, kari alki/iít gár heedaádá' neetlaamér koóm gwa eer geeraawo, nee iidíguú baynu. 17Yesu kuri firín iwa quutli didár ayaaine. 18Qoomaadá' inós iwa tsa/a/an gawaá miringamoó i alé, heedaáduú geeraawo neetlaamér koóm guri firín as tiwa kona' nee inós. 19Ala Yesu gwa ya/aniká nee inós tiwa kona'. Guri báy, “Tláw amór doohúng nee amór mukók, gár afhhamít ar Aako naa kuúng i tleéhh alki/iiteek dir'ín i alé, nee adór inós ura gurtláy.” 20Iri tláy baraá yaamaá Gixsadaá Mibaangw, muruudá' slahhaá' oo Yesu aa inós i tleéhh guri iimu/ún alki/ituuwo. Muu sleémeero guri waa/oo/amór wa ár. 21Qoomár Yesu niwa gayuuqá' wa kií/ ar miringamo, múk yaariír guna i barumburiít qoomár iwa afaá tlawtí dirii'i. 22Heeko úr oo doó saaliingw guri didí áy. Umuuwós a Yairo. Inós Yesu nguwa ár, iri tumbarara'aát dír ya'aawós i alé, 23guri ló'wa firín iri oó', “Dasir'eé' tooka niina i afkuú bohóngw i dirí'. Xa qwaláng, dakók i qaaseek, i hungu/, miwa gwá'.” 24Tiri koné' nee inós. Mukdá' yaariír guri eehaár ar tliqa. 25Nee /ameenirka i deer ar tiqaaqiim kureeri mibá nee tsár ar tiqtír ubíngw tseerdu. 26Slahhe'emisuú yaariír gwa slaasleér ar dabaá qwaslaarér yaariir. Muruuwós sleémeero iri faák, sleeme aa gaa buiiká, aqo har tiqtirós gana albúhh. 27- 28Iidíguú Yesu nguwa axás, iri baraá tla/ángw múk ar ót ay alaá Yesu, iri baraá muunaáwós i ó', “Inqwaarirós kilós bara sangw kwatiít, a hunguú/.” Inqwaarirós gari kwatít. 29Hamtidár kilae tseerduuwós nay qawiyé', gari kilós tsáhh baraá slaqwtose gídaabá aa hungú/. 30Hamtidár kilae Yesu gari tsaáhh gídaabá /uuruuwós oo hungu/umis i gadiyuus dír heekó wa ale. Iri amór múk i warqáy iri oó', “Heé inqwaarir'eé' gaa kwatiit a heemá?” 31Eeharuuseerós guri beér, “Múk yaariír adór ur tliqiít u qa/eerakáhe? Kuúng mas malé yaahamís gídaabá, ‘Heé án iga kwatiit a heemá?’ ” 32Iri qaytsiít bihhe sleémeero, asma heé adoodá' gaa tleehh nguwa artá wa slai. 33/Ameenír aáng iri daaraxát daeero, asma gaa xú' gár ga wa tleehharut, iri hardát amór Yesu, iri dír ya'aawós i tumbarara'át, looeema sleémeero giri dirós i alki/ít. 34Yesu gari báy, “Dasir'eé', haratlintaaoorók kiíng iga hungu/ús, tláw ar wayda, adoosíng tara hungú/ koomeek.” 35Iwa baraá axweesantadí kahhi, mukko nina hardáh, i amór doó heedaádá' úr oo doó saalíngw daahh, ta kaahi, “Dasirók aa gwá', gár Intsaahhatusmo kus malé daawitimiisaan daxta i káhh.” 36Yesu axweesantadá' ngiwa axaás kawa axweesi, heé úr oo doó saaliingw guri báy, “Ma da'ayumiitar, án haratlintiáng.” 37Tam heé aa ya/án i kaahh oo nee inós ti koomá', a har Petro nee Yakobo nee Yohana, hhiyoó Yakobo. 38Tari hardáh dír doó heedaádá' úr oo doó saaliingw. Yesu múk yaariír guri ár oo aa amoqwaar. Inooín ta /aa/amín nee ta tsuunquumiis ló'wa ale. 39Iwa baraá doó i dáh, gina báy, “Masa amoqwadé'? Nee mas /aa/amiindá'? Dasi aa gwaiká, in gú'.” 40Kuri wa qaseesén ló'wa ale. Inós mukduú hatlá' nguwa hhe'eés tsee/áy duuxaro, baabuú dasiidaádá' nee aayír'ín ginara tláy, nee mukdá' nee inós ti koomá', tari dáh amoodár dasi i diri'. 41Dasiidá' gari dawa óh, gari báy, “Talita kum,” gídaabárós, “Dási, án a kah tláw.” 42Dasi iri sihhít, iri hii'imít, asma a dasír kureeraá mibá nee tsár gaa eer. Adoodá' kari waa/oo/amór úr wa ár. 43Giri hara'ayín ló'wa ale gídaabá, “Kaangwí mu dír heé i ooara'.” Giri báy, “Dasi muruú /aymár i haniisaak.”

will be added

X\