MARKO 16

1Deelór hungu/uma iwa waaráhh, Mariamu Magdalene nee Salome nee Mariamu aayór Yakobo mooyaangw kuna tlaáxw oo slaqwtá Yesu kar sliki. 2Matlatleero bál deelór geera ar wiiki tari amór /aantár káy qoomár looa niwa tsiiríhh. 3Loohiro ta axwees kilooín ale ta kaahi, “Heé tlaa/adár gawaá afkwá baa'a ga gwangwaraá' a heemá?” 4Tawa qaytsiít, kana ár naxés tlaa/adá' kaa gwangwaraá', nee inós ka ló'wa yangaariir. 5Tari dáh baraá baa'ár i alé, masoomoó inqwaarír /awaák koóm kuri ár, aa iwiít bihhaá doó /iyáy alé, tari waa/oó/. 6Inós giri báy, “Ma waa/oo/amimara'. Heé ta leelehhita' a Yesú Nasareti, kudá' taa gawaá msalaábár i kikií'. Aa waasleé/. Diirihe i kaahh. Ga/aawaak, didá' geeraawo kway qaás a diirí. 7Ala tlawsé', Petro ádbawaak, nee eeharuuse sleémeero, gídaabá, ‘Aa geerí tláy Galilayár i alé. Amorqae u aandá' adoodá' ngira geerí oó'.’ ” 8Tari tsee/áy ti'iít, tari ta'aín dír /aantaro, asma daaraxaay gina áy nee waa/oo/amo. Taa sangw heé i ilawatsiiká asma taa da'ayuút. [ 9Inós iwa waasleé/ matlatlér bál deelór geera ar wiikiro, heé aa geerí harati'iít a Mariamu Magdalene, tidár aáng neetlaamér faanqw ngiwa hingeés. 10Inós mukdá' geeraawo nee Yesu dinkwa guri ádbeemuú eér. Inooín qoomaadae ta kumiit tsuunqumisuuwo nee /aa/ee. 11Inooín kawa axaás gídaabá Yesu i slaaf, nee ar gídaabá inós ngwa aán, taa ya/aniká. 12Alaá tihe múk tsár guri harati'iít baraaine ar slaqsoó dimbé. Inooín qoomaadae ta loohír i dirii' ta aykwí waatl. 13Nee kuká' nay tlayé', iidík kuri haniís amór kudá' hatlá'. Ala naa malé ya/ani'iiká. 14Alhhe'eesaywo eeharuuseedá' mibá nee wak giri harati'iít qoomár tawa /ayin. Giri i gilín asma haratlintaaoowasler'ín nee munér gawden, asma inooín axweesantá mukdá' inós gwa ar, alaá inós niwa baraá /aantár wa waasleé/, kaa haratlintii'iiká. 15Giri báy, “Tlawsé' baraá yaamu sleémeero, Ya/abtór hho' alki/iitaak dír muu sleémeero. 16Oo gaa haratlintatii' kway baatiís ba/ama ga sláy. Oo gaa haratlinti'iiká ku sakwasleemuut. 17Nee layuuká' ti koná' nee mukdá' gaa haratlintii': Neetlaame ka hingeemiis ar /uuruueé', ta axwees ar tsifrír /aben, 18dayshe tamka ohín, laqaá gár tsu/uut barka wáh, gár gi aw i káhh tam ar niiná. Dabaaín birka gawaá tiqtuusér i qaás, ta hunguu/.” 19Aako Yesu inooín i axweesanto iwa hhe'eés, kurira tláy gawaá doori, iri iwiít dákw doó /iyáy oo Mungú. 20Inooínadá' tari tláy, Ya/abtór hho' kari alki/iít umuúqo diiro. Aako nee inooín tay al gadiyuús, /uuruú axweesantós guri geehhoo'otís ar layaá naa tleehharumiitiye' qoomaadae.]

will be added

X\