MARKO 15

1Looa niwa tleér matlatleero hamtidae geeraharuusér uren ar saalíngw múk Yahudi kwasleema kari tleéhh nee bariisee, nee intsaahhatuusér hara'ayár Musa, nee mukdaáduú kwasleemár wa hariím sleémeero oo kwasleemár ur. Yesu kuri tseék, kuri huúw, kway dabaá Pilató i qaás. 2Pilato guri yaahaás, “Kuúng a Waawutmoó múk Yahudíro?” Inós guri báy, “A adoosíng ta kat.” 3Geeraharuusér uren ar saalíngw múk Yahudi ngwa sakwasleemuutiyé' muruú yaarire. 4Pilato guri malé yaahaás, “Mas ilawatsaká? Muruú yaariír oo tuwa sakwasleemuuti u ga/eéraáke?” 5Ala Yesu aa malé ilawatsiiká. Tam Pilato gay waa/oo/amór wa ár. 6Umuúqo deelór ur ar Pasákuwo heé wák baraá múk taa tsegiiti kun gweer, kudá' muu i gweerár wa slai. 7Heeko ta bay Baraba kuna tseék dinkwa nee múk hatlá', asma tana slaáqw asma axweesantá serikáli kawa sií', muu kuri tsuú/. 8Boo/oó muu niri hardáh dír Pilato, kari iimu/ún kawa firin ngiwa tleehhi adoodá' aa intsaáhh. 9Pilato iri ilawaáts iri oó', “Xáy, a sla'á'a Waawutmoó múk Yahudi nguwa gweer?” 10Asma inós gana geerí xuú' gídaabá geeraharuusér uren ar saalíngw múk Yahudi kuna huúw amoodí alé asma da/itá tawór wa ale. 11Ala geeraharuusér uren ar saalíngw múk Yahudi boo/oó muu gway fuqunáy qás gídaabá Baraba kungu gweeri. 12Pilato giri báy malé alé, “Ala kwí ta babeera' a Waawutmoó múk Yahudi adór ngu laaq?” 13Tari tseé' ta kaahi, “Kikiieek gawaá msalaába.” 14Pilato ngiwa yaahaás gídaabá, “Gár aa tlakweés a milá?” tari kumiít tseeoro ló'wa ale gídaabá, “Kikiieek gawaá msalaába.” 15Pilato Baraba guri gweér, asma adoodá' muu i slai gana slaá' tleehhamooro. Yesu kuri muúx ar qaw'i, guri haniís kuwa kikii'i gawaá msalaábár i alé. 16Askaári guri húp ay baraá boómár ur. Askaári sleémeero kari didí burumbuúr. 17Kuri tsiitiís ar inqwaarír siira/aat, slamángw laqaya' kuri tlaatlaáw kuri qaás gawaá sagós. 18Kuri taaqweemiís ta kaahi, “Laawaay, Waawutmoó múk Yahudi.” 19Kuri saga muúx ar daa'a, kuri i tsuuqún ta geeraawós i tumbarara'amiít, as ilaiwa/amer'ín kawa laqaqan ar niqaay. 20Niqaywo kuwa hhe'eés, inqwaarirós tidá' siira/aat kari hingeés, kuri tlabaawós i ki/ís. Kuri tsee/áy huúw as kuwa kikiiár ay gawaá msalaábár i alé. 21Loohiro heeko wák oo baraá gixsár káw kuna /uurutís as msalaabár Yesu ngiwa gagaari. Umuuwós a Simonú ayaá Kirene, baabuúín Iskanda nee Rufo. 22Yesu kuri huúw ay dirka ta babay Golgota, gídaabárós a “Fartá saga”. 23Muruuko wahaangw oo taa garka ta bay manemánér i qaás, kuna mak haniís nguwa wahi, ala guri sií'. 24Kuri gawaá msalaábár i kikií'. Inqwaruuwós kuri qasmiís ar loohír adór mugú', as gídaabá umuúqo heewo gár i slay a umós. 25Kuwa kikií' a looár tám. 26Gadá' kusa sakwasleemuút kaa didí gooín ar /aymi'iiká', “Waawutmoó múk Yahudi.” 27Malguusér tsár nee inós kina alkikií' gawaá msalaabadu, kookoo dakós oo doó /iyáy, kuqá' dákw doó basáy. [ 28Gooi iri bó/, tidá' kah, “Kuna tla/ángw tlakuusér i harafaár.”] 29Múk yaamuudae waraáhh Yesu guri tloqomiís, ta hara sager'ín muumukuumiis, ta kaahi, “Aháee, kuúngudá' oo Doó Mungú gu feé/, kway tléhh baraá deelo tám i alé, 30kár ti /is gimáy, ti aweeris gawaá msalaábaro.” 31Geeraharuusér uren ar saalíngw múk Yahudi sleeme kuna niqín, inooín dinkwa nee intsaahhatuusér hara'ayár Musa, ta kaahi, “Awa hatlá' gina /iimiís, ga/aaweek, kilós /iisaro ti aleeslayká. 32Kristo, Waawutmoó múk Israeli, daxta ni aweeri gawaá msalaábaro, atén ku araán, daqaní u haratlintiaán.” Tam mukdá' nee inós taa alkikií' sleeme inooín kuri tloqomiís. 33Looár lahhoó' iwa xeér, iimi iri gíp yaamu sleémeero ay looár gwaleél. 34Looár gwaleele Yesu iri tseé' ar afór ur, “Eloi, Eloi, laama sabaktani”, gídaabárós a “Mungúeé', Mungúeé', misa meér?” 35Múk dír iisaapaydá' wa axamiís iri oó', “Ga/aawaagáy, i Eliyá ateetín.” 36Heeko wák niri amorqá' wa ta'aín, warqamooko guri tikiís ar ma'aá qarqará' awa taa tsoó/ baraá na/'aá xaaí wa ale, guri siíhh gawaá afkwá daai, Yesu guri wahaás ar warqamoodá' i kaahi, “Mawaagáy, daxta a araán, Eliya gu aweeriísi?” 37Yesu iri tseé' ar afór ur, iri gwaá'. 38Inqwaarír baraá Doó Mungú, ar do' gwa qasis, iri tla/a feehhít gawtá wa ale ay baraay. 39Geeraharusmoó askaári, kudá' inós gura qon aa geeraawós i sihhiit, adoodá' ira gwaá' ngiwa ár, iri oó', “Ar ló' heewí a tsuwá Garmoó Mungú.” 40/Ameenarka amorqá' saáw wa xuumiis i deer. A ín Mariamu Magdalene nee Mariamu aayor'ín Yakobodá' niiná nee Yose, nee tooka a Salome. 41Kuká' an kudá' nee inós ti komkakoomá' Galilayaro, nee ngu alee/iimamisá'. Nee /ameenár hatlá' ar yaariir i deer, tidá' nee inós naa al Yerusalemú i tsa/ane'. 42Baldá' a deelór tiwa amohhe'eemisiya', asma loaytleérós a deelór hungu/uma. Qoomár tsiindowo. 43Yoséfú Arimatayár daáhh nina hardáh. Inós a heé ilaiwa/amér koóm oo doó kwasleema, nee inós sleeme i waawuti'iimár Mungú daamaarán. Inós guruuwós guna gawdeés iri dáh ay amór Pilato, slaqwtá Yesu gari firín. 44Ala Pilato gari waa/oo/amór wa ár asma iwa tseewa gwaá', geeraharusmoó askaári guri ateét, gway yaahaás iri oó', “Aaqo gwaái?” 45Geeraharusmoó askaári iwa oó', “Aa gwaá'”, Pilato iri ya/án slaqwtá Yesu ngiwa haniisi. 46Yosefu inqwaarír /awaak gari tlaáxw, guri gawaá msalaábár wa aweeriís, guri untsuús ar inqwaaridá', guri qaás baraá baa'ár taa foól gawaá tlaa/a. Tlaa/ár hatlá' gari gwangwaraá' gari afkuú baa'ár ar tuntuúk. 47Ín Mariamu Magdalene nee Mariamu aayór Yose didá' Yesu kway qaás kari xuuxuú'.

will be added

X\