MARKO 12

1Iri dir'ín i axweés ar slaqsi'i, iri oó', “Heeko xaaikaari ta babay misabiíbu gina dahaás, giri yaáw. Bohoongw guri foól oo ma'aá na/'aá xaaidá' ngiwa tsoo/iti. /Aampár xuuma gari tleéhh. Qaymoorós gari dír múk i saayín, kay al'axweés gídaabá bu'uungw ku qasmiis. Inós iri aa'aá káy. 2Qoomár bu'uungw iwa xeér, lawaalmoowós guri ya/aáw amór mukdá' aa qaymór i saayín, asma hariímár heedaádá' qaymo loó' kawa haniisi. 3Kuri óh, kuri muúx, kwa gaár i haniisiiká, kuri guús. 4Lawaalmoowós oo hatlá' guri malé ya/aáw amor'ín i alé. Kwí kway saga tliqiís kway murekeemiís, kway baramaanuús. 5Lawaalmoó hatlá' guri ya/aáw. Kwí kway gaás. Nee awa hatlá' awa yaariir bahh'ale kina muúx, bahh'ale kina tsuú/. 6Garmaawós kuduú sla'aarusmo an heé aa meet, nee kwí sleeme alhhe'eesaywo gway ya/aáw, i kaahi, ‘Inós ku ilaiwaa/ asma tawa garmaaeé'.’ 7Ala mukdá' taa qaymór i saayín tari axweés ta kaahi, ‘Kwí an aalusmo, gaasare', aali daqaní a toorén.’ 8Kuri óh, kuri gaás, kuri tsee/áy kwaáhh baraá qaymór misabiíbuuwo. 9“Xáy daxta, adór i laqi heeduú qaymór misabiíbu ka loó'? Inós in hardah, mukdá' aa qaymór i saayín nguwa tsu/i, qaymoodár misabiíbu gari múk hatlá' i saayín. 10Tam gooirí aga soomuusi'iiká, xáy? Tí kah gídaabá, ‘Tlaa/adá' qwatsiiruuse aa sí', aa tlaa/ár ur tleehhít ar do' ira gawdúy. 11Axweesantí amór i dahh a amór Aako, ala a waa/oo/amo diirene.’ ” 12Adoo kay leelehhiít ar kur oohi, asma kana tsaáhh gídaabá slaqsaydá' ira axweés, a inooín. Ala boo/aay kuna da'ayuút, kuri máy tari tláy. 13Múk Farisayo bahh'alé nee oo Herode kuri amoorós i ya/aáw as kuwa yaahamiisi ar iiara, as kuwa oohár wa slai. 14Tawa dirós i hardáh, kuri báy, “Intsaahhatusúmo, a xuaán gídaabá kuúng a heé ló', tam kángw uroó hee u yaahamisaká, tam hhohhoartós, ala loohír Mungú adoodá' ir gana' tinar intsaahhatimís. Xáy, i ganá'a waawutmoó múk Rumi kuwa koódír i hanisaan, laqaá i gan'aká? 15A hanisána, laqaá a hanisanaaká?” Nee inós hhaahhafingw'ín nguwa tsaáhh, giri báy, “Ahaá a milá, mihar iiara'adá'? Peesmo huware', án u ár.” 16Kunguri huúw. Giri báy, “Slaqsaywí oo gawaaká' nee gooirihe awa heemá?” Tari oó', “Awa waawutmoó múk Rumi.” 17Yesu giri báy, “Ar waawutmoó múk Rumi amoorós ti hanise', nee ar Mungú amór Mungú ti hanise'.” Kuri ló'wa waa/oó/. 18Mukduú Sadukayo káh, waasle/ i kaahh, kuna i daqáy kway yaahaás ta kaahi, 19“Intsaahhatusúmo, Musa ngina atén i gooín gídaabá, ‘Hee bira gwaá', harér aa geexáy bir na/oó koondaaká, hhiyaawós ngi aali, as doó hhiyaawós iwa tlay.’ 20Hhaeekaari faanqw i dayá'. Oo geera ina duuxún iri gwaá', na/oó aa geexáy i kaahh. 21Oo tsár hareedaádá' gari aál, iri gwaá' malé alé. Na/oó aa dír hareedí geexáy i kaahh. Oo tám aqo male adoodá'. 22Tam inooínadá' faanqw sleémeero hareedá' ngina aaliitiyé', ala aa laqwaliká. Alhhe'eesaywo hareedá' iri gwá'. 23Bál waasle/uuwo daxta a harér heemá? Asma inooínadá' faanqw sleémeero taa al hoót nee inós.” 24Yesu giri báy, “Aga qwadi'iikáhe adoosinge, asma tidá' taa gooín a xua'aaká, tam aleesleemuú Mungú sleeme u xua'aaká. 25Asma alaá waasle/uuwo muu a adór malaykér gawaá doori, slám duuxo i káhh. 26Gawaá daanduú iidíguú múk aa qaatl iwa waaslee/i aníng nu yaahaás, ‘Aga soomuusi'ikáhe baraá kitaábuú Musawo, didár iidíguú kitkintiro?’ Didae gár taa gooín a tí, Mungú Musa guna báy, ‘Aníng a Mungú Abrahamu nee Mungú Isaka nee Mungú Yakobo.’ 27Inós a Mungú tu'uwooká, ala a Mungú múk slaáf. Adoorihe kuungá' aga qwadé' ló'wa ale.” 28Heeko wák baraá intsaahhatuusér hara'ayár Musawo ina hardáh, giri axaás tawa kaangaanusi, gari tsaáhh gídaabá gina i ilawaáts ar adór ganaa'. Guri yaahaás, “Baraá hara'aya sleémeero ar ak afhhamít a gaalá?” 29Yesu guri báy, “Ar ak afhhamít a tí, ‘Iia qaasaak, múk Israeli, Aakoó Mungúrén, inós kilós an Aako. 30Nee kuúng Aakoó Mungúwók na slaeek ar muunaáwók sleémeero, nee ar qeeruuwók sleémeero, nee ar fuquraangók sleémeero, nee ar /uuruuwók sleémeero.’ 31Ar tsár ar slahhaa' a tí, ‘Inslaawmoowók slaeek adoodá' tir kilók sla'.’ Hara'ayár hatlá' ar afhhamít ar tí tsár ga baa/ i káhh.” 32Intsaahhatusmoodá' oo hara'ayár Musa guri báy, “A ló', Intsaahhatusúmo, tisíng taa ó' i ganá' gídaabá Mungú a wak, oo hatlá' i kaahh, aqo har inós. 33Nee hee inós nguwa slai ar muunaáwós sleémeero, nee ar fuquraangós sleémeero, nee ar /uuruuwós sleémeero, nee inslaawmoowós nguwa slai adoodá' inós tir kilós slai, adoorí in ganá' ta hikwaá adoodá' koomá' kiwa ilahhooár wa da/i, laqaá umuúqo ilahhooár hatlae.” 34Yesu ngiwa tsaáhh ar gídaabá guna i ilawaáts ar sagalooa, guri báy, “Kuúng tu ak saweeká dír waawuti'iimár Munguhe.” Aluudae heé gwa qiitl yaahasto i kaahh malé ale. 35Qoomaadae Yesu iwa intsaahhatimisi baraá Doó Mungú wa ale, ina ilawaáts iri oó', “Intsaahhatuusér hara'ayár Musa masta kaahi, Kristo kudá' taa qaás nee Mungú waawutmoó wa ale, a Garmoó Daudi. 36Daudi inósuú kilá' ina oó' ar aleesleemuú Qeeruú hhoohhoó', ‘Mungú Aakooeé' guna báy. Iwiít bihhaaeé' awa doó /iyáy tam ay dír wakuuseerók ngi baal, ay dír ngi gawaá dabaawók i qaas.’ 37Daudi inósuú kilá' gun Aakoowós ar ateetín. Daxta adór tar garmaawós?” Axweesantá Yesu boo/oó yaariír gana axamiís ar qwala/. 38Gár aa intsaahhatimís a tí, “Ti harmagahhe' nee intsaahhatuusér hara'ayár Musa, kudá' tlabaá tlet dahamisuuwo ngi sla'á' barta hi'iimiit, nee ngi sla'á' kiwa taaqwemisi dír boo/oó muu barkaa áy. 39Inooín kiteeraá geera ngi tsawdaditiyá' baraá doó saaliingo nee doó kiwa dahi'isi muruú /aymaaro. 40Slám malé alé muruú kwaeeli kun /aa/aay, nee firór yaariir kan firaarín ar hhaahhafiingw. Kudá' sakwasleemar'ín ka ur.” 41Inós iri iwiít dír bihhaá sandakmoó ilahhooa, adór ilahhooa ngir hanimisiya' gana ga/áy. Daqaarér yaariir peésár yaariir gana qamiín. 42/Ameenirka wák ar kwaalo'o, slám a narkuto'o, niwa hardát, sentír tsár gana qás, hariímarós a adór sentimoodá' niiná. 43Yesu eeharuuseerós gari ateét gari báy, “Án a kah, kwaalo'orqá' ar narkuto'o hariímár aa qás ka ur ló'wa ale mukquú hatlá' sleémeero ba/a, 44asma kuqá' sleémeero peésár taa qaás a tidá' aa harwarahh afer'ine, ala /ameenirí ar narkuto'o tidá' sleémeero i koon gana qás, tidá' geera ar muruú /aymaarós.”

will be added

X\