LUKA 4

1Yesu Qeeruú hhoohhooe i haats nay Yordanír wa kií/. Kuri huúw nee Qeeru baraá darma deelo mibeeri tsiyáhh, 2kuwa iiara'ari nee Neetlaangw. I /ayaayinká deeloodá' sleémeerowo. Deeloodá' iwa fák iri qwariít. 3Neetlaangw iri oó', “Kuúng barqo Garmoó Mungú, tlaa/anoowí i ilawatseek, i muruú /ayma tleehhiti.” 4Yesu iri oó', “Kaa gooín gidaabá, ‘Hee gár ir slafi a muruú /ayma kiloseká.’ ” 5Guri gáwtí tsa/aás, guri waawuti'iimár i laqán sleémeero ar har qoomár niina. 6Neetlaangw iri oó', “Waawuti'iimarí sleémeero ngi kuúngí haniís nee xirfuuwose, asma sleémeero kinga án i haniís, nee án a aleesláw ngiwa umuúqo heé i haniis oo ngir sla'a. 7Aníng kuúng bira i tumbarara'átd, sleémeero daqaní a tók.” 8Yesu iri oó', “Kaa gooín, ‘Aakoó Mungúwók na i tumbarara'ateek nee ku sagadiyús inós kilós.’ ” 9Yesu kuri huúw nee Neetlaangw ay Yerusalemu, kuri qaás gawaá tsintá Doó Mungú, kuri báy, “Kuúng barqo Garmoó Mungú, ti yaamí kwahh, 10asma kaa gooín, ‘Malaykeerós ngi ya/aaw uwa amohhe'es,’ 11nee ar gídaabá, ‘Kuúng u gagát ar dabaaín, as yaaeerók makawa tunqalaá/ nee tlaa/a.’ ” 12Yesu iri oó', “Kaa oó' gídaabá, ‘Aakoó Mungúwók mu iiara'arar.’ ” 13Neetlaangw umuúqo iiara'at nguwa hhe'eés, guri geexáy ala alé. 14Yesu iri kií/ ar /uuruú Qeeru, iri Galilayár káy. Iidíguuwós umuúqo diiro kuri axaás baraá yaamuudae. 15Ina baraá maraá saalingw'ín wa intsaahhatimís, muu sleémeero guri diidi'iimiís. 16Iri tláy Nasaretír i alé amoodá' kunguwa ureés. Deelór hungu/umawo iri dáh baraá doó saaliingw adoodá' /iisí i /imaamisi. Iri sihhiít as iwa soomuusi. 17Kuri kitaábuú aarusmo Isáyí haniís. Kitaábu guri gweér, dír aa gweér a tí ar taa /aymi'iikí gooín, 18“Aako aníng iga Qeeruuwós i haniís, asma inós aníng iga tsawaár, Ya/abtór hho' ngiwa alki/iit dír narkuutero. Iga ya/aáw amór múk baraá tseegamo as iidíguú gweermor'ín nguwa ooár aw, nee taampu iwa malé qaytsitiya', nee kudá' ta slahhe'eemisi ngiwa amohhooár i haniis, 19nee kurkú gurtleemuú Aako nguwa oo'.” 20Kitaábu guri tuntuúk guri ki/ís dír heedaáduú gadiyusmo. Inós iri iwiít, nee mukdá' sleémeero oo baraá doó saalíngw i dirií', kari dirós i dán gár i ooi. 21Tidá' i ooár wa slai gari iimu/ún, iri oó', “Tí taa gooín diirihe kari axasé', laarí aa bó/ dirhunge.” 22Axweesantós giri qwal/ás, axweesantá gurtleemu kari waa/oo/amór wa ár, tidá' aa axweés ar afkós, tay káh, “Kwí a garmoó Yosefuwookáhe?” 23Giri báy, “Án ngi slaá' kuungá' daxta i slaqsaywí beerá' gídaabá, ‘Qwaslaármo, ti kilók hungu/us.’ Nee sleeme án ngi slaá' i malé beerá' gídaabá, ‘Muruudá' sleémeero taa axaasaán aa Kapernaumú wa tleehharuut, tleehheek sleeme diirihe baraá ayaawoge.’ ” 24Iri oó', “Án a kah, aarusmo i kaahh oo ta ya/an nee múk ayaawós. 25“Ala tí a ló' gídaabá kwaeeli ki yaariir baraá yaamaá Israeliwo aáng qoomár Eliyawo, qoomár tluwaay iwa qwaár kureeraá tám nee slahheeraá lahhoó', giyér ur aya nguwa eér. 26Ala Eliya kwa ya/aawiiká amór heé hatlae, aqo har dír kwaalo'oodár Sarepta ar baraá yaamaá Sidoni. 27Slám malé alé múk tiqtír tsatmit ku úr baraá yaamaá Israeliwo qoomár aarusmo Elishawo, ala oo taa hungu/uús i kaahh, aqo har Naamani, heé yaamaá Shamu.” 28Múk baraá doó saalíngw i dirií' sleémeero tari buúhh adoorí kawa axaás. 29Tari tláy, kuri duúx baraá gixsaro, kuri gawaá kaankír tloomár i huúw, tloomadá' taa gixsar'ín i tleéhh, as kuwa yaamí kwahhi. 30Ala inós ina baraá tla/angw'ín ar waaraáhh, iri tláy. 31Iri aweér ay Kapernaumu, gixsár Galilaya, giri intsaahhatimís deelór hungu/umaawo. 32Intsaahhatisarós kari waa/oo/amór úr wa ár, asma axweesantós i aleesleemuú koón. 33Baraá do'duú saaliingo heeko neetlaame aa eér i deer. Ina tseé' ar afór ur, iri oó', 34“Ahaá, atén nee kuúng a milá, Yesú Nasareti? Nina hardáti as atén tiwa qwaares? Án kuú xuú' adór tar heemá, Kudá' hhoohhoó' oo Mungú.” 35Yesu neetlaameedá' gari iigahhaát iri oó', “Xasliité', ti'iité'.” Neetlaameedá' guri baraá tla/angw'ín i dáhh, guri geemeér, gwa slahhe'esiká. 36Sleémeero waa/oo/amo gay eér, tiri i axweesiyé', “Kaangwí a milá? Baré ar aleesleemu nee /uuru neetlaame birnga iigahhaát, aqo in qútl.” 37Iidíguuwós iri tsiyaayaaxaát umuúqo diiro baraá yaamuudae. 38Iri tláy dír do'duú saaliingo, iri hardáh dír doó Simoni. Aayór harér Simoni naxés i ló'wa tíq ga/atanto. Yesu kuri firín as inós. 39Iri dír bihhaawós i sihhiít, ga/atani gari iigahhaát, iri hungú/ ga/atanto. Inós iri gaanslár tleér, giri sagadiyús. 40Looa iwa dát, muu sleémeero oo tiqtír dimbadimbé koóm, kunguri huúw nee muk'ín dír Yesu. Yesu dabaawós giri qaás gawaá umuúqo tiqtusmoowo, giri hungu/uús. 41Múk yaariír sleeme neetlaame guri geemeér, ta tseeamín ta kaahi, “Kuúng a Garmoó Mungú.” Yesu giri iigahhaát asma matawa kumiít tawa axweesi, asma ka xuu' adór inós tar Kristo. 42Looa niwa tleér, iri quútl amór muu iwa kahhi. Boo/aay guri leelehhiít. Tari amoorós i hardáh ku ila/án, asma miwa quútl dir'ine. 43Giri báy, “Gár tiwa hariím Ya/abtór hho' ar waawuti'iimár Mungú ngiwa alki/iit baraá gixsadaá hatlae sleeme, asma an gár án tisa ya/aáw.” 44Ya/abtór hho' gari alki/iít baraá maraá saaliingw awa yaamaá Galilaya.

will be added

X\