LUKA 17

1Yesu eeharuuseerós gari báy, “Muruú múk paslimís baraá loohír ganaa'a aqo in hardah, ala heedaádá' ngu huwahuúw, a tsaxwa sakwasleemarós ngiwa wa /akuuti. 2Heewí gár kuwa hariím a tlaa/ár xoosliingw kan tseek gawaá istós, nee kuri kwaahh baraá tlawtí alé, ta oo wák baraá kuká' ninakwe nguwa paslisi. 3Ti harmagahhe'.” “Heewók bira dakuús, gan'aaseek. Ala bira hhu'u'ún, gurtlaweek. 4Ala kuúng bura sadakuús sagaáwa faanqw baraá looár wake, nee bir naa kií/ amoorók i ale sagaáwa faanqw, bir kaahi, ‘Aga hhu'u'uúm,’ kuúng gurtlaweek.” 5Ya/abuuse Aako guri beér, “Haratlintaaoorén na doogang.” 6Aako iri oó', “Haratlintaaór har qoomoó ilmoó haradaáli bar koondá', a aleesleerá' /aantsírí kawa beera', ‘Quútl diirihe, ti hatltá eer baraá tlawi’, alók geera tidá' taa oé' /aantsí ga tléhh.” 7“Slaqsaywo heé wák baraahunge i lawaalmoó kón oo qaymór doósl, laqaá oo bee/ángw de'eém. Lawaalmoowí birna harakií/ baraá qaymór wa ale, aakoowós gu báya, ‘Qwaláng ar gaanslaay, /ayiím.’ 8A gun báyke, ‘Muruú /aymar'eé' tleehhang. Ti amoohhe'es ar iwa sagadiyus qoomár án niwa /ayiim nee niwa wahaam. Daqaní kuúng ta /ayiín nee ta wahaán.’ 9Xáy, lawaalmoodaádá' gu sluufísi, asma tidá' taa inós báy ngiwa tleéhh. 10Gawaá adoorihe kuungá' sleeme tleehhamooro bara hhe'esé', tidá' sleémeero tinda kuungá' báy, ta oa', ‘Atén a lawaaleedár gídaabár koomaaká. Aqo tidá' atén wa hariím ana tleehhaán.’ ” 11Qoomár iwa loohír i dirii'i iwa Yerusalémú kay, ina waaraáhh ar baraá tla/ángw Samaria nee Galilaya. 12Nee qoomár iwa dáh baraá gixsarka niina, múk mibaangw oo tiqtír tsatimit nee Yesu tiri doogiyé'. Inooín tari sihhiít amorqí alé, 13tari tseé' tari oó', “Yésu! Aáko! Atén ti gurtleer.” 14Ngiwa ár, giri báy, “Tlawsé' ti laqaande' dír geeraharuusér saalíngw múk Yahudi.” Nee qoomár tawa daqay, tana hhoohhooúy. 15Ala heé wák dir'ine ngiwa ár gídaabá aa hunguú/, iri kií/ amór Yesu, i hara Mungú xirfayeemiis ar afór ur. 16Iri tumbarara'aát dír geerá Yesu, guri sluufiís. Nee heedaádá' a heé tlahhoó múk Samaria. 17Yesu iri oó', “Kudá' mibaangw sleémeero kaa hhoohhooeesiikáhe? Kudá' gwaleél i amá? 18Heé naa kii/ oo Mungú ngwa xirfí haniisár ay i káhhi? Aqo har kwí kilós oo dahaaymoówo?” 19Yesu heedaádá' guri báy, “Sihhiít, tláw, haratlintaaoorók ugwa hungu/ús.” 20Múk Farisayo Yesu guri yaahaás gídaabá, “Waawuti'iimár Mungú xaylá i hardát?” Yesu giri báy, “Waawuti'iimár Mungú binda hardát a aanda'aaká ar ila'. 21Laqaá ta ooiiká, ‘Areng i diirí’, laqaá, ‘Handá' i amorqá'’, asma waawuti'iimár Mungú i baraahúng i dirí'.” 22Yesu iri oó' dír eeharuuseerós, “Deelo i hardát, deelór wák baraá deelór Garmoó Heewo kawa ilatleerusa' arto, ala a aanda'aaká. 23Slám muu i ooi, ‘Qaytsité' amorqá' i alé,’ laqaá, ‘Qaytsité' amoorí alé,’ ala kuungá' ma tlawaara' didá' ti dir'a'a, laqaá mi eeharaara'. 24Asma adoodár mankari ir wer'eeliin gawaá doorí wa ale, bihhiiká' ay bihhiiqá', an adoodár Garmoó Hee i laqi bál deeloorose. 25Ala gár geeraawo kuwa hariím a slahha'amkwá yaariír gun sláy, nee kway sii' nee múk de'emaaká'. 26Adoodá' aa tleehharut deelór Nuhuwo, an adoodá' tleehharuut bál deelór Garmoó Heewo. 27Asma qoomár de'emaá Nuhuwo muu ina /ayín nee ina wahán, slám tana duuxuuxún nee kina duxuút, tam ay bál Nuhu iwa dáh baraá guruú miringamo, nee tluwoó da/atén nay hardáh, mukdá' sleémeero guri tsuú/. 28Nee sleeme an adoodá' qoomár deelór Lutuwo. Muu ina /ayín nee tana wahán, ina tlaxún nee tana muruú weerimiís, ina dahaasín nee tana maraá tlehhiít. 29Ala bál Lutu iwa ti'iít baraá gixsár Sodomaro, asla nina /ét gawaá doorí wa ale adór tluwaay, dinkwa nee tlaa/aá asltá koomá', nee muu sleémeero kuri tsuú/. 30Adoorí an adoodá' tleehharuut bál deelór Garmoó Hee burku geehhoees. 31“Bál deeloodae heé gawaá daanduú doó i dirií', nee oo xooslaarós baraá doó i dirii', miwa aweér as ngiwa leehhi. Nee slám oo baraá qaymór i dirií' miwa amór doó i kií/. 32Harér Lutu inslawaak. 33Umuúqo heewo oo slafiingós gu ba/amisár wa slaá' kilós alé, gu qwaarees, nee kudá' slafiingós gu qwaareés, gu ba/amis. 34Án a kah, xweeraadae hhawaataá tsár awa gawaá qatanír wák i diriiá', oo wák kur tláy, kuquú hatlá' kuri geexáy. 35Nee /ameenár tsár ar dinkwár wa xoosliim, ar wák kar tláy, nee tiqár hatlá' ka geexáy. [ 36Slám múk tsár ta baraá qaymór i dirii', oo wák kur tláy nee kuquú hatlá' ku geexáy.]” 37Tari oó', “A diimá wa ale, Aáko?” Giri báy, “Dír tuuaa i diri' an didár gwares i burumburiimiti.”

will be added

X\