EBRANIA 6

1Gawaá adoorihe intsaahhasadá' sleémeero ar iimu/uuma daanduú Kristowo masók an alí geexawaán, nee tari geerí kumiitaán baraá intsaahhasadár hee gu kwa/as baraá slafíngw qeeruuwo. Atén a sla'aanaaká kawa malé inki/aan intsaahhasadár iimu/uuma, gídaabá, hee iwa hhu'u'un as tlehhma'aá slafa'aaká ngiwa may, nee Mungú nguwa haratlintii'i; 2nee intsaahhasár daanduú baatiísmo nee ar dákw i qaasa; nee intsaahhasár daanduú waasle/ nee sakwasleemár alhhe'eesay wásl. 3Ala ta tihe, atén gár tiwa hariím an geerí hi'iitaán. Adoorí an tleehhaán, bar Mungú ngaa slaá'. 4Asma múk aa qaroó alí kii/, adór kungur ki/isi baraá hhu'u'úngw i alé a adoomá? Asma inooín kingina dahaás baraá gwa/ateemaá Mungú i alé, tsuuqaá Mungú kudá' gawaá dooraá dahhá' kiri tsaáq, Qeeruú hhoohhoó' kuri én, 5axweesantá Mungú kari tsaáq, adór kar hhoó', nee /uuruú yaamuudá' xaawá' kuri tsaáhh. 6Nee aluuwo tari alí kií/. I ya/aandaaká múk adoosíng kuwa ki/isi baraá hhu'u'úngw i alé, asma inooín Garmoó Mungú ku malé kiki'ín gawaá msalaábár i alé, nee ku murekeemiis geerá múk wa ale. 7Yaamaá ta du'umiís nee tluwaay daqtá yaarire, nee bu'úngw hhó' nguri laqwaaliyé', oo gídaabár koóm dír dooslusmoowo, yaamaá adoorí tsuuqaá Mungú ngi slayá'. 8Ala yaamuudá' gár naa laqwaliyé' bar laqaya' nee fuquráy, gár i buiya' i káhh. Yaamaá adoorí kaa nak/aás lu'usaro nee Mungú. Alhhe'eesaywo ki da/a/án baraá asla. 9Ala atén tam adoorí kaahana, sla'aaruuser'eé', atén a xuaán daandeemoohunge gídaabá, kuungá' a tsiní, nee kuungá' ba/ama a harahi'itá'. 10Asma Mungú inós i ganaa'. Slám gadiyérhúng tidá' taa tlehhé' ga gunqareesiiká, nee sla'aarirhúng tidá' taa dirós i geehhooesé' ar loohír múk hhohhó' oo Mungú kuwa sagadiyusé' nee slám tam hamí a kumitá' kuwa sagadiyusa'. 11Gár atén ta ló'wa sla'aan masók umuuqo heewo dirhunge in adoodár kumiit ar inkihhimu ay alhee'eesaay, as muruudá' ta haraxua' kuwa sleera'. 12Atén a sla'aanaaká kuungá' tawa tli/uuse, ala kuungá' masók a adór mukdá' aa haratlintii', kudá' qiqtliím, nee kawa sleera' tidá' Mungú naa al'axweés. 13Qoomár Mungú al'axweesani ngiwa oó' dír Abrahamu, lo'o gari huúw gídaabá tidá' aa oó' i tleehharút. Lo'oodá' gari huúw ar umuuwós inósuú kilá', asma oo úr oo inós gu baá/ i kaahh, oo lo'o ngir huwi. 14Ina oó', “Ar ló', án kuúng u tsuúq, nee u xwaylár yaariír i haniís.” 15Gawaá adoorihe Abrahamu iri qiqtlín, nee gadaádá' Mungú aa al'axweés, gari sláy. 16Hee barnaxes lo'o ga huuw, lo'oodá' gan huuw ar umuú kudá' úr oo inós gu baá/. Gawaá adoorihe kaangaani sleémeero dír muko gár ga tsaat a lo'o. 17Gawaá adoorihe Mungú sleeme lo'o gana huúw qoomár al'axweesantós ngiwa gawdeesár wa slaá' dír mukdá' al'axweesnatadá' ga aál, gídaabá inós i baloó warqayká baraá tidá' aa al'axweesi. 18Gawaá adoorihe Mungú muruuwí tsár gwa huúw, al'axweesantós nee lo'o. Muruuwí i baloó warqayká, nee Mungú lama ga baloó ooiiká daanduú muruuwihe. Ateéká' inós ugwa i guwaan, muruuwí atén tin ló'wa gurkwa/amis, as kawa oohaan haraxu'utidá' geeraarén i dirii'. 19Haraxu'utirí a toorén. Haraxu'utirí muneerén gaa ló'wa ót as miwa qwát. Adoodár miringamo kur baraá ma'áy i ila/aa/an ar tlaa/a, as mukuwa tliw/ín nee gwaanduú ma'aay. Haraxu'utirén tí alhhe'eesaywós dír kay tseék a gawaá doori, dír ira waaráhh a dír baquú baraá doó Mungú i dirií'. 20Yesu ina dáh baraadí alé tawa heé giiriím dír atene, nee tawa saayusmoorén. Asma inós an geeraharusmoorén oo saaliingw ar adoodár Melkisedeki ay alhhe'eesay wasle.

will be added

X\