EBRANIA 4

1Tam hamí al'axweesantadá' i deer gídaabá tawa dahaan baraá amohhooár Mungú. Gawaá adoorihe, atén ti harmagahhaán, as heé wák baraahunge miwa deeruút gídaabá amohhooarí gaa dakuús. 2Asma Ya/abtór hho' diirene kinga alki/iít adoodá' kara alik/iít dír mukduú aange. Ala Ya/abtoodá' inooín gár ngiwa gaa bú' i káhh. Asma kaa axaás, ala kaa haratlintii'iiká baraá muner'ine. 3Ala ateéká' aga haratlintiiaan, atén a dahaán baraá amohhooadá' i alé. Asma Gooi iidíguú amohhooarí gu kát gídaabá, “Aníng aga buúhh, lo'o ngiri huúw gídaabá, ‘Mukwí i baloó dahiiká baraá amohhooar'eene.’ ” Mungú adoorí gana oó', tam gadiyeérós sleémeero gaa geehhooeesi iimír yaamu kiwa tleehhi. 4Asma dirkaaro adoorí gana oó' daanduú deelór faanqw gídaabá, “Bál faanqw Mungú ina hungu/uús baraá gadiyeeduuwós sleémeerowo.” 5Diirihe sleeme kaa gooín gídaabá, “Mukwí i baloó dahiiká baraá amohhooar'eene.” 6Gawaá adoorihe a gár xu'utír koom gídaabá múk dáh baraá amohhooarí i alé i deer. Ala mukdá' Ya/abtór hho' gaa geerí axaas, inooín dahmu ngwa aleeslay'iiká, asma Ya/abtór hho' nga haratlinti'ii'iiká. 7Gawaá adoorihe Mungú deelór hatlá' gari qaás, deeloodá' gari báy “Laarí”. Iidíguú deeloorí guna alki/iít ar afór Daudi alaá kureeraá yaariir niwa waarahhiyé'. Iidíguuwí kwa gooín baraá gooirí taa qaroó ooaán gídaabá, “Laarí bar afór Mungú aga axasé', munerhúng ma gawdeesara'.” 8Yoshua geeraawo bar muu ngwa dahaás baraá amohhooár i alé, Mungú geera iidíguú deelór hatlá' ngwa ooiiká. 9Gawaá adoorihe amohhooár deelór hungu/uma i deer, ar taa amohhe'eés as múk Mungú. 10Asma heé aa dah baraá amohhooár Mungú, inós aa hungu/uús baraá gadiyeérose, adoodár Mungú sleeme ira hungu/uús baraá gadiyeeduwose. 11Ala atén gár tiwa hariím a ilakaaharu un tleehhaán tawa dahaan baraá amohhooadá' i alé, nee umuúqo heewo dahma mingiwa dakuús baraá amohhooadá' i alé as dee/aanu, adoodá' inooín tara dee/aanuút. 12Asma axweesantá Mungú i sláf. Nee slám i /uuruú koón. Nee i xarásl ló'wa ale tam paángár afe tsár ga bá/. Axweesantá Mungú i dát baraá heé i alé, qeeru nee muuná giri parátl, tam fadu nee waeemoowós giri parátl sleeme. Nee slám axweesantá Mungú inslawoó hee gu sakwasleemút, nee umuúqo gár i slai baraá muunaáwose. 13Umuúqo gaaro ar Mungú i harslaaqati arto i káhh. Mura' sleémeero i kístí dirii', nee ku geehhoó' dír ilaawose, nee dír geeraawose atén sleémeero faaro a tleehhaán daanduú slafingwrene. 14Gawaá adoorihe atén haratlintaaoorén tidá' ta koomaan masók an ló'wa oohaán. Asma atén Geeraharusmoó úr oo saaliingw u koomaán. Inós aa waaraáhh ar tla/ángw doori ay dír geerá Mungú i alé. Inós an Yesu, Garmoó Mungú. 15Geeraharusmoorén kudá' úr oo saaliingw, inós atén ti gurtleemuú wa ara'ar baraá liitlakweerene. Asma inósuú kilá' kuna iiara'ár adór atén wa aleeró baraá mura' sleémeerowo, ala tlakweema gaa tleehhiiká. 16Gawaá adoorihe atén masók an tseewuwaán ar pihhu'uuma amór kitángw Mungú, didá' tsuuqaá Mungú kiwa slay, as tíwa gurtleemuú i haniisi, nee /uuru kuwa slawaan, kudá' atén ti alee/iimiís qoomár hariím wa ale.

will be added

X\