EBRANIA 3

1Hhaee'eé', kuungá' awa hhohho', kuungá' sleeme tunda ateét nee Mungú. Yesu ga/aawaak. Inós an ya/abusmo nee an geeraharusmoó úr oo saaliingw, kudá' atén ta lamabu'uumaan gídaabá u haratlintiaán. 2Inós i inkihhimuúb kón dír Munguhe, kudá' inós gwa qaas baraá gadiyeérós i alé. Adoodár Musa sleeme ira inkihhimuút baraá doó Mungú sleémeerowo. 3Yesu i xirfuú kón ló'wa ale ta Musawo. Asma umuúqo heé doó tleéhh, xirfuuwós ku úr ta xirfuú do'dá' aa tleehhi. 4Umuúqo do'o i tleehharusmoowós kón, ala Mungú inós mura' sleémeero guna tleéhh. 5Musa inós a heé inkihhimuú koóm baraá doó Munguhe, asma inós tawa sagadiyusmo. Inós muruudá' Mungú i alki/iiti aluuwo guna lamabu'ún. 6Ala Kristo inós i inkihhimuú kón asma inós tawa Garma. Inós kwaa qaás gawaá daanduú doó Mungú sleémeerowo as nguwa baali. Atén an do'ós, barnaxes a kumiitaán baraá pihhu'uumarene nee haraxu'utirene, haraxu'utirén kawa diidi'iimisaan ay alhhe'eesaay. 7Gawaá adoorihe Qeeruú hhoohhoó' i kaahi, “Laarí bar afór Mungú aga axasé', 8munerhúng ma gawdeesara', adoodá' taa tlehhé' qoomár aníng iwa sié' baraá xanxáy wa ale, qoomár iwa iiara'adé'. 9Baabi'iihúng tlehhemi'iieé' ngaa ariyé', kudá' naa baraá xanxáy wa tlehhiít kureeraá mibeerá tsiyahhe. Ala tam adoorihe inooín aníng ina iiara'ariyé' nee iri daawitisiyé'. 10Gawaá adoorihe aníng qartadá' ana i buúhh, niri oó', ‘Mukwí deelo sleémeero a múk muner'ín aa qwat, nee slám loohir'eé' kaa baloó xuiiká.’ 11Aníng ana buúhh, lo'o ngiri huúw gídaabá, ‘Inooín i baloó dahiaaká baraá amohhooar'eéní alé.’ ” 12Hhaee'eé', ga/aawaak. Tam heé wák baraá tla/angwhunge miwa deeruút oo muunaá tlaákw nee oo haratlintaao wásl, tam iri qwaar as Mungúdá' slaáf nguwa geexáy. 13Ala kuungá' umuúqo deelooro ti gurbu'uunde' dír /aymuuwí “laarí” ir kumiiti, as tam heé wák baraá tla/angwhunge miwa ya/án kuwa al/ayi nee tlakweema, nee iri gawdúy. 14Asma atén sleémeero a alqaatuusér Kristo, barnaxés atén aga kumiitaán ar pihhu'uumarén tidá' ta koomaan iimír iimu/uungo. 15Gaarí an gár Gooi is kat, “Laarí bar afór Mungú aga axasé', munerhúng ma gawdeesara' adoodá' taa tlehhé' qoomár aníng iwa sié'.” 16Múk afór Mungú gaa axaas, inós kuri sií', a ín heemá? A mukdáeéke sleémeero oo Misrír daáhh, kudá' taa geeraharahaár nee Musa. 17Mungú múk aa i buhhabuúhh kureeraá mibeeraá tsiyahhe a ín heemá? Múk aa i buhhabuúhh a kudáeéke tlakweema nga tleehhiye', kudá' aa qaatl baraá xanxáy i alé. 18Nee slám múk Mungú aa lu'ús gídaabá i dahiiká baraá amohhooarós i alé, a ín heemá? Ar ló', a mukdá' inós gwa sii'. 19Gawaá adoorihe aga araán gídaabá dahmu ngwa aleeslay'iiká, asma Mungú ngwa haratlinti'ii'iiká.

will be added

X\