EBRANIA 2

1Gawaá adoorihe atén gár tiwa hariím ya/abtoodá' taa axaasaán an ak alqaytsimiitaán ló'wa ale, as gídaabá atén mawa paslaán baraá loohirene. 2Asma tam Axweesantadá' taa oó' nee malayke, a Axweesantá /uuruú koom. Nee umuúqo hee oo axweesantadá' gaa eeharahaariiká, laqaá oo gaa ilaiwawa/iiká, inós sakwasleema gari sláy adoodár inós wa hariím. 3Gawaá adoorihe atén sakwasleemaro adór tar /uwaan a adoomá, bar ba/amár ur ar adór tí a gaár i xuanaaká. Ba/amarí geeraawo kana alki/iít nee Aako inósuú kilá'. Nee aluuwo kingiri diirén i xu'utís nee kudá' nga axaasiye' gídaabá ar ló'. 4Tam Mungú inósuú kilá' sleeme ba/amarí gari lamabu'ún ar loohír laya nee muruú waa/oo/amo nee tlehhema'aá dimbadimbé awa /uuruú koomá', nee ar aleesleemuú dimbadimbé oo Qeeruú hhoohhoó' kuwa hanmiisi ar adoodá' inós i slai. 5Iidíguú diirihe ta axweesaan a iidiguú yaamuudá' xaawá'. Mungú yaamuudá' gaa dabaá malaykér i qaasiiká as ngiwa sa waawuti'ii'iin. 6Adoorí heeko wák gaa lamabu'ún baraá Gooiro gídaabá, “Hee a gár milá, tam kuúng kuwa inslasleer? Laqaá na/oó hee a gár milá, tam kuúng inós kuwa sa daawimit? 7Qoomarka niinawe inós una qás tawa heé niiná dír malaykeero. Kuúng una slamángw i dahás oo xirif nee oo ilaiwa/ame. 8Mura' sleémeero una gawaá dabaawós i qás.” Qoomár Mungú mura' sleémeero nguwa dabaawós i qaás, gár aa geexáy i káhh qaasaro, ala mura' sleémeero kuna gawaá dabaawós i qaás. Ala atén mura' sleémeero ugwa araaniiká gídaabá kwaa dabaawós i qaás. 9Ala heé taa araán a Yesu. Inós qoomarka niinawe kuna qaás tawa heé niiná dír malaykeero, ala hamí kwaa slamángw i dahaás oo xiríf nee oo ilaiwa/ame, as slahha'amuuduú gwa'ara aa sláy. Mungú adoorí gana tleéhh as Yesu gwa'ara ngiwa tsaqi as daanduú umuúqo heewo. 10Mungú inós an kudá' mura' sleémeero gwa tleehh, nee slám inós an kudá' mura' sleémeero gu amohhe'eemiís. Slám Mungú gana slaá' na/'aá yaariir ngiwa hardahaasi dír xirfuú i alé. Gawaá adoorihe, dirose a gár hariím Yesu nguwa boo/eesi ar loohír slahha'amaaye. Asma Yesu an kudá' muu gu geerahaár amór ba/amár i alé. 11Inós muu gu hhoohhooeemiis tlakweemaaine. Inós nee mukdá' taa hhoohhooeemiís Baabuúín a wak. Gawaá adoorihe inós i murumiitiiká inooín ngiwa hhaeewós ar ateetin. 12I kaahi, “Aníng umuuwók u alki/iít dír hhaee'eene. Aníng kuúng u xirfayeemiís ar daa'aangw baraá tla/ángw mukók wa ale.” 13Nee i malé kaahi, “Aníng Mungú un haratlintií'.” Nee malé alé i kaahi, “Aníng a diirí dirií' dinkwa nee na/'iidá' Mungú naa aníng i haniís.” 14Na/'ii tseerer'ín a wak, nee slaqwtaín a wak. Gawaá adoorihe inós sleeme muruuwí guna sláy adór inooín wa ale. Adoorí gana tleéhh as gwa'ara ngiwa slay. Asma ar loohír gwa'araarose inós gár i slai a /uuruú Neetlaangw nguwa hhitin, kudá' úr oo gwa'ara. 15Gawaá adoorihe inós gár i slai a muu nguwa gweeri, kudá' taa tsegiít baraá lawali'iimár daér gwa'ara baraá slafingw'ín sleémeerowo. 16A gár geehhoo' gídaabá inós naa hardahiiká as malayke ngiwa alee/iisár ay. Ala gár nisa hardáh a xwaylár Abrahamu ngina alee/iisár áy. 17Gawaá adoorihe inós gár kuwa hariím, a inós kuwa adór hhaeewós tleehhi baraá mura' sleémeerowo. Gár kusa adoorí laáq a inós masók a geeraharusmooín oo úr oo saaliingw, kudá' gurtleemuú koóm nee inkihhimua baraá kángw Munguhe, as tlakweemaá mukós ngiwa hingeesi. 18Asma inósuú kilá' kwaa slahhe'eemiís nee kuri iiara'ár. Gawaá adoorihe inós kudá' sleémeero awa ta iiara'ari gi aleesláy alee/iisaro.

will be added

X\