EBRANIA 13

1Kuungá' kumiité' tiwa sla'asla'a' adór hha'aá baraá Kristó wa ale. 2Ma gunqaruutara' dahaaye kawa dahi'iimisa' baraá marayhunge. Asma awa adoorí ngaa tlehhiitiye', daqtakaaro malaykér Mungú ngaa dahi'isiyé', ala inooín kaa xuiiká. 3Mukdá' taa tsegiít baraá doó tseegamór i aleeró, inslaslaawaak. Kuungá' sleeme masók an adór múk taa tsegiít dinkwa nee inooín. Tam mukdá' ta slahhe'eemisi sleeme inslaslaawaak, asma kuungá' sleeme a múk slaqwaá koóm adór inooín wa ale. 4Muu sleémeero duuxo ngi ilaiwawa/i. Hhawaata nee hareerós masók a múk inkihhimuúf koóm baraá duuxor'ine. Asma Mungú fuquuse nee tsaatuuse ga sakwasleemuut. 5Kuungá' ti harmagahhe' gawaá sla'aarír peésaro, ala muruudá' kuungá' ta koonda' i bu'uuti dirhunge. Asma Mungú inósuú kilá' ina oó', “Aníng kuúng u gaa wa /aaruwaaká, slám u baloó mawaaká.” 6Gawaá adoorihe atén adoorí ooaro a aleeslawaán ar haratlintaao gídaabá, “Aako an alee/iisusmooeé', a da'ayumiitaaká. Hee gár i aníng i tleehhi a umós?” 7Kuungá' geeraharuuserhúng inslawaak, tidá' axweesantá Mungú ngaa dirhúng i alki/it. Slafingw'ín kuungá' inslawaak adór inooín tara hoót, nee adór tara qaátl, haratlintaaor'ín na eeharaak. 8Yesu Kristo inós an kuduú isá/ nee laarí tam ay alhhe'eesay wasle. 9Kuungá' intsaahhasár dimbadimbé ar hatlá' munduwa paslís baraá loohír ganaa'a. Asma gár muneerén ga gawdees a tsuuqaá Mungú, ala a hara'ayár dimbadimbeheeká ar daanduú muruú /ayma. Asma mukdá' hara'ayaarí gaa eehaar, alee/isoó taa sláy i kaahh dír hara'ayaarihe. 10Atén meésár ilahhooa a koomaán. Geeraharuusér salíngw múk Yahudi, tidá' gadiyuus baraá heémár wa ale, ya/aám ka konká ar muruuduú gawaá daanduú meésaarén tí nguwa /ak. 11Geeraharusmoó úr oo saalíngw múk Yahudi tseerér hikwaadá' taa tsuú/ ilahhooár wa ale, gan haahuuw baraá heéma ay Didá' ak Hhoohhoo', as ilahhooár tlakweemaá wa ale. Ala slaqwaá makaydá' kin da/aa/aa/án dír tsee/aá gixsár wa ale. 12Gaarí an gár Yesu kusa gaás dír tsee/aá afkuú gixsár i alé, muu nguwa hhoohhooeesi ar tseereerós ar kilá'. 13Gawaá adoorihe qwalaasé', atén u i daqawán amór tsee/aá gixsár i alé, atén sleeme mure kawa slawaan dinkwa nee inós. 14Asma baraaká' yaamuuwo gixsár ak hoot a koomanaaká, ala atén gixsadá' hardah an leelehhiitaán. 15Gawaá adoorihe atén masók Mungú un ilahhooarén i hanmiisaán ar xirif umuúqo daqto ar loohír Yesu. Gídaabárós a Mungú un xirfayeemisaán ar afeerén. 16Kuungá' ma gunqaruutaara' tlehhma'aá hho' kiwa tlehha' nee tiwa alee/iimisa', asma gaarí an ilahhooadá' Mungú gu ak qwal/atimis. 17Kuungá' geeraharuuserhúng ilaiwawa/aak, nee adoodá' inooín ta kaahi tlehhiitaak. Asma inooín munerhúng ngin ga/aayá' xweera nee tlaatla/aango. Asma faarór gadiyér'ín ngi ooiyá' dír Mungú i alé. Kuungá' bar iga ilaiwawa/é', inooín daqaní gadiyér'ín ngi tleehhiyá' ar qwala/, ala ar gurhaamirooká. Ala barnaxes kan tleehh ar gurhaami gadiyér'ín daqaní gár dirhunge i bu' i káhh. 18Kuungá' kumiité' atén tiwa aleefiriiriinda'. Atén a xuaán gídaabá atén munér hho' a koomaán. Asma atén gár ta sla'aan a tidá' ganaa' kawa tleehhaan umuúqo deelooro. 19Án kuungá' nun ló'wa harhhehhe'eemiís aníng iwa aleefiriiriinda' dír Mungú wa ale, as Mungú aníng iwa ki/isi amorhúng i alé ar gaanslaay. 20Aakoorén Yesu inós an de'eamusmoó úr oo bee/aangw. Mungúduú wayduú koóm Yesuwí guna waaslee/atís baraá múk aa qaátl wa ale, ar /uuruú tseereedár alqadór alhhe'eesay wasl. 21Mungúwí umuúqo gár hhoo' ngi kuungá' i haniisi, as kuungá' sla'aarirós kawa tlehha'. Inós tidá' i slai ngi tleehhi baraá muneerene ar loohír Yesu Kristo. Inós i xirfuuti ay alhhe'eesay wasle. Amin. 22Hháe, án kuungá' nun harhheehhe'eemiís, kuungá' axweesantír gurbu'uungw na ilaoohaak ar inkihhimu. Asma barwaárí naa kuungá' i gooiím axweesanoó yaariír oo i koon i kaahh. 23Án kuungá' nu xu'utisár wa slaá', gídaabá hhiyaarén Timoteo kwaa gweér baraá tseegamooro. Ala inós bar naa hardáh ar gaanslaay, án nee inós ti al koomaán niwa amorhúng i hardahaan. 24Geeraharuuserhúng sleémeero intsihhiisaak, dinkwa nee múk hhohhó' oo Mungú sleémeero. Hhaeedaádá' yaamaá Italiár dahhá' kuungá' nu intsihhiimisiyá'. 25Mungú kuungá' sleémeero nu tsuuqi.

will be added

X\