EBRANIA 10

1Hara'ayár Musa a geehhantamoó tawo oo muruudá' hhó' oo hardáh, ala a muruudá' oo kil'eeká. Asma hikwaá ilahhooa kin adoodá' ar harmamiis umuúqo kurko. Ala gawaá loohír adoorihe hara'ayár Musa muu boo/eesaro gu aleesleeraaká, kudá' ilahhooadá' ga hanmamiís. 2Ala geera bar ngi aleesleeér, geera alók inooín ilahhooadá' kaa qaroó máy hanmisuuwo. Asma mukdá' ilahhooár makaay ga hanmiís, geera barnaxes tlakweemaaín kaa qaro hamaátl sagaáwa wák wa ale, geera alók tlakweemaá hamaatlár sla'á' i kahhiyá' baraá muner'ine. 3Ala ilahhooarí ar hikwa hanmisuwo a muu gun inslawtimís umuúqo kurko iidíguú daanduú tlakweemaawo. 4Asma tseerér awee nee ar gurtaawe tlakweema hingeesaro gi baloó aleesleeraaká. 5Gawaá adoorihe, qoomár Kristo niwa dahmaá slai baraaká' yaamí alé, iri oó' dír Mungú gídaabá, “Kuúng gár ta sla' a ilahhooarooká, laqaá hikwaá ilahhooarooká. Ala slaqwa ngina aníng i hanís. 6Kuúng ilahhooa aga slaiká, tidár hikwaá ilahhooa kiwa adoodá' alda/i gawaá meésár ilahhooár i aleeró. Slám ilahhooaduudá' ta hanmamisi as tlakweema iga slaiká. 7Ala aníng niri oó', ‘Mungú, aníng a deer, as tidá' kuúng ta sla' ngiwa tleehh adoodá' kara gooín daanduueé' wa ale baraá kitaábuú hara'ayár Musawo.’ ” 8Gár geeraawo aa oó' a tí, “Kuúng ilahhooa a sla'aká, slám hikwaá ilahhooa sleeme i sla'aká, laqaá hikwaá ilahhooa awa ta adoodá' alda/i, laqaá ilahhooár taa hanmiís as tlakweema. Ilahhooarí sleémeero kuúng u sla'atimiská.” Inós adoorí gana oó', ilahhooarí sleémeero tam ka hanmamiisi ar adoodá' hara'ayár Musa i kat. 9Inós iri malé oó', “Mungú, aníng a deer, as tidá' kuúng ta sla' ngiwa tleehh.” Gawaá adoorihe Kristo ilahhooadár geera ar hikwa gana hingeés, as tidá' /aben ngiwa qaasi ar tiwa kilós haniisi. 10Yesu Kristo gana tleéhh tidá' sleémeero ar Mungú aa slaá'. Gawaá adoorihe atén taa hamaátl as adoodá' Yesu Kristo slaqwtós ngiwa ilahhooár wa haniís sagaáwa wák wa ale. 11Umuúqo geeraharusmoó saalíngw múk Yahudiro gadiyeérós gan tlehhahhiit umuúqo deelooro ar ilahhooadá' ar kilá' ngiwa hanmaamisi umuúqo daqto. Ala ilahhooarí tlakweema hingeesaro gi baloó aleesleeraaká. 12Ala Kristo ilahhooár wák kilós gana haniís as tlakweema. Ilahhooarí an tidá' hoot ay alhhe'eesay wasle. Adoorí tlee hhamooro ngiwa hhe'eés, iri iwiít bihhaá dákw /iyáy oo Mungú. 13Diirí an didár wakuuseerós ngiwa daamaaran kawa baali nee Mungú, nee kawa baraá dabaawós i qaasi. 14Asma ar ilahhooár wák kilós, tidá' aa haniís, inós mukdá' aa hhoohhooeés gwa múk ganaá' tleéhh ay alhhe'eesay wasle. 15Asma Qeeruú hhoohhoó' sleeme i lamabu'ún. Geeraawo gár i kaahi a tí, 16“Aako i kaahi, Gaarí an alqadoodá' án ni tleehhamór wa slaa' nee inooín alaá deeloodá' sleemeerowo. Aníng hara'ayar'eé' an baraá muner'ín i qaás, nee an baraá inslaway'ín i gooiím.” 17Nee iri malé oó', “Aníng tlakweemaaín nee tlehhemi'ii'ín kudá' tlakw i baloó inslawaaká.” 18Gawaá adoorihe, tlakweema barnaxes kaa gurtláy, ilahhooár tlakweema gár kas malé haniisi i káhh daqaní. 19Gawaá adoorihe, hhaee'eé', atén a aleeslawaán tawa dahaan ar pihhu'uuma ay Didá' ak Hhoohhoo' ar tseerér Yesu. 20Inós slaqwtós ngiwa haniís, loohír /aben gana gweér ar slafíngw koom. Atén an waaraahhaán ar loohirí, ar baraá baquuduú doó Mungú ay amór Mungú. 21Atén geeraharusmoó úr oo saaliingw u koomaán oo múk doó Mungú sleémeero gu ga/áw. 22Tlakweemaá muneerén kaa hamaátl, nee muneerén kaa hhoohhooeés. Slám slaqoorén kaa hamaátl ar ma'aá hhohho'. Gawaá adoorihe atén Mungú ku haratseewuwaán ar haratlintaaór ló', ar xure wasl. 23Haraxu'utirén tidá' taa lamabu'uumaán ka oohaán nee mawa baloó geexawaán. Asma Mungú al'axweesantós ngaa haniís, nee inós i inkihhimuúc kón. 24Atén masók ti kilootén ga/aawaán nee ti alee/iimisaán as tawa hootaan ar sla'aari nee ar tlehhema'aá hho'. 25Slám atén dinku'uumarén mawa mamaawaán, adoodá' muu bahh'alé i tlehhahhiti, ala masók tin kilootén harakeemisaán, ak alé as deeloodá' kawa tsahha' gídaabá naa naká/. 26Atén xu'uti barnaxes aga slawaán daanduú iidíguú looeema, aluuwo tlakweemaá sidoót kiri malé tleehhaán, ilahhooár tlakweemaadá' gi hingees i káhh daqaní. 27Ala aqo an daamaaraamaán ar daér ur, ay qoomár sakwasleema nee buhhtaá Mungú awa xaraaslá'. Buhhtaadá' umuúqo heewo oo Mungú gwa sii' ngu /ayiyá' adór astlá wa ale. 28Heé hara'ayár Musa gaa sii', inós gár kuwa hariím a in gwaa', ku gurtlayká, barnaxes múk tsár, laqaá tám, tlakweemaawós ngaa lamabu'uné'. 29Ala heé Garmoó Mungú gwa kalaa/ a adoomá? Sakwasleemarós ka ak ureéke? Asma inós tseerér alqadór Mungú gaa waaqaá', tidá' inós gwa hhoohhooes, nee inós Qeeruú Mungú guri malé /oosliislín, kudá' tsuuqa gi hanmaamiís. 30Asma inós u xuaán kudá' aa oo', “Li/aayd a daanduueé', aníng li/aay u buú'.” Nee aa malé oó', “Aako mukós gu sakwasleemuut.” 31A gár dae tlaaq kángw kilá' wa ale bara huuaán baraá dabaá Mungú slaáf i alé. 32Kuungá' inslawaak muruudá' taa sleeré' aáng. Asma qoomár kuungá' gwa/ateemaá Mungú kiwa sangw sleeré', qoomaadae ana ló'wa qiqtlaatliindé' baraá tlaampa'amisuú urene, nee slahha'amaayér yaariir ar taa sleeri'i. 33Daqtakaaro kuungá' kilá' tunduna niqimís, tunduri slahhe'eemiís, nee tunduri /oosliislín dír geerá múk wa ale. Nee siiwarkaaro kuungá' ana dinku'umisé' nee múk hatlá' oo taa adoorí laqán. 34Kuungá' ana slahhahhaé' dinkwa nee mukdá' taa tsegiít. Slám muu muruuhúng nguwa hayohín, kuungá' adoodá' ana ya/aandé' ar qwal/amaaye. Asma kuungá' aga xué' gídaabá daqaari'iimarhúng ar hatlá' i deer, tidá' baloó faakaaká. 35Gawaá adoorihe, pihhu'uumarhúng ma qwaareesara', asma gídaabár ak ur ga koón. 36Kuungá' gár tunduwa hariím a an qiqtliindá', as adoodá' Mungú aa slaá' kawa tlehhita', nee gadaádá' inós aa oó' baraá al'axweesantose kawa sleera'. 37Asma Gooi i kat, “Alaá deelór niinawe kudá' hardáh niqo hardah, inós i kwahhaasiiká. 38Ala hee'eé' kudá' gan'amkú koóm, inós gár ir slafi a haratlintaao. Ala barnaxes aa alí kií/, muunuúeé' i qwalala/iiká as inós.” 39Atén a kahhaán baraá tla/ángw mukdá' alí kikii/a, tari qwaaraán. Ala atén dír tay diriiaan a baraá tla/ángw mukdá' haratlintaaór koóm, tari ba/amán.

will be added

X\