GALATIA 6

1Hhaee'eé', hee bira huú' baraá tlakweemakaarí alé kuungaásingá' awa Qeeru heé adoodá' gan'aasaak ar tsatsa'aareema. Ala kuungá' kilá' ti harmagahhe', kuungá' sleeme mutunduwa iiara'ár. 2Ti alee/iimise' umuúqo heewo huuwár heewós ngi gagaari. Ala adoorí bara tlehhé', daqaní hara'ayaarí ar Kristo aga boo/esé'. 3Hee bir baraá muunuúwós i kaahi gídaabá, “Aníng a heé gídaabár koóm,” ala laatí inós a heé gídaabár koomaaká, heé adoorí tin kilós al/agín. 4Ala umuúqo heewo gadiyeérós ngi kilós alqaytsiiti adór kar hhoohhoó', nee ngi xui baraá muunuúwós kilós i alé, ala mitiwa alqoomeemeés nee heé hatlá'. 5Asma umuúqo heewo gár kuwa hariím aqo huwaarós gan kilós gagaar. 6Umuúqo heé ta intsaahhatimisi axweesantá Munguhe, intsaahhatusmoowós ngu qay tidá' hho' sleémeerowo. 7Miti kiloohúng al/agiimara'. Mungú ku al/agaaginká. Umuúqo gár hee i dahaasin, an tidá' i bu'un. 8Asma tlehhema'aá hee a adór dahaasiingw. Ala hee baraá slafiingose gár aa dahaasín bar tidá' slaqwa i sla', gár i bu'un a gwa'ara. Ala gár aa dahaasín bar tidá' Qeeru i slai, gár i bu'un a slafíngw alhhe'eesay wásl. 9Mawa slaaqataán hhooeema tlehhtuuwo. Bar aga mune sianiiká, bu'uungw u slawaán qooma bira xeér. 10Gawaá adoorihe atén qoomaarí tawa baraaká' yaamuú i diriiaan, hhooeema ki tlehhiitaán dír muu sleémeerowo, ak alé dír kudá' haratlintaauuse. 11Ga/aawaagáy, gooirí ni gooiim ngina gooiím ar gooír uren ar dakw'eé' oo kilá'. 12Mukdá' sleémeero oo kuungá' nu harakeemiís as tunduwa al/utlin, inooín nun harakeemisiyá' as muu nguwa sla'atisiya'. Gár adoorí ngis tlehhiitiya' a wak kilós, gídaabá mikiwa slahhe'eemiís as msalaábár Kristo. 13Asma tam mukwí al/utlór iinuús, inooín awa kilá' hara'aya ngi eeharahariaaká. Gár inooín i slaiya' a masók kuungá' tundun al/utlín as inooín tiwa kilooín xirfeemiisiya' as al/utlorhúng. 14Ala aníng ti baloó xirfeemiisaaká gawaá umuúqo gaaro, aqo har msalaábár Aakoorén Yesu Kristo. Gawaá msalaábarihe muu sleémeero kwa kikií' dir'eene, nee aníng taa kikií' dír muu sleémeerowo. 15A gaarooká hee burkwa al/uútl, laqaá barnaxes kwa al/uutliiká, ala gár gidaabár koom a hee kuwa heé /abén tleehhi. 16Mungú wayda ngu haniisi, nee gurtleemu, dír kudá' sleémeero naa ya/ane' kaangwí eeharto baraá slafingw'ine, tam dír múk Mungú sleémeerowo. 17Iimír hamí aníng hee miwa sangw daawiitiís, asma aníng a mulkoó Yesú koóm gawaá slaqwte'eene. 18Hhaee'eé', Aakoorén Yesu Kristo munerhúng ngi tsuuqi. Amin.

will be added

X\