GALATIA 3

1Kuungá' múk Galatia, kuungá' a daktana. Heé kuungá' naa da/aarin a heemá? Iidíguú Yesu Kristo kunguna alkii/iít dirhúng i alé ar geehhooeemaá kilá', adór inós kura kikií'. A adór una aandé' ar ilaahúng awa kilá'. 2Án kuungá' nu yaahaás /aymuú wake, kuungá' Qeeruú hhoohhoó' una ilaotí'i as hara'aya kawa eehadé', laqaá as Ya/abtór hho' kawa axasé' nee kari haratlintié'. 3Kuungá' masaa adoorír daktu'uté'? Kuungá' slafíngw /abén una iimu/uundé' ar baraá Qeeru. Ala daxta mas alhhe'eemisuú sla'a' ar baraá /uuruuhúng. 4Tidá' sleémeero ar taa sleeré' daxta gár i hup i káhha dirhunge? Aasla'áy, ala aníng ngi slaa' i kahhká. 5Mungú Qeeruú hhoohhoó' ngun hanmiis amorhúng i alé, nee muruú xuawaslén nguwa tlehhiiti tla/angwhúng wa ale. Kuungá' ka xua' adoorí gan tlehhiíti as kuungá' hara'aya kawa eehadé'? Ala a adoorí gan tlehhiítiíke as kuungá' Ya/abtór hho' kawa axasé' nee kari haratlintié'? 6Adoorí an adoodá' Gooi i kat daanduú iidíguú Abrahamuwo gídaabá, “Mungú guna haratlintií', gawaá adoorihe kuri gan'amuú i harafaár.” 7Gawaá daanduú axweesantihe kuungá' a tsahhá' gídaabá múk aa haratlintii' an na/'aá kilá' awa Abrahamu. 8Gooi gana geerí aán gídaabá, Mungú múk xoordu gu gan'amuú i harafaar as haratlintaaor'ín. Ya/abtoorí hho' Gooi gaa alki/ít geerí alé, iri ó' dír Abrahamu gídaabá, “Baraawoge xoordu sleémeero ki tsuuq.” 9Abrahamu iri haratlintií' nee kuri tsuúq. Nee gawaá adoorihe kudá' sleémeero awa Mungú ngwa haratlinti'iiye' ki tsuuq adoodár alé. 10Ala kudá' sleémeero awa tlehhma'aá hara'aya ngaa i tlinti'iiye' kaa lu'ús. Asma Gooi i kat, “Heé tidá' sleémeero ar taa gooín baraá kitaabuú hara'ayár Musawo gaa boo/eesiiká, ku lu'usi.” 11A gár geehhoo' gídaabá hee i kaahh oo ta gan'amuú i harafaari dír geerá Munguhe ar loohír hara'aya. Asma kaa gooín gídaabá, “Heé gan'amuú koóm, slafiingw gu kón as haratlintaao.” 12Ala hara'aya iidíguú haratlintaao gu katká. Ala hara'aya gár i kat a tí, “Heedaádá' hara'aya sleémeero gaa oh, slafiingw gun sláy as tlehhemi'iiwós.” 13Kristo atén tina tuú/ baraá lo'oodár hara'ayaaro, qoomár lo'oorén tidá' inósuú kilá' ngiwa gagaár. Asma kaa gooín gídaabá, “Umuúqo heewo oo taa kikií' gawaá xa'anoó i alé kwaa lu'ús.” 14Kristo inós adoorí gana tleéhh, as tsuuqaadá' Mungú aa al'axweés dír Abrahamu, xoordu ngiwa i hardahiya' ar loohír Kristo Yesu ar alé. Nee sleeme adoorí gana tleéhh as atén Qeeruú hhoohhoó' kudá' Mungú naa diirén i al'axweés, kuwa slawaan ar loohír haratlintaao. 15Hháe, án slaqsoó wák ngun oó' oo baraá slafiingwrén oo umuúqo daqisleém. Múk tsár bira al'axweés, heé al'axweesantadá' ga geeqáw laqaá ga warqeés i kaahh, ala al'axweesantadá' gár gaa tlehh tam muko. 16Ala Mungú alqadoorós gana oó' dír Abrahamu nee xwaylitmoowós. Alqadoorí i katká, “dír xwaylarós.” Gawaá adoorihe a dír múk yaariireeká. Ala alqadoorí gár i kat a “dír xwaylitmoowós.” Gídaabá a heé wák, nee heewí an Kristo. 17Gár án ni kah a tí, “Alqado kaa qaroó tleéhh iimír aáng wa ale nee Mungú. Hara'aya niri hardát alaá kureeraá tsiire tsiyáhh nee mibeeri tám. Ala gawaá adoorihe hara'ayaarí alqadoodá' warqeesaro ga aleesleeraaká, nee tam al'axweesantadá' ngiwa hinges, tidá' taa qaroó geerí oó'.” 18Atén aali an slaslawaán as Mungú al'axweesantós ngiwa boo/eés. A gídaabaheeká aali an slaslawaán as hara'ya kawa eeharaharaán. Asma Mungú aali gana amór Abrahamú i haniís, as gana alqadín amoorós i alé. 19Ala gár hara'aya kingisa haniís a milá? Hara'aya kingina doók daanduú al'axweesantadí alé as dakuús ngiwa laqaan, nee iwa kumit ay dír Kristo i hardahi. Inós an xwaylitmoó Abrahamu oo al'axweesantadá' gaa slay. Mungú hara'ayaarí gana haniís dír malayke. Malayke gari hanís dír muu. 20Ala har'ohusmo barnaxes i deer, inós a har'ohusmoó heé wakeeká, ala Mungú inós a wak. 21Daxta bar adoorí, an ooána gídaabá hara'ayár Mungú nee al'axweesantá Mungú ti slaslay'aaká? Aasla'áy, a adooriheeká. Ala geera barnaxes hara'ayár aleesleemuú koom bar kinga haniís, ar muu gu slafíngw i haniis, geera alók muu gan'amu gu sláy as hara'aya ngiwa óh. 22Gooi ngaa geehhooés alki/ituuwo gídaabá tlakweema naa baaliné' dír muu sleémeerowo. Adoorí kana geehhooeés as mukdá' Yesu Kristo gwa haratlintii', aalidá' taa alqadín ngiwa slay asma haratlintaaor'ín. 23Qoomár haratlintaao niwa hardatiká, atén a baraá tseegamór hara'ayár i diriiaán, ay dír haratlintaaoodá' hardah i geehhoouur. 24Gawaá adoorihe hara'aya diirene a adór geeraharusmo oo atén ti geeraharahaár amór Kristo i alé, as atén tiwa gan'ámkuú i harafaari ar loohír haratlintaao. 25Ala hamí haratlintaao naa hardát, nee atén ti malé geeraharahariiká nee geeraharusmoodá'. 26Asma kuungá' sleémeero a na/'aá Mungú asma Yesu Kristo ugwa haratlintié'. 27Asma kuungaásingá' sleémeero awa taa haragaás nee Kristo ar loohír baatiísmo, kuungá' Kristo ugwa tsité' adór inqwaarír wa ale. 28Ala daxta gár diimbé i káhh dír heé Yahudi nee heé Yunaniro. Laqaá tam dír heé lawaalmo nee heé lawaalmowooká. Nee slám gár dimbé i káhh sleeme dír hhawaata nee /ameeniro, asma kuungá' sleémeero a adór heé wák baraá Kristo Yesuwo. 29Ala kuungá' bar múk Kristo, kuungá' a xwaylár Abrahamu sleeme. Gawaá adoorihe aalidá' ar Mungú a toohúng asma al'axweesantadá'.

will be added

X\