GALATIA 1

1Ánuú Paulo barwaári ngina gooiím. Aníng a ya/abusmo. Aníng múk iga ya/aaw i kaahh, laqaá heé iga ya/abusmo tleehh i kaahh. Ala án heé iga ya/abusmo tleehh a Yesu Kristo inósuú kilá'. Slám nee Mungú Baabá, kudá' Yesu Kristo ngwa waaslee/atis baraá múk aa qaátl wa ale. 2Aníng nee hhae sleémeero kudá' diirí diriiá' barwaárí ngina gooiimaán dír múk Kríshaanáy sleémeero oo baraá yaamaá Galatia. 3Mungú Baabá nee Aakoorén Yesu Kristo kuungá' nu tsuuqi nee nu waydí haniisi. 4Aakoorén Yesu Kristo adoodá' Mungú Baabá aa slaá' gana tleéhh, tiri haniís as daanduú tlakweemaarén, as atén tiwa ba/amisi baraá yaamuuká' tlaakwe awa de'emuuká'. 5Inós i xirfuuti ay alhhe'eesay wasle. Amin. 6Aníng a ló'wa waa/oo/amiím as kuungá'. Asma kuungá' Mungú ugwa geexeeré' ar gaanslaay, kudá' kuungá' naa ateet as gurtleemuú Kristo, nee kuungá' ya/abtór hho' ar hatlá' kari i warqeeré'. 7Ala ya/abtór hho' ar hatlá' i káhh. Mukko oo kuungá' nu daawiitimiís i deer, oo Ya/abtór hho' ar Kristo ga warqeemiís. 8Ala bar atén laqaá tam malaykamoó gawaá dooraá daáhh barnaxes ya/abtór hho' ar hatlá' nga alki/iít, ar nee tidá' atén naa alki/iitaán ti slaslaawa'aaká, inós ku lu'usi nee Mungú. 9Adoorí ngina ooaán, nee ala hám ngin malé inkii/aán gídaabá, umuúqo heewo oo ya/abtór hho' ar hatlá' ngaa alki/iit, ar nee tidá' kuungá' taa ilaoté' ti slaslaawa'aaká, inós ku lu'usi nee Mungú. 10Kuungá' ka xua', aníng axweesanaywí un axweésa, as muu aníng iwa ya/an? Laqaá a gídaabáhe gár ni leelehhiit a Mungú aníng in ya/án? Kuungá' ka xua' aníng gár ni leelehhiit a sla'atisár múko? Án barnaxes tam hamí a kumiít muu nguwa sla'atimis, daqaní aníng a sagadiyusmoó Kristowooká. 11Hhaee'eé', aníng gár ni xu'utisár wa slaa' dirhúng i aleeró a tí, gídaabá, Ya/abtoodá' hho' naa dirhúng i alki/iít a gár hee aa iimu/uniká. 12Slám aníng ngaa ilaoohiiká dír heé wa ale, nee án heé iga intsaahhatis daanduú Ya/abtoorihe i kaahh. Ala a Yesu Kristo ngina aníng i geehhooutís. 13Kuungá' iidíguueé' u xuá', adór nira hoót qoomaadá' án tawa heé diinír Yahudi. Aníng múk Kríshaanáy una ló'wa gusiisiím, tam gurtleemu ugwa koomiiká. Ilakaaharu una tleéhh as ngiwa qwaareesár wa slaa'. 14Aníng niri kumiít baraá diinír Yahudiro ta múk yaariír ba/a baraá qartadár tlahhay'eene. Aníng ilakaaharu una tleéhh ló'wa ale asma unuudá' baabi'iirén. 15Ala Mungú aníng ina tsawaár iimír aníng tiwa laqwaaliiká, iri ateét as gurtleemuuwós, as aníng inós nguwa sagadiyuus. 16Qoomaadá' inós aa qaás iwa bó/, Garmaawós nguri geehhooutís dir'eén i alé, as aníng Ya/abtór hho' ar daanduuwós ngiwa alki/iit dír múk xoordaá hatlá', nee aníng heé naa yaahaás i kaahh qoomaadae. 17Laqaá tam aga tsa/amiiká amór Yerusalemu, amór ya/abuuseedá' gadiyeét gaa geerí iimu/uun. Ala ana tláw ay yaamaá Arabuni. Aluuwo niri malé kií/ ay Dameski. 18Kureeraá tám niwa waarahhiyé', niri tsa/ám Yerusalemu, as nee Kefa tiwa slawaan. Niri hoót dír do'ós wa ale deelo mibá nee kooán. 19Ala ya/abusmoó hatlá' oo naa ár i kaahh, aqo har Yakobo kilós, hhiyoó Aako. 20Ga/aawaak tí ni gooiim kuungá' i alé a ló' tam geerá Munguhe. 21Aluuwo ana tláw ay yaamaá Shamu nee Kilikia. 22Ala gitsee/aaeé' kaa ariiká nee múk Kríshaanáy oo baraá yaamaá Yudea. 23Ala inooín kaa tawó axaás gídaabá, “Heedá' aáng atén taa gusiisin, daxta i Ya/abtór hhó' alki/iit, ar haratlintaaoodá' aáng aa qwaareesár wa slaá'.” 24Inooín Mungú kuri xirfayeemiís as aníng.

will be added

X\