EFESO 3

1Gawaá adoorihe ánuú Paulo, án kuungá' nu aleefiriiriím, anuúwí taa tseék nee Kristo Yesu as daanduú kuungaásingá' múk xoordu. 2Án ngi slaá' kuungá' aga axasé' gídaabá Mungú aníng iga ló'wa tsuúq as gadiyeérí ngiwa aníng i haniís, ar kuungá' nuwa sagadiyuus. 3Mungú lu/aaráywós kudá' i tlehhemuú wa slai nguna geehhooutís, nguri xu'utís dir'eén i alé. Nee án lu/aaráydá' ngwa dirhúng i gooiím diirihe ar /ayma'aá niina. 4Kuungá' bura soomusé', a tsahhá' adór lu/aaráydá' oo Kristo án ngura xuú'. 5Qoomár aa waarahhi lu/aaráywí kwa laganiká dír múk i alé. Ala daxta kwa geehhooutís nee Qeeru dír ya/abuuseerós ar hhohho' nee dír aaruuse. 6Lu/aaráy a kwí, baraá Kristo Yesuwo múk xoordu kwaa aaluuse tleéhh dinkwa nee múk Yahudi. Inooín a diqoó slaqwtá wák. Al'axweesantá Mungú a tooín sleeme, ar loohír Ya/abtór hho'. 7Mungú aníng ina tsuúq, tiri sagadiyusmoó Ya/abtór hho' tleéhh, qoomár inós gadiyeét ngiwa tleéhh baraá slafingw'eé' wa ale ar aleesleemuuwós. 8Aníng ti niiná ta múk Mungú sleémeerowo. Ala tam adoorihe Mungú aníng ina tsuúq, gadiyeét ngiri aníng i haniís, ar Ya/abtór hho' ngiwa alki/iit dír múk xoorduwo. Ya/abtoorí a iidíguú daqaari'iimár Kristo tidá' faarooro ta aleeslayká. 9Nee án gár tiwa hariím a lu/aaráydá' Mungú i tleehhamór wa slai, loohír ir tleehharuuti aníng an gwa/atimís dír múk i alé. Iimír iimu/uungo Mungú, kudá' mura' sleémeero gwa tleehh, kaangwí guna luú/. 10Gár geeraawo ngusa luú/, a as sagaalooarós ar yaariir ngiwa xu'utisi qoomaarihe dír waawitá nee dír kudá' aleesleemuú koomá' baraá yaamaá qeeruuwo ar loohír mukdá' inós gwa haratlintii'. 11Mungú tí sleémeero gana qaás iimír iimu/uungo baraá muunuúwós i alé, as ngiwa boo/eesi ar baraá Kristo Yesu, Aakoorén. 12Gawaá adoorihe atén Kristo bura haratlintiaán, daqaní atén a da'ayumitanaaká Mungú i tseewuwto ar baraawós, nee tari axweesaán nee Mungú ar wayda. 13Ala án kuungá' nu firiím ma mune siaara' as adoorí án tiwa slahhe'eemisi as kuungá'. Asma slahha'amaayeerí a xirif dír kuungae. 14Gawaá adoorihe gaarí an gár Baabá án ngusa i tumbarara'aáta nguri firiiriím. 15Inós a Baabuú ló' oo na/'ii sleémeero awa gawaá doori nee awa baraá yaamuuwo. 16Án Mungú u firiiriím as /uuru nguwa kuungá' i haniisi ar Qeeruuwós, baraá munerhunge, ar har qoomoó daqaari'iimár xirfuuwós, 17as Kristo iwa baraá munerhúng wa hooti ar haratlintaao. Án Mungú u firiiriím gídaabá kuungá' masók dee/aruuhúng nee ihhafiirirhúng i baraá sla'aari, 18as sla'aarír Kristo kawa tsahha' dinkwa nee múk Mungú sleémeero, adór sla'aarirós kar úr, bihhe nee tleenaango, nee tleenángw gawa, nee tleenángw baraywo. 19Nee slám kawa tsahha' sla'aarirós tidá' xu'uti sleémeero ga baa/ as kawa yaariír. Gawaá adoorihe Mungú inósuú kilá' kuungá' nu ló'wa hatsiisi munguiimarose. 20Mungú inós i xirfuuti, kudá' muruú waa/oo/amór yaariir gu tlehhiít ar /uuruudá' baraarén wa gadiyuús, ta kudá' sleémeero oo atén ta firiiriimaana laqaá ta inslaslaawaan. 21Mungú i xirfuuti baraá mukose, as adoodá' atén tiwa haragaás nee Kristo Yesu. I xirfuuti umuúqo qarto ay alhhe'eesay wasle. Amin.

will be added

X\