EFESO 2

1Aáng kuungá' aga qatlé' baraá munerhunge asma ilaiwa/ame waslerhúng nee tlakweemaahúng. 2Qoomaadae kuungá' loohír tlaakw ana oté', tidár yaamuuká'. Kuungá' waawutmoó qeeruudá' oo neetlaame, kudá' gawtí dirií', una eehadé', qeeruudá' gadiyuús hamí baraá múk Mungú gwa sií' wa ale. 3Tam atén sleémeero aáng aqo an adoodá'. Ana hootaán ar ilatleerír slaqoorén kawa eeharaharaan, nee sla'aarirós kawa tleehhaan. Gawaá adoorihe atén qoomaadae gár tiwa hariím, a sakwasleemár Mungú an slawaán, adoodár múk hatlá' sleeme. 4Ala Mungú gurtleemuuwós ku úr, nee sla'aarirós ka ur diirene, 5asma inós atén tina slafís dinkwa nee Kristo, qoomár atén tawa múk aa qaatl baraá muneerene as tlakweemaarén. Gár tundusa ba/amís a gurtleemuú Mungú. 6Tina waaslee/atís dinkwa nee inós, nee tina iwiitiís gawaá doori dinkwa nee inós, ar baraá Yesu Kristo. 7Adoorí gana tleéhh as ngiwa laqan dír qari sleémeerowo ar hardah adór hhooeemaawós nee gurtleemuuwós kur úr diirene baraá Kristo Yesuwo. 8Gár tundusa ba/amís a gurtleemuú Mungú ar loohír haratlintaao. A gadiyérhungeeká, ala a gár Mungú naa tawó haniís. 9Gawaá adoorihe hee mitiwa tawó xirfeemiís asma a tlehhmuú gadiyeéroseeká. 10Asma atén a gadiyér Mungú. Inós atén tina tleéhh ar baraá Kristo Yesu, as atén tlehhma'aá hho' kiwa tleehhaan, kudá' Mungú aa qaroó amohhe'eés as atén kiwa eehaaraan. 11Gawaá adoorihe inslawiimé' kunngá' a múk adoomá aáng. Qoomaadae kuungá' a múk xoordu baraá tlahhaywo. Mukdá' taa hheehhe'eés ar al/utlór slaqwa nuna babáy kuungá' a múk taa hheehhe'eesiiká. 12Slám inslawaak qoomaadae kuungá' tunda paraátl dír Kristowo. Asma kuungá' a múk Israeliwooká. Nee baraá alqadoodár Munguhe kuungá' a kahhá', tam baraá al'axweesantadá' taa haragaasi nee alqadoodae. Kuungá' tawa hoté', a haraxu'utír koonda'aaká, slám Mungú u koonda'aaká baraá slafingwhúng oo baraaká' yaamuuwo. 13Ala hám daxta, baraá Kristo Yesuwo, kuungaádá' aáng saawá' bál geeraawo, tunda tseeweés as gwa'arár Kristo. 14Asma Kristo a wayduurén. Inós múk Yahudi nee múk xoordaá hatlá' giri wák tleéhh, nee wakaari gari hingeés, tidá' aa sihhit adór baqa tla/angw'ín i alé. 15Qoomár wakaari ngiwa hingeés, an qoomaadá' dabe ngiwa hingeés dinkwa nee hara'ayaro, ar slaqwtós. Gawaá adoorihe baraá mukwí tsaraawo heé /abén oo wák guri tleéhh ar baraawós. Wayda guri tleéhh ar adoorí. 16Inós ina gwaá' gawaá msalaába as wakaari ngiwa hingeesi. Gawaá adoorihe múk Yahudi nee múk xoordaá hatlá' giri wák tleéhh ar slaqwtá wák ar gawaá msalaába, giri ki/ís amór Mungú. 17Kristo niri hardáh, Ya/abtór hho' ar wayda ngiri alki/iít dír kuungaásingá' saawá' awa xoordaá hatlá', nee dír kudaádá' tseewá' awa múk Yahudi. 18Asma baraá Kristowo ateéká' tsaraawo loohi ana slawaán ar Baabá kuwa i tseewuwaan ar baraá Qeeruú wák. 19Ala daxta kuungá' a dahaayeerooká, slám a múk waarahhaaká, ala an yaamu loouuse dinkwa nee múk hhohhó', slám a múk doó Mungú. 20Kuungá' tunduna tleéhh gawaá ihhafiirídá' taa qaás nee ya/abuuse nee aaruuse, nee Kristo Yesu inósuú kilá' an tlaa/adá' ur ar do' ir gawduduy. 21Inós do' sleémeero gun kón, nee gun tlehhiit, as iwa doó Mungú oo hhoohhoó' tleehhiiti ar baraá Aako. 22Baraawose kuungá' tundu tlehhiit dinkwa nee inooín, tawa doó Mungú oo iwa hooti ar Qeeruuwós.

will be added

X\