KOLOSAI 4

1Kuungá' daqaáre, lawaalerhúng muruú ganaá' ti tlehhite', nee tidá' inooín kiwa hariím. Slám xuaak gídaabá kuungá' sleeme Aako u koondá' gawaá dooriiwo. 2Kumiité' ló' wa ale baraá firooro, nee ta dal'a' baraá firooro nee baraá sluufaaywo. 3Atén sleeme ti aleefiriiriinde' gídaabá Mungú pa/aangw ngu haniisi, oo ya/abtoorós ar lu/aaroó Kristo kawa alki/iitaan. Lu/aaráywí an kudá' aníng tisa tseék. 4Firiiriimé' as aníng iidíguú lu/aaráywí nguwa axwees ar geehhooeema adoodá' aníng tiwa hariím. 5Sagaalooa koomaak dír mukduú haratlintaaór koomaakahe, umuúqo pa/ángw taa sleeré' ar gadiyusaak. 6Axweesanayhúng umuúqo daqto masók a axweesanoó tsatsaa'arén, nee oo gídaabár koóm, as umuúqo heewo oo gár yaahamiís, gaarós tidá' i yaahamiisi ngiwa tsaahhi ar hariima. 7Tikiko iidíguueé' sleémeero ngu oo' dirhúng i alé. Inós a hhiyaarén oo sla'aarusmo, slám a alee/iisusmoó inkihhmuúb koóm. Inós i gadiyér Aakoó tleehh dinkwa nee atén. 8Aníng nguna ya/aáw amorhúng i alé as kuungá' iidíguurén sleémeero kuwa xua', nee inós nuwa gurkwa/asi. 9Onesimo nee inós ti koná', hhiyaarén oo inkihhmuú koóm, slám a sla'aarusmo. Nee inós a heehúng. Inooín iidíguú diirí atén tay diriiaan kunguqo alki/iit. 10Aristarko, kudá' taa tseék dinkwa nee aníng, kuungá' nu intsihhiimiis, nee Marko sleeme, hhiyoó Barnaba. Kuungá' iidíguú Marko ugwa qaroó sleeré' gídaabá birna hardáh ku ilaotá'. 11Yesu sleeme, kudá' ta babay Yusto, kuungá' nu intsihhiimiis. Inooínaká' in gadiyér tleehhiyá' dinkwa nee aníng as waawuti'iimár Mungú. Slám aníng in ló'wa gurkwa/amiisiyá'. Dír Kríshaanáydá' oo baraá múk Yahudiro heé gadiyuús dinkwa nee aníng i kaahh, aqo kuká' tám kilooín. 12Epafra kuungá' nu intsihhiimiis. Inós a heehúng. Slám a lawaalmoó Kristo Yesu. Umuúqo daqto inós kuungá' nun aleeslaaqw baraá firooro, as gídaabá kuungá' tawa sihhita' nee tawa kwa/a' baraá haratlintaaooro, nee umuúqo gár Mungú i slai kawa tsahha' nee kawa eehada'. 13Ánuú kilá' un lamabu'uúm gídaabá i ló'wa daawiimiit as kuungá' nee as kudá' baraá Laodikiár i diriiá' nee slám awa baraá Hierapoli. 14Luka, kuduú qwaslaarmo oo sla'aarusmo, kuungá' nu intsihhimiis, nee Dema sleeme. 15Hhaeedá' baraá Laodikiár i diriiá' intsihhiisaak. Nee Nimfa intsihhiisaak, nee múk Kríshaanáy kudá' baraá do'ós i burumbuuriimaamiít. 16Barwaárí barkaa soomuús dirhunge, ka soomuusi sleeme dír múk Kríshaanáy kudá' baraá Laodikiár i dirií'. Nee barwaádá' taa amor'ín i gooín kuungá' ka soomusá' sleeme. 17Arkipo ku beera', “Gadiyeérók tidá' tinda haniís baraá Aakoowo ga/aaweek, as kawa boo/es.” 18Intsihhiisantí ánuú Paulo ngina gooiím ar dakw'eé' oo kilá'. Ma gunqaruutara' gídaabá aníng taa tseék. Mungú kuungá' nu tsuuqi.

will be added

X\