KOLOSAI 3

1Kuungá' tunda al waaslee/atís dinkwa nee Kristo. Gawaá adoorihe muruuduú gawaá doori na leelehhiitaak, amoodá' Kristo i dirii'i, aa iwiít dákw doó /iyáy oo Mungú. 2Muruú gawaá doori na inslaslaawaak umuú siiwaro, ala a muruú baraaká' yaamuuwooká. 3Asma kuungá' aga qatlé' nee slafingwhúng kwaa luú/ dinkwa nee Kristo baraá Mungú. 4Kristo a slafingwhúng oo ló'. Inós bál binda male geehhooúy, kuungá' daqaní a geehhoouurá' dinkwa nee inós ar baraá xirif. 5Gawaá adoorihe kuungá' ilatleerír slaqwa gaasaak, dinkwa nee tlehhmi'iiwós sleémeero, adór tsaatu'uuma nee slasla/aareema, ilatleerír tlakw nee inslawoó tlákw, tam da/i. Asma heé da/ita koóm, a heé munguaá hatlá' haratlintatií'. 6Gawaá adoorihe sakwasleemár Mungú nin hardát dír mukdá' inós gu ilaiwawa/aaká as muruuwí. 7Tam kuungá' kilá' aáng ana hoté' nee múk adór kwí, qoomár slafingwhúng kuwa baliiti nee ilatleerír adór tí. 8Ala daxta kuungá' muruuwí sleémeero hingeesaak dirhunge, buhhta nee xarasleema, magoót nee daanda axweesani, nee /ooslisliingw. 9Kuungá' kiloohúng miti lamtí tlaaqara'. Asma kuungá' munerhúng tidá' ar aáng aga warqesé', dinkwa nee tlehhemi'iiwós kudá' tlakwe. 10Munér /aben kari sleeré'. Muneerí /aben baraahunge ka /abeemiimiis umuú daqto nee Mungú, tleehharusmoowós, ar slaqsoó Mungú. Gawaá adoorihe munerhúng in kumit Mungú nguwa tsaahha hhe'es. 11Ala baraá slafiingwí /abene, barqaanti i káhh dír heé Yahudiro nee heé Yunani, laqaá dír heé taa al/uútl nee heé taa al/uutliiká, laqaá hoomoo, laqaá /aarusmo, laqaá lawaalmo nee kuduú lawaalmoowooká. Ala Kristo inós a mura' sleémeero nee i baraá muu sleémeero. 12Kuungá' a múk Mungú aa tsawaár, mukós oo hhohó' oo i slai. Gawaá adoorihe muunuú gurtleemu koomaak, nee hhooeema, ti kiloohúng niinaweemise', nee tsatsaa'areema koomaak, nee qiqitliingw. 13Kuungá' kiloohúng ti sa qiqitliinde', nee ti gurtlatleere' hee bar kuqá' gwa sa dakuús. Gár kuungá' tunduwa hariím a tin kiloohúng gurtlatleerá' adoodá' Aako kuungá' nura gurtláy. 14Ala ak aleeró ti sla'aslae', asma sla'aari an gár mura' sleémeero gu haragaamiis ar baraá wakleeli'iimár ganaa'. 15Nee wayduú Kristo i baalin baraá munerhunge, asma kuungá' tunduna ateét as wayduuwí qoomár tunduwa diqoó slaqwtá wák tleéhh. Slám kuungá' masók a múk sluufoó koóm. 16Axweesantá Kristo masók i baraahúng wa hót ar yaareema. Ti intsaahhatimise' nee tiwa naanaqa' ar sagaalooa sleémeero. Mungú sa daa'aak ar sluufaay baraá munerhunge ar daa'ángw bara/, nee oo sluufaay, nee ar daa'ángw baraá qeeru. 17Nee umuúqo gaaro ar ta tlehha'a ar axweesani laqaá ar tlehhma, sleémeero ka tlehhá' ar umuú Aako Yesu, nee Mungú Baabá kuwa sluufimisa' ar inós. 18Kuungá' tlaáwaay, hhawaateehúng ilaiwawa/aak, adór kuungá' tunduwa hariím baraá Kristoowo. 19Kuungá' hhawaáte, tlaawayhúng sla'asla'aak, slám mu buhhtimisaara'. 20Kuungá' ná/'ii, xwaylitérhúng ilaiwawa/aak baraá mura' sleémeerowo. Asma adoorí Aako gu sla'atimis. 21Kuungá' xwaylité, na/'iihúng mi buhhtimisaara', as matawa mune sií' as axweesanayhúng. 22Kuungá' lawaále, daqaarerhúng tidá' ta sagadiyusa', ilaiwawa/aak baraá mura' sleémeerowo. Kuungá' masók a adór lawaaleedár ilaá maaqumiisaaká, tidá' ti tawó sla'atimis dír múk i alé. Ala masók an gadiyusá' ar muunuú /awaák, as adoodá' kuungá' Aako kuwa ilaiwawa/a'. 23Umuúqo gaaro ar ta tlehha', tleehhaak ar muunuú /awaák. Ala masók a adór lawaalér Aakoó sagadiyuus, ala ar mukooká. 24Kuungá' a xuá' gídaabá slaasláwarhúng ar aali a sleerá' dír Aakoowo. Asma Aakoó ta sagadiyusa' a heewooká, ala an Kristo. 25Ala umuúqo heewo oo tidá' ganaa' gaa tleehhiiká, inós slaasláwarós ar hariím gan sláy, slám ar barqaanti wasl.

will be added

X\