KOLOSAI 1

1Ánuú Paulo, ya/abusmoó Yesu Kristo ar sla'aarír Mungú, nee Timoteo hhiyaarén, barwaárí ngina gooiimaán 2amorhúng i alé, kuungá' múk hhohhó' oo Mungú baraá yaamaá Kolosai, kudá' hhaeerén awa inkihhimuúa koomá' baraá Kristowo. Mungú Baabá kuungá' nu tsuuqi nee nu waydí haniisi. 3Deelo sleémeero atén Mungú un sluufimiisaán, Baabuú Aakoorén Yesu Kristo, qoomár burnu aleefiriiriimaán. 4Asma aga axaasaán kuungá' adór Kristo Yesu kura haratlintié', nee adór múk hhohhó' oo Mungú sleémeero kura slaé'. 5Mungú un sluufimiisaán as haraxu'utidá' ta koonda', ar taa amohhe'eés gawaá doorí wa ale as kuungá'. Iidíguú haraxu'utirí una axasé' qoomár Ya/abtór hho' ar ló' niwa amorhúng i hardát. 6Ya/abtoorí hho' in tsiyaayaaxát baraá yaamu sleémeerowo nee in tsuuqaá yaariír huwaahúp. Tam dirhunge sleeme a adoorí, iimír bál iidíguú tsuuqaá Mungú kuwa axasé', nee adór i dirii'iya' kiri tsaahha hhe'esé'. 7Iidíguuwí kunguna dirhúng i intsaahhatimís nee Epafra, sla'aarusmoorén. Inós a lawaalmoó Kristo adór atén wa ale, slám an sagadiyusmoó Kristo oo inkihhimuú koóm as atén wa ale. 8Inós iidíguú sla'aarirhúng tidá' Qeeruú hhoohhoó' naa dirhúng i haniís, nguna diirén i alki/iít. 9Gawaá adoorihe iimír kaangwí kuwa axaasaán, atén kuungá' naa mawaaniiká aleefirooro. An firiiriimaán gídaabá Mungú nuwa sagaalooár i haniisi nee aleesleemuú amór Qeeruú hhoohhoó' daáhh, as sla'aarirós kawa tsaahha hhe'esa'. 10Daqaní a aleesleerá' tawa hota' ar adór hariím dír Aakoowo, Aako kuri qwal/atisá', nee adoodá' inós i slai kari tlehhitá'. An malé firiimaán gídaabá kuungá' umuúqo gár hhoo' kawa tlehhita', nee tawa kumita' Mungú kuwa tsatsahhaanda'. 11An firiiriimaán gídaabá Mungú baraá aleesleemuuwós kudá' xirfuú kooma, kuungá' nuwa /uuruú i haniisi, as tawa qitla' baraá mura' sleémeero oo ti'imiita. 12Daqaní kuungá' Baabá kuri sluufimisá' ar qwal/amaaye, kudá' naa aleesleemuú i haniis oo tawa al dinku'uumisa' nee múk hhohhó' oo Mungú baraá waawuti'iimár gwa/ateemaawo. 13Inós atén tina ba/amís baraá /uuruú giwtír wa ale, tiri dahaás baraá waawuti'iimár Garmaawós oo sla'aarusmo. 14Asma Garmaawós kunguna haniís as atén tiwa gweeri baraá /uuruú giwtír wa ale, tlakweemaarén giri gurtláy. 15Kristo an slaqsoó geehhoó' oo Mungúdá' geehhooeeká. Inós kuna geerí laqwaál nee Mungú, qoomár mura' sleémeero kuwa tleehhiiká, kudá' sleémeero oo taa tleéhh. 16Mungú mura' sleémeero oo gawaá doori nee oo baraaká' yaamu guna tleéhh ar inós, muruudá' geehhoó' nee muruudá' geehhooeeká, kudá' baraá yaamaá qeeruú i dirií', adór waawitá nee bariisee, baaluuse nee kudá' sleémeero awa aleesleemuú koomá'. Mura' sleémeero Mungú guna tleéhh ar Kristo, nee as tawa kós. 17Inós i daadeer dír iimu/úngw mura' sleémeerowo, nee baraawose mura' sleémeero in kumaamiit ar adoodá' ngura tleéhh. 18Múk Kríshaanáy a slaqwtós, nee inós a saga. Inós an iimu/úngw Kríshaanáy. Inós an kudá' aa geeraá wa waaslee/ baraá múk aa qaátl wa ale, as inós iwa iimu/úngw umuúqo gaa tleehhiti. 19Mungú gana slaá' iwa hooti nee Munguiimarós sleémeero baraá Garmá wa ale. 20Mungú mura' sleémeero guna haraki/isár wa slaá' amoorós i alé ar baraá Garmaawós ar alé. Wayda guri tleéhh ar gwa'arár Garmaawós ar gawaá msalaába. Gawaá adoorihe Mungú mura' sleémeero guna ki/ís amoorós i alé, kuduú baraá yaamu, nee oo dooriiwo. 21Aáng kuungá' tunduwa saáw dír Munguhe, baraá munerhúng nee inslawayhunge kuungá' a wakaaruuseerós, asma tlehhemi'iihúng ki tlakw. 22Ala hám daxta kuungá' sleeme naa haraki/ís amoorós i alé ar Garmaawós. Asma Garmaawós ina hoót iri gwaá' as kuungá' nuwa amohhe'eesi, tawa sihhita' dír geeraawós i alé, tawa múk hhohhó' oo xaslxaanslír koomaaká, tam oo hhasaám wásl. 23Ala kuungá' gár tunduwa hariím masók an kumitá' baraá haratlintaaooro, tawa sihhita' ar gawdeema gawaá ihhafiirír gawít i alé, nee tawa qutla'aaká baraá haraxu'utír taa sleeré' qoomár Ya/abtór hho' kawa axasé'. Ya/abtoorí hho' kaa alki/iít baraá yaamu sleémeero, nee aníng Paulo tina sagadiyusmoowós tleéhh. 24Hám daxta a qwalalaá/ asma tiwa slahhe'eemisi as kuungá'. Án baraá slaqwte'eene birti slahhe'eemiis, a slahhe'eemisuú Kristo un boo/eemiís, kudá' aa meet baraá slahhe'eemisuuwós as slaqwtós. Slaqwtós gídaabárós an múk Kríshaanáy. 25Mungú aníng ina sagadiyusmoó múk Kríshaanáy tleéhh. Gadiyér afhhamít ngina aníng i saayín as kuungá'. Gadiyeérí an Ya/abtór Mungú ngiwa gwa/atisa hhe'ees dirhúng i alé. 26Ya/abtoodá' a lu/aaroó Mungú oo taa luú/ dír qartadá' aa geerí waarahhi, baraá kureeraá yaariir naa waarahhi'i, ala hám daxta kingina geehhooutís dír mukós oo hhohhoe. 27Asma Mungú gana slaá' ngiwa gwa/atisi dir'ín i alé adór lu/aaráydá' ir daqaari'iimár kón nee xirif baraá múk xoorduuwo. Lu/aaráy an kwí gídaabá, Kristo i baraahúng i dirii'. Gawaá adoorihe kuungá' haraxu'uti a koondá' ar xirfuú Mungú kuwa sleera'. 28Inós an kwí ni alki/iitaan, muu sleémeero un gurbu'uumaán. Umuúqo heewo un intsaahhatimiisaán ar sagaalooa sleémeero tidá' Mungú ni amoorén i hanmiisi. Asma gár ta sla'aan a umuú heewo un amohhe'eemisaán iwa sihhiiti dír geerá Mungú i ale, iwa heé qoóm tleehhiti baraá Kristo. 29Aníng a gadiyuús nee a slaáqw as tí ngiwa boo/ees, ar baraá /uuruudá' úr oo Kristo ni aníng i hanmiisi, /uuruudá' ló'wa gadiyuús baraaeé' wa ale.

will be added

X\