LEHHEMA'AÁ YA/ABUUSE 8

1Nee Sauli gaasadá' gari sa qwalalaá/. Baldá' gusisíngw úr oo múk Kríshaanáy iri iimu/ún baraá Yerusalemuro, sleémeero tari diyaya/aát baraá yaamaá Yudearo nee Samariaro, ala aqo har ya/abuuse kilós. 2Múk Mungú ilaiwawaá/ Stefano guri foól, kuri sa tsuunqumiís ló'wa ale. 3Ala Sauli múk Kríshaanáy guri gusiisín. Iri daráh baraá umuúqo do'o, hhawaate nee /ameenaro giri duuruxún, giri dahamiís baraá doó tseegamo. 4Ala eeharuuseedá' aa diyaya/at iri tleér amorqá' nee amoorihe, Ya/abtór hho' kari alki/iít. 5Filipo iri aweér ay baraá gixsár Samaria, iidíguú Kristo guri alki/iít dír múk i alé. 6Filipo axweesantá Mungú ngiwa alki/iít nee layu ngiwa tlehhiít, boo/oó muu axweesanaydá' guri iiár i qamín ar muunuú wák, kudá' Filipo aa axweés. 7Asma múk yaariír i neetlaamér kón, neetlaameedá' iri /aa/amiín ar afór ur, iri ti'imít. Nee múk yaariír oo tiqtír sol'omit nee taqooraay kuri hungu/utimís sleeme. 8Qwal/uú yaariír iri hardáh baraá gixsadaádá' i alé. 9Heeko umuuwós ta babay Simoni i deer baraá gixsadae. Inós a qwaslaarmo. Múk yaariír baraá gixsár Samariaro waa/oo/amór yaariir gana ara'ár, asma inós i kaahi, “Aníng a heé úr.” 10Heewí kun iiár i qamín nee múk yaariír, heé niiná tam heé úr, ta kaahi, “Heewí an aleesleemuuduú Mungú, kudá' tawa kaahi aleesleemuudá' úr.” 11Heewí kun iiár i qamín asma de'emaá yaarire waa/oo/amo gan tlehhiit ar qwaslaari'iimarós. 12Ala daxta mukdaádá' axweesantá Filipo gari haratlintií', daanduú iidíguú Ya/abtór hho' ar Mungú nee Yesu Kristo, kiri baatimiís, hhawaate nee /ameenaro. 13Simoni inósuú kilá' sleeme iri haratlintií', kuri baatiís, tiri alkoomakoné' nee Filipo. Slám iri waa/oo/amín layu ngiwa ár, nee muruudá' xuawaslén oo aa tleehharuut. 14Ya/abuuseedá' Yerusalemúr i dirii' gari axás gídaabá múk Samaria axweesantá Mungú gaa ilaóh. Petro nee Yohana kiri ya/aáw amoodí alé. 15Inooín tawa hardáh amoodí alé, mukdá' haratlintii' kuri aleefirín as Qeeruú hhoohhoó' kuwa ilaoohi. 16Asma tam heé wák oo Qeeruú hhoohhoó' gwa ilaoh i kaahh, aqo kina tawó baatimiís ar umuú Aako Yesu. 17Petro nee Yohana daber'ín kari qaás gawaaín i alé, nee Qeeruú hhoohhoó' kuri ilaóh. 18Simónuduú qwaslaarmo adoodá' ngiwa ár, gídaabá muu Qeeruú hhoohhoó' ngu slasláy ar dabér ya/abuuse, peésa gari haniisár wa slaá', 19iri oó', “Aleesleemuuwí aníng i haniisare' sleeme, as daqaní umuúqo heewo oo aníng ni dakw'eé' i qaas, masók Qeeruú hhoohhoó' gu sláy.” 20Ala Petro iri oó', “Kuúng nee peésaroge, tsarere'eét, asma kuúng ka xu', /uuruú Mungú ku slasláy ar peésa. 21Dinku'uumár kuúng nee atén i káhh gawaá kaangwihe, asma muunuúwók ku hhoohhooeeká dír geerá Munguhe. 22Gawaá adoorihe tlakweemaawók kwisingá' hhu'u'umeek, Aako na firiimeek, as inslawaysíng oo muunuúwók nguwa gurtlay. 23Asma án kuúng u ga/áw, da/itá baraá guruuwók i qarqát adór saaxí. Slám kuúng tlakweema ugwa tseegiyé'.” 24Simónuduú qwaslaarmo iri oó', “Án aleefiriimaaré' dír Aakoowo as muruusíng sleémeero naa aníng i katé' án iwa pa/i.” 25Petro nee Yohana Ya/abtór Aako kawa hhe'eés lamabu'uungo nee alki/ituuwo, tari kií/ ay Yerusalemu. Loohiro Ya/abtór hho' kari alki/iít baraá gixsadaá ninakw awa yaariir baraá yaamaá Samariaro. 26Malaykamoó Aako iri axweés dír Filipo, iri oó', “Sihhiít tláw bihhaá basa, ay loohidá' naa Yerusalémúr wa tleer ay Gasa.” Loohidá' a loohír xanxaay. 27Filipo iri tláy, hamtidár kilae heeko guri ár, heé Kushír daáhh. Inós a sagesihhitusmoó wák dír Kandake, waawuto'ór yaamaá Kushi, nee daqaari'iimarós sleémeero gan ga/áy. Inós ina Yerusalémú káy, as Mungú nguwa sluufimisuú ay. 28Nee niwa kií/, aa iwiít gawaá gaárirós, i kitaábuú aarusmo Isayá soomuus. 29Qeeruú hhoohhoó' iri oó' dír Filipo, “Tseewúw dír bihhaá gaárirí, eeharahareek.” 30Filipo iri tláy ar ti'iingw, heedaádá' guri iiár i qaás, naxés i kitaabuú aarusmo Isayá soomuus. Iri oó', “Tisíng ta soomus a tsatsahhaánda?” 31Heedaádá' iri oó', “Aníng adór ngir tsaahh a idoomá, heé i geeraharahaár bir kaahh.” Filipo kuri firín iwa tsa/an gawaá gaáridá' dinkwa nee inós. 32Nee gooidá' i soomuusi a tí, “Inós kuna huúw didár mura' kuwa tsu/a/in adór bee/ír wa ale. Nee adoodár deelmoó bee/i ir xaslmaamiti dír geerá heedaádá' se'eengw tlaaqa, nee inós sleeme ina xasliít adoodár alé, afkós gwa waatleesiiká. 33Qoomár inós kuwa niinaweesa hhe'eés, sakwasleemarós kari hingeés. Heé tlahhaywós alki/ituwo gu aleesláw a heemá? Asma slafiingós kuna hingeés baraaká' yaamuuwo.” 34Heedaáduú Kushi Filipo guri báy, “Aníng i ooang, aarusmoowí axweesanaywí i kaahi a daanduú heemá? A daanduuwósuú kiláe, laqaá a daanduú heé hatlá'?” 35Filipo iri ilawaáts, Ya/abtór hho' ar Yesu gari dirós i alki/iít. Dír ngiwa iimu/un a dír axweesantadaádá' heedaádá' aa soomuús. 36Tari kumiít loohiro, tari hardáh dír ma'aay i dirii'iya'. Heedaádá' iri oó', “Qaytsiít, ma'aay ga/aaweek. Gár aníng i il/aam a milá, ar tis baatisiiká?” [ 37Filipo iri oó', “Kuúng bar aga haratlintí' ar muunaáwók sleémeero, tu baatiis.” Heé aáng iri oó', “Aníng aga haratlintií', gídaabá Yesu Kristo inós a Garmoó Mungú.”] 38Hara'aya gari haniís ar gaári iwa sihhit. Filipo nee heedaádá' tari al'aweér baraá ma'aay. Heedaádá' kuri baatiís. 39Qoomár tindiwa tsa/a/an baraá yaaér wa ale, Qeeruú Aako Filipo guri ar tláy. Filipo kwaa sangw malé ariiká nee heedaádá'. Heedaádá' iri kumiít aaiiwose, i qwalalaa/. 40Ala Filipo kuri malé ár baraá gixsár Asótór wa ale, qoomár iwa waarahhi Ya/abtór hho' gari alki/iít baraá gixsadu sleémeerowo, tam garwa hardáh ay Kaisaria.

will be added

X\