LEHHEMA'AÁ YA/ABUUSE 4

1Petro nee Yohana qoomár tawa axweesi nee muu, geeraharuusér saalíngw múk Yahudi, nee geeraharusmoó xuumuusér Doó Mungú, nee múk Sadukayo tari hardáh didaádá' i alé. 2Tari ló'wa buúhh, asma muu kuwa intsaahhatimís nee iidíguú waasle/uú Yesu kuwa alki/iít. 3Petro nee Yohana kiri ohín, kiri dahaás baraá doó tseegamo, ay matlatle, asma siiwadá' a tsiindo. 4Ala baraá mukdá' axweesantadá' gaa axaasi awa yaariir ngay haratlinti'iyé', nee hhawaate a har afi qoomár kumér kooán. 5Matlatleero looa niwa tleér, múk urén oo Yahudi nee bariisee nee intsaahhatuusér hara'ayár Musa tari burumburiít baraá Yerusalemu, 6dinkwa nee Anasi, geeraharusmoó úr oo múk Yahudi, nee Kayafa sleeme, nee Yohana nee Iskanda nee muu sleémeero kudá' doó geeraharusmoó úr oo saalíngw múk Yahudír hoót. 7Petro nee Yohana kiri tla/angw'ín i sihhitís, kiri yaahamiís, kiri báy, “Kuungá' muruuwí /uuruú kur tlehhita' a /uuruú heemá, nee ar umuú heemá?” 8Petro i haats Qeeruú hhoohhooe, iri oó', “Kuungaásingá' uren dír muko, nee kuungá' bariisér múk Israeli, 9laarí atén ti yaahamiis daanduú tleehhemuú hhoó', kudá' taa tleéhh dír heedaáda' taa hungu/uús, gídaabá /uuruú ira hunguú/ a /uuruú heemá. 10Ala kuungá' sleémeero nee kuungá' múk tlahhoó Israeli xuaak gídaabá, heewí ina hunguú/ ar /uuruú Yesu Kristo oo Nasareti, kudá' kuungá' taa kikié', nee Mungú guri waasle/atís baraá múk aa qaátl wa ale. 11Inós an tlaa/adá' taa sií' nee kuungaásingá' qwatsiruuse, ala laatí an tlaa/adá' ur ar do' ir gawduy. 12Asma ba/ama i káhh dír heé hatlae, slám umuú hatlá' i kaahh baraaká' yaamuuwo oo taa múk i haniís oo atén tar ba/aman.” 13Mukdaádá' urén oo doó kwasleema pihhu'uumár Petro nee Yohana kawa ár, nee kawa tsaáhh tawa múk aa soomuusiiká, tari waa/oó/. Kari tsaáhh gídaabá mukwí nee Yesu a dinkwa. 14Heedaádá' taa hungu/uutís kuwa ár, iwa sihhimiiti nee inooín, gár ta ooi iri qwát. 15Hara'aya kari haniís as tawa ti'iiti baraá do'duú doó kwasleemaro. Inooín kilooín tari kwasleemuút. 16Tari oó', “Adór mukwí ku laqaan a adoomá? Asma muu sleémeero oo baraaká' Yerusalemúr hoót, muruuwí xuawaslén gwa xuú', oo taa tleéhh nee inooín, nee atén tlankuwo u aleeslawanaaká. 17Ala /aymi'iiká' mindiwa xu'utitiyé' dír múk i alé, nee inooín in iigahhaataán as mindiwa malé axweesiyé' dír umuúqo heewo ar umuuwí.” 18Petro nee Yohana kiri ateét, kiri hara'ayín gídaabá matawa ilawaáts baloó alé, nee matawa intsaahhatimís ar umuú Yesu. 19Petro nee Yohana tari oó', “A hariimáro dír geerá Munguhe, kuungá' nuwa iiár i qaasaan ta Munguhe, kuungá' kiloohúng kwasleemuuté'. 20Asma atén muruudá' taa araán nee kudá' taa axaasaán, axweesanto mawto u aleeslawanaaká.” 21Iigahhaataro kiwa hhe'eés malé alé, kiri gweér, asma pa/aanngw kwa ariiká oo kiwa sakwasleemuuti as muu. Asma muu sleémeero Mungú guna xirfayeemiís as tidá' sleémeero aa tleehharut. 22Asma heedaádá' taa muruú xuawaslén i tleéhh, kudá' taa hungu/uús, kureeriiwós mibeeraá tsiyahhe naa waarahhiyé'. 23Petro nee Yohana qoomár gweeraro kiwa hhe'eés, tari tláy amór muk'ín, iidíguú muruudá' sleémeero oo geeraharuusér uren ar saalíngw múk Yahudi nee bariisee aa oó', kuri alki/iít. 24Adoorí kawa axaás, Mungú kuri firín ar muunuú wák, tari oó', “Aáko, kuúng a Mungú, kuúng an kudá' doori nee yaamu iga tlehh, nee umuúqo gaaro ar baraaká' yaamí diriia. 25Kuúng ana axwés ar Qeeruú hhoohhoó' ar afkwá baabuúrén, sagadiyusmoowók Daudi, gídaabá, ‘Ahaá, asma milá xoordu mis tsimahhuusiyá'? Nee slám muu mis muruú tlákw aldakuut? 26Nee waawituú baraaká' yaamu taa amohhe'eés, nee slám múk urén aa burumburiít as daanduú Aako nee kudá' taa qaás nee Mungú waawutmoó wa ale.’ 27Asma tí a ló', Herode nee Pontio Pilato, nee múk xoordu nee múk Israeli, tana burumburiít baraá gixsár i alé, as sagadiyusmoowók Kudá' hhoohhoó', Yesu, kudá' kuúng taa qás waawutmoó wa ale. 28Nee hám inooín taa al'axweés as kawa tleehhi tidá' kuúng taa slá' tleehhemko ar /uuruuwók, nee as tidá' kuúng taa istí tsát iimír qarór wa ale, iwa bo/. 29Ala Aáko, de'e tlaquuín ga/aaweek, nee sagadiyuuseerók aleesleemu ti hanis as axweesantók kawa axweesi ar pihhu'uuma sleémeero. 30Aleesleemuuwók ar gadiyuseek iwa hungu/utimisi, layu nee muruú xuawaslén i tleehharuuti ar /uuruú sagadiyusmoowók Kudá' hhoohhoó', Yesu.” 31Mungú firooro kuwa hhe'eés, didaádá' tay burumburiít iri daaraxát, sleémeero tari haáts Qeeruú hhoohhooe. Axweesantá Mungú kari alki/iít ar pihhu'uuma. 32Nee mukdá' aa haratlintii', muner'ín nee inslaway'ín tari wákleelí. Tam i kaahh heé aa oo' gídaabá, “Gaarí a te'eé', ar aníng kilooeé',” asma muruuín sleémeero a alqaati. 33Ya/abuuse iidíguú waasle/uú Yesu guri lamabu'uún ar /uuru, nee Mungú tsuuqaá yaariir giri dir'ín i haniís. 34Ala mukdá' aa haratlintii'i, heé aa gaa slaa' i kaahh. Asma mukdá' sleémeero oo yaamaá koóm, laqaá maraay, muruuín kudá' kuna weerimiís, hariimadá' tinda sláy baraá weerimisuwo kingiri huúw, 35kari qaás dír geerá ya/abuuse. Peésadá' kari qasmiís ar hariímadá' hee aa slaá'. 36Nee Yosefu kudá' ya/abuuse aa beér Barnaba (gídaabárós a heé gurkwa/asa ga xuú'), inós a heé tlahhoó Lawi, nee yaamaá i dahhi a yaamaá Kipro. 37Inós qaymo ga kón, gari weeriís, peesadá' ngari huúw, gari qaás dír dabaá ya/abuuse.

will be added

X\