LEHHEMA'AÁ YA/ABUUSE 28

1Tawa hardahaán saxareemór ale, kari tsaahhaán gídaabá yaamuudá' kaahaar umuuwós a Melita. 2Múk yaamuudá' tiri gurhhooár i tleéhh. Asla kana oohiís, atén sleémeero tiri dahi'ísk, asma tluuwaydá' aa tluuw, nee tsaaqwadá' ta laaleer. 3Paulo buhhaá migír giri buruumbuúr, giri qamín baraá asla. Dayshimo iri baraadá' wa ti'iít asma asla, dákw Paulo guri kiíhh, iri hambaleleiít gawaá dákw i alé. 4Múk yaamuudá' dayshimoodá' nguwa ár iwa hambaleele'miti, tari bayé', “Heewí ánga/áw a heé tsu/umaamiít, ala tim aa ba/ani baraá tlawto, Mungúduú Gan'amu inós gu mayká slafíngw i alé.” 5Ala Paulo dayshimoodá' guri kuukuú' baraá asla, ala inós adór aa laáq i káhh. 6Inooín geera ka xui gídaabá i xir'iit, laqaá i yaamí huu' nee iri gwaa' ar gaanslaay. Kuri ló'wa daamarán nee kuri ár, naxés gár gwa eer i káhh, inslawoó muner'ín iri warqáy, tari káh gídaabá, “Inós a mungú.” 7Didá' tseewe qamukaari i dayá' awa heé úr oo yaamuudá', umuuwós a Publio. Heewí tina dahi'ís ar muunuú mulqi'iima, tari dahaayeerós tleehhitaán deelo tame. 8Hamtidá' baabuú Publio i tiiq ga/atanto, nee i tseerdaá gusín. Paulo iri amoorós i dáh, iri firín, dabaawós giri qaás gawaawós i alé, guri hungu/uús. 9Tí sleémeero iwa tleehharút, múk hatlá' oo tiqtuuse oo baraá yaamuudá', niri didá' i hardaráh, kuri hungu/uumiís. 10Inooín atén tiri ilaiwawa/iyé'. Qoomár tleemuurén iwa xáy, tiri muruú yaariír i hanmiís oo taqo sla'aana. 11Alaá slahheeraá tám niwa waaraahhiyé', tari tlawaán ar miringamooko oo amór Iskanderiár daáhh. Qoomár tsaaqwaro miringamoowí ina dír yaamuudá' wa hoót. Miringamoodá' umuuwós ku babay “Munguaá danga.” 12Tari hardahaán dír gixsár ta babay Sirakusa, tay didá' wa hootaán deelo tám. 13Tawa didá' wa tlawaán, tay hardahaán dír gixsár ta babay Regio. Looaytleérós fur'ár baskwá daahh iri fukukueeliín, nee bál tsár tari hardahaán dír gixsár ta babay Puteoli. 14Hhae kay amoodá' i awaán. Atén tiri ló' wa firiné' tawa al iwiwiitaan nee inooín deelo faanqw. Nee aluudae tari hardahaán baraá yaamaá Rumi. 15Amoodae hhae iidíguurén ngwa axaasiyé', atén tiri al'ayé' amór dirka mura' kuwa weerimaamisi ar ta babay Apio, nee dirka ta babay “Maraá tám awa /ayma.” Paulo hhae ngiwa ár, Mungú guri sluufiís, iri qwalaá/. 16Tawa dahaán baraá yaamaá Rumi, Paulo ya/aám gari sláy ar iwa hooti dír doó inós tawa kilós, inós nee askaarmoodá' gu xuúm. 17Alaá deelór tám iwa waaráhh, Paulo geeraharuusér múk Yahudi guri ateét as tiwa doogiya'. Tawa burumburiít, giri báy, “Hhaee'eé', aníng gár naa tleéhh i káhh, ar hariimaaká dír mukrene, nee tam uuneemaá baabi'iirén iga sii'iiká. Ala tam adoorihe tina tseék Yerusalemú wa ale, tiri qaás baraá dabaá múk Rumi. 18Nee inooín aníng yaahamisuuwo tiwa hhe'eés, tina slaá' tiwa gweeri, asma gár naa tleéhh i káhh ar tis gaasi. 19Ala múk Yahudi adoodá' ngiwa sií', aníng adór hatlá' ar ni laaq iri qwát, aqo har kwasleemar'eé' ngiwa waarahhaas amór waawutmoó múk Rumi. Ala aníng /aymuú múk xooror'eé' nguwa sakwasleemuut i kaahh. 20Ala gawaá adoorihe án kuungá' nuna ateét, iwa artá eera' nee tawa al'axweesaan. Asma aníng taa tseék ar pínguuwí as haraxu'utír múk Israeli.” 21Inós kuri báy, “Atén barwár iidíguuwók koom aga slawaaniiká, ar amór yaamaá Yudeár daahh. Ala tam hhiyoó wák oo naa amoorí hardah i kaahh, oo iidíguuwók ngwa oo', laqaá oo /aymuú tlaákw ngwa oo' daanduuwoge. 22Ala hamí a sla'aán axaasaro amoorók wa ale adór kuúng ta ara'aan. Asma atén gár taa axaasaán a gídaabá, diínisíng kuúng ta eehát, ka kángw tlákw i kah umuúqo diiro.” 23Deelo kari al'axweés ar kuwa iiár i qaasár ay. Múk ló'wa yaariír guri i daqáy dír do'dá' inós i hooti. Iimír matlatle ay tsiindo Paulo iidíguú waawuti'iimár Mungú guri dir'ín i alki/iít ar axweesanoó aleesleemuú koóm, gari laqaqán ar gooír Musa nee aaruuse ar gídaabá Yesu a Kristo. 24Bahh'alé axweesantadá' ngiri haratlinti'iiyé', ala bahh'alé ngaa haratlinti'ii'iiká. 25Ala inooín awa kilá' ti slaslay'aaká, tari ti'iimiít, alaá Paulo /aymi'iiká' ngiwa káh gídaabá, “Qeeruú hhoohhoó' looeema gaa káh qoomár iwa axweés dír baabi'iihúng ar afkuú aarusmo Isaya. 26Asma gár aa oó' a tí, ‘Tláw amór mukwí, ku beer, kuungá' a mak axamisá', ala a tsahha'aaká. A mak xumisá', ala a aanda'aaká. 27Asma fuqurángw mukwí aa daktu'uút, nee iiaaín ki ilo' gaa axaasaro. Slám ilaaín kaa gumamaá', gaa makawa ár ilaaine, nee makawa axaás iiaaine, nee makawa tsaáhh fuqurangw'ine, nee muner'ín makawa warqeés án ngiri hungu/uús.’ 28“Ala kuungá' xuaak gídaabá Ya/abtór Mungú ar daanduú ba/ama kaa huúw amór xoordaá hatlá', nee inooín ka iiár i qaas.” [ 29Adoodá' ooaro ngiwa hhe'eés, múk Yahudi iri kií/ amor'ín, muruú yaarire tiri kilooín yaahamisiyé'.] 30Paulo do'dá' aa hoót, inósuú kilá' guna bu'ún, iri hoót didá' wa ale kureeri tsár. Muu sleémeero guri dahi'iimiís, kudá' amoorós i daqaaqay. 31Iidíguú waawuti'iimár Mungú guri alki/iít, nee iidíguú Aako Yesu Kristo guri intsaahhatimís ar pihhu'uuma, nee heé inós gwa ilaa/ i kaahh.

will be added

X\