LEHHEMA'AÁ YA/ABUUSE 22

1“Kuungá', hhawaáte, hhaee'eé' nee baabi'iieene, án iiár i qaasaré', tiwa aleekal/aam dír geeraahúng wa ale.” 2Kawa axaás i amor'ín axwees ar tsifrír Ebraniár ar ale, tari xasliita hhe'eés. Inós iri oó', 3“Aníng a heé Yahudi. Tina laqwaál Tarsór wa ale, gixsár yaamaá Kilikia. Ala ana uráw baraá gixsarír Yerusalemúr wa ale. Tina intsaahhatimís nee Gamalieli ar gan'amu daanduú hara'ayár baabi'iirene. Tari heé ilakaahaár bartá Munguhe adoorír kuungá' sleémeeró wa ale laarí. 4Múk loohír Aako eeharahaár nguri slahhaeemiís, nee sleeme nguri tsuú/, ina tsegiít, ngiri dahamiís baraá doó tseegamór i alé, hhawaate nee /ameenaro. 5Adoorí geeraharusmoó úr oo saalíngw múk Yahudi nee bariisér doó kwasleema sleémeero ngi xuiyá' sleeme. Slám inooín awa kilá' tiri barwaduú i hanmiís awa ni huuw amór hhaeerén awa múk Yahudi, kudá' Dameskír i diriiá'. Niri Dameskír káw, as múk loohír Aakoó eeharahaár nguwa ohiim, kudá' amoodá' i diriiá' nee nguwa tsegiit, nee nguri huúw ay Yerusalemu as kuwa sakwasleemuuti.” 6“Qoomár niwa aa'aá kaw, niwa nakaá/ Dameskír i alé, qoomár looár lahhoó' gwa/ateemaá ur awa gawaá dooraá dahhá' niri gwa/aatiyé' ar gaanslaay bihhe sleémeero. 7Aníng niri yaamí slapiít. Afoo ngiri axaás ar i babaw, ‘Saúli, Saúli, ahaá waáy, án mis gusiisiín?’ 8Aníng niri oó', ‘Kuúng a heemá, Aáko?’ Iri báy, ‘Aníng a Yesu oo Nasareti, kudá' kuúng ta gusiisiin.’ 9Mukdá' nee aníng ti al koomá', gwa/ateema kilooín kina ár, ala afór heedá' aa axwees amor'eén i alé kaa axaasiiká. 10Niri oó', ‘Adór ni laaq, Aáko?’ Aako iri báy, ‘Tláw, sihhiít, dáh baraá gixsár Dameski. Nee baraadae iidík sleémeero oo kuúng wa hariím kuungu oo'.’ 11Aníng xumso ngiri harslaaqaát as miraa/ór gwa/ateemaadá'. Mukdá' nee aníng ti al koomá' iri dawa óh, iri geerahaár ay Dameski. 12“Heeko wák ta babay Anania i deer. Inós a heé ilaiwa/amér koóm gawaá hara'ayaro, heé ta hhoár i xui nee múk Yahudi sleémeero oo amoodá' i dirií'. 13Iri i daqáy, iri sihiít dír bihhaaeé', iri oó', ‘Hhiyaaeé' Sauli, ilaawók i qaytsitiye'.’ Ilaaeé' niri qaytsitiyé' hamtidár kilae. 14Iri oó', ‘Mungú baabi'iirén kuúng ugwa tsawaár as sla'aarirós kawa tsahh, nee Kuduú Ganaá' kuwa aan, nee afór baraá afkós daahh kawa axas. 15Asma kuúng a lamabu'usmoowós tleehhít dír muu sleémeerowo daanduú muruuwí sleémeero oo taa aán, nee oo taa axamisi. 16Slám mas dóts? Sihhiít umuú Aako ateeteek, tu baatisi, tlakweemaawók ki hamaatli.’ ” 17“Aníng niwa kií/ Yerusalemu, looarka wake niwa fiririim baraá Doó Mungú wa ale, iigu'utu una ár. 18Aako una ár, inós aníng iri báy, ‘Goów ar gaanslaay, baraá Yerusalemu geexaweek, asma lamabu'uungók daanduueene ku ya/anaká nee múk baraaká'.’ 19Aníng niri oó', ‘Aáko, inooíná kilá' ngi xuiyá' adór aníng ngira tsegiít kudá' kuúng ugwa haratlintii'iye', nee adór ngira muúx baraá maraá saaliingo. 20Nee tseerér Stefano, lamabu'usmoowók, kawa ku'uús, aníng a didá' i dirií', nee ana qwalalaá/. Tlabaá mukdá' inós ngwa gaasiye' ina xuúm.’ 21Inós iri báy, ‘Tláw, aníng kuúng u ya/aáw amór saaw, amór múk xoordu.’ ” 22Paulo kuna iiár i qaás ay dír /aymuuwí. Ala /aymuuwí nguwa hhe'eés ooaro, muu iri tseeamín ar afór ur ló' wa ale, ta kaahi, “Heewí hingeesaak baraá yaamuuwo! I harinaká iwa hooti!” 23Qoomár tawa tseeamin, nee tawa tlabaá kwakwahhi, nee tawa teerír tleemisi, 24geeraharusmoodá' úr iri oó' dír askaári, “Paulo dahaasaak baraá boóma, iidíguuwós yaahamiisaak, ku hara muxá' ay dír gaarí kuwa i tseeamin ngay ooi.” 25Kuri tseék ar him'e as kuwa muxi. Paulo geeraharusmoó askaári kudá' aa sihhiit bihhaawós i alé guri báy, “Ahaá, ya/aama i koondá'a awa heé Rumi kur muxa', bur kwa sakwasleemuutiiká?” 26Geeraharusmoodá' adoorí ngiwa axaás, iri tláy, geeraharusmoodá' úr guri ádbeemuú áy kaangwihe, iri oó', “Adór ta tleehhamór wa sla' a adoomá? Baré heewí a heé Rumi.” 27Geeraharusmoodá' úr oo askaári niri hardáh, guri yaahaás, iri oó', “Kuúng a heé Rumíro?” Iri oó', “Ee.” 28Geeraharusmoodá' úr iri oó', “Aníng yaamulooarí ana sláw ar tlaxór ur.” Paulo iri oó', “Ala aníng a yaamuloousmoó Rumi ar laqwalama.” 29Mukdá' taa amohhe'eés as Paulo kuwa yaahaasi tari tláy, kuri geexáy. Nee geeraharusmoodá' úr oo askaári inós sleéme iri da'ayuút ngiwa tsaáhh gídaabá Paulo a heé Rumi, nee inós gwa tseék. 30Geeraharusmoodá' úr gari slaá' xu'utiro gadá' Paulo kusa sakwasleemuut nee múk Yahudi. Gawaá adoorihe looaytleérós Paulo guri gweér. Geeraharuusér uren ar saalíngw múk Yahudi nee bariisér doó kwasleema sleémeero gari ateét. Paulo guri leéhh, guri qaás dír geeraaín.

will be added

X\