LEHHEMA'AÁ YA/ABUUSE 20

1Tlaahhidá' ar muu iwa fák, Paulo eeharuuse gari ateét, gari gurkwa/amís, gari deelór i oó'. Iri tláy ay yaamaá Makedonia. 2Iri waaraáhh ar yaamuudá', nee umuúqo diiro eeharuuse gari/uuruú i qamín baraá haratlintaaooro ar axweesanoó yaariír. Iri hardáh ay yaamaá Yunani. 3Iri amoodá' wa hoót slahheeri tám. Paulo iri tleemuú slaá' iwa yaamaá Shamúr kay ar baraá tlawi. Ala múk Yahudi taa al'axweés adór kur gaasi. Gawaá adoorihe Paulo saga guri warqeés iwa ki/i ar baraá tla/ángw Makedonia. 4Inós tina koné' nee Sopatro, garmoó Piro. Inós a heé yaamaá Beroya, nee Aristarko nee Sekundo, inooín a múk gixsár Tesalonike, nee Gayo, heé gixsár Derbe, nee Timoteo nee múk tsár oo Asiár daáhh. Inooín a Tikiko nee Trofimo. 5Mukwí ina geerí hi'iít, tiri dané' yaamaá Troa kiwa áy. 6Atén ana Filipír wa tlawaán ar baraá tlawi, deeloodá' ur ar Mikaátér taa sluufitisiiká iwa waaráhh. Deelór kooán iwa waaráhh kiri Troár i awaán. Tari didá' wa hootaán deelo faanqw. 7Deelór Jumapiliro ana burumburiitaán as muruú /aymár Aako kuwa /ayaan. Paulo axweesantá Mungú gari alki/iít, iri kumiít axweesanto ay qoomár dakiingo. Asma looár tlaawa i tleemuú slaa'. 8Nee baraá do'dá' ta i burumburiitaán aslo kiló' wa yaariir. Slám do'dá' a doó goroofárh gawtá koóm. 9Nee masoomooko wák, umuuwós ta babay Eutiko, inós aa iwiít gawaá dirishár i alé. Paulo axweesanto iwa kumiít, masoomoodá' iri gufmiis, gu'ute guri ar bá/, iri goroófár tám wa huú' ay yaamu. Kuri tleés naxés aa qaroó gwaá'. 10Paulo iri aweér yaamí alé, tiri gawaawós i qaatiís, guri slaqwtós i óh, iri oó', “Ma da'ayumiitara', inós i slaaf.” 11Paulo iri gawtí kií/. Mikaáte gari parhhamiís. Iri /ayín. Iri malé kumiít axweesanto nee inooín ay matlatle. Matlatleero iri tláy. 12Masoomoodá' kurir waátl ay dó', i slaaf. Tari ló' wa gurkwa/ama hhe'eés. 13Atén tari geerí hi'iitaán ay dír miringamoi, tari tlawaán ar baraá tlawi ay Aso. Gár taa sla'aán a Paulo un tsa/aasaán Asór wa ale. Inós tina adoorí báy, asma inós ina amoodá' i tláy ar yaamaá kaahaar. 14Tiwa Asór i áy, una didá' wa tsa/aasaán, tari kumiitaán ay Mitilene. 15Tari didá' wa tlawaán ar baraá tlawi, nee bál tsár tari hardahaán dirka ta babay Kio naa atén ar qoon. Bál tám tari waarahhaán ar Samo, tari hardahaán ay Trogilio, tari diirí deelaán. Bál tsiyáhh tari hardahaán Mileto. 16Paulo gaa slaiiká iwa waaraahhi ar Efeso. Asma deelór yaariir mingiwa qwaareés yaamaá Asiá wa aleeró. Asma inós i gaanslín. Gár aa slaá' masók in hardah Yerusalemúr i aleeró dír deeloodár Pentekoste ira xeeriiká. 17Dír Miletoro Paulo muu guri ya/aáw ay Efeso as geeraharuusér Kríshaanáy kawa ateeti. 18Geeraharuuseedá' niwa hardát, Paulo iri oó', “Kuungá' kilá' a xuá' aníng adór nira hoót tla/angwhúng wa ale qoomaadá' sleémeero, iimír bál har geera án niwa baraaká' Asiár i hardáh. 19Aníng Aako una sagadiyuús ar tsatsa'areema sleémeero, tam qoomár niwa baraá /aa/eé dirii', laqaá tam baraá iiara'aduú naa sláw dír múk Yahudír wa aleeró, tiwa gaasár wa slai. 20Aníng kuungá' /aymuú nuwa /iít i kaahh. Ala umuúqo gaaro baraá axweesantá Munguhe ana alki/iít, nee ana intsaahhatimís ar geehhoeema laqaá tam baraá maraay, as alee/isayhúng. 21Án múk Yahudi nee múk Yunani una ló'wa gurbuú' gídaabá tlakweemaaín ki Mungú i hhu'u'un, nee Aakoorén Yesu Kristo ku haratlintii'i. 22Nee aníng hamí aga tláw ay Yerusalemu, taa tseék nee Qeeruú hhoohhoó'. Gár aníng ni amorqá' i aw aníng a xuaaká. 23Ala Qeeruú hhoohhoó' aníng i ádbabáy umuúqo gixsaro gídaabá tseegamo nee slahha'amaaye aníng i daamaaraán. 24Ala bar án kilooeene slafingw'eé' aníng u gaár i xuaaká. Slafingw'eé' bira qwaár, a gaarooká, ala gár gídaabár koom a masók slafingw'eé' kudá' nee Aako un alhhe'eés, nee gadiyér'eé' tidá' naa ilaóh dír Aako Yésú wa ale, ngiwa alhhe'ees. Nee gadiyeérí an alki/ituú Ya/abtór hho' daanduú gurtleemuú Mungú. 25“Aníng ana hi'iimiít baraá tla/angwhúng wa ale, iidíguú wawuti'iimár Mungú nguna alki/iít. Nee ala aníng hamí a xuú' gídaabá, baraá tla/angwhunge heé aníng i malé ar i kaahh. 26Gawaá adoorihe laarí án kuungá' nu baw ar geehhooeema, gidaabá hee dirhunge bira qwaár, a daanduueeneeká. 27Asma aníng adoodá' Mungú i slai, sleémeero dirhúng i alki/iituuwo ngaa mawiiká. 28Kuungá' kilá' munerhúng harmagahhaak, nee Kríshaanáydá' sleémeero, kudá' Qeeruú hhoohhoó' kuungá' nuwa qaás tawa xuumuuser'ín. As múk Aako kuwa de'eenda', kudá' inós aa tlaáxw ar tseereerós ar kilá'. 29Aníng a xuú' gídaabá, án bar aga tláw, tawerú xaraásl i dah baraá tla/angwhúng nee múk Kríshaanáy gu gurtlayká. 30Nee slám baraá tla/angwhunge muu i ti'iit. Mukwí looeema giri warqees as eeharuuse kawa amor'ín i uuruuxi nee tawa eeharin. 31Gawaá adoorihe, kuungá' dalaaé'. Ma gunqaruutara' gídaabá aníng kuungá' sleémeero nuna hara'ayiyiím ar hhirhheeri, xweera nee tlatla/aango, baraá kureeraá tame, slám naa baloó mawiiká. 32“Ala aníng hám daxta kuungá' nu qaás baraá dabaá Mungú i alé, nee dír axweesantadár gurtleemuú Mungú. Inós kuungá' kwa/asaro nu aleesláy, nee tsuuqaawós sleémeero ngiri haniis, kudá' i kon, as mukós sleémeero kudá' taa hhoohhoeés. 33Aníng peésár hee aga baloó slaiiká, laqaá miisli, laqaá tam inqwaruuwós. 34Kuungá' kilá' a xuá' gídaabá dabaaeé' kuká' nina gadiyuusiyé' as muruudá' án ni slaa' nguwa slaw, dinkwa nee mukdá' nee aníng al hootá'. 35Baraá muruú yaarire aníng ngaa laqaám gídaabá, gár atén tiwa hariím, a liitlakuuse an alee/iisaán, ar gadiyér adór tí kawa tleehhaan. Nee /ayma'aá Aako Yesu ki inslawaán, kudá' iwa káh gídaabá, ‘Qwala/ i deer baraá gaa haniisaro ta baraá gaa ilaooharo.’ ” 36Paulo axweesanaywós nguwa hhe'eés axweesanto, iri tumbarara'aát dinkwa nee mukdá' sleémeero, iri firín. 37Sleémeero tari /aa/amín ló' wa ale, Paulo kuri slaqooín i ohín kuri ma'amiís. 38Tari gurhaamuút ló'wa wa ale as /aymuudá' Paulo aa oó' gídaabá, “Án kuungá' i baloó aanda'aaká daxta.” Kuri haydohiís ay baraá miringamo.

will be added

X\