LEHHEMA'AÁ YA/ABUUSE 18

1Kaangwí iwa waaraáhh, Paulo iri Athénér wa tláy, iri hardáh ay Korinto. 2Amoodae heeko oo Yahudi guri ár, umuuwós ku babay Akila. Inós a heé taa yaamaá Pontór wa laqwaál. Inós nina hardáh yaamaá Italiár wa ale deeloorí tseewe, dinkwa nee hareerós Prisila. Asma Klaudio hara'aya gana haniís gidaabá múk Yahudi sleémeero i quutli baraá gixsár Rumiro. Paulo iri hardáh dír dooín. 3Iri didá' wa hoót, asma inooín sleeme gadiyér'ín a ád taqár Paulo, ar heéma hirit. 4Umuúqo deelór hungu/umaawo Paulo ina dáh baraá doó saaliingw, múk Yahudi nee múk Yunani guri intsaahhatimís as nguwa ar ba/i. 5Sila nee Timoteo tindiwa aweér Makedoniár wa ale, Paulo pa/aangw guri sláy oo axweesantá Mungú ngiwa alki/iiti umuúqo deelooro, múk Yahudi guri lamabu'ún gídaabá Yesu an Kristo. 6Múk Yahudi axweesanaydú Paulo guri sií', kuri /ooslislín. Paulo giri inqwaruuwós i kuukuú', iri oó', “Kuungá' bar aga qwadé', a daandeemoohúng. Gár án i huuw i káhh. Iimír hamí aníng aga tláw amór múk xoordaá hatlá'.” 7Paulo iri didá' wa tláy, iri dáh baraá doó heeko wák, umuuwós ta babay Tito Yusto. Heewí a heé Mungú ilaiwawaá/. Do'ós nee doó saaliingw ti hariyá'. 8Krispo, heé úr oo doó saaliingw, Aako guri haratlintií' dinkwa nee múk do'ós sleémeero. Nee múk yaariír oo yaamaá Korinto axweesantá Paulo kawa iiár i qamín, tari haratlintií' kiri baatimiís. 9Aako iri oó' dír Paulo xweeraawo ar baraá iigu'utu, “Ma da'ayumiitaar, axweesantaeé' alki/iiteek, slám ma xasliitaar. 10Asma aníng nee kuúng a dinkwa. Heé kuúng u i haratláw nee u gaa laáq i kaahh, asma aníng muk'eé' ku yaariír baraá gixsarihe.” 11Paulo iri baraadá' wa hoót kurkú wák nee slahheeraá lahhoó', Ya/abtór Mungú gari intsaahhatimís tla/angw'ín wa ale. 12Qoomár Galio tawa ga/awusmoó yaamaá Akaya, múk Yahudi sleémeero Paulo guri haratláy ar muunuú wák, guri huúw ay geerá doó kwasleema. 13Tari oó', “Heewí i múk afa/aslín as Mungú kuwa ilaiwawaa/i adoodá' nee hara'ayár Musa ti slaw'aaká.” 14Paulo qoomár iwa adoorír wa ilawatstá slai, Galio iri oó' dír múk Yahudi, “Kuungá' múk Yahudi, heewí geera barnaxes gár tlaakw gana tleéhh, geera alók án kuungá' nu iiár i qaás. 15Ala barnaxes tin tlaampa'aamisá' daanduú axweesanaay nee daanduú ume nee daanduú hara'ayarhúng, kuungá' kiloohúng alqaytsitaak. Asma aníng a sla'aaká niwa har'ohusmo tleehhiit daanduú muruuhúng kwisinge.” 16Giri guús dír geerá do'duú doó kwasleemaro. 17Múk Yahudi sleémeero Sostene kuri óh. Inós a heé úr oo doó saaliingw. Kuri muúx dír geerá doó kwasleemár wa ale. Ala Galio adoodá' tam ngaa ga/ayi gaa gaár i xuiiká. 18Paulo iri amoodá' wa hoót deelór yaarire. Aluuwo deelo gari oó' dír hhae, iri tláy ar baraá tlawi ay yaamaá Shamu. Prisila nee Akila tay alkoné' nee inós. Ala dír iwa quutliiká, se'eengós guri deéqw baraá yaamaá Kenkrea, asma al'axweesantá lo'o gaa huúw. 19Tari hardáh ay gixsár Efeso, giri amoodá' i geexáy, inós iri dáh baraá doó saaliingw, tiri tlaampa'misiyé' nee múk Yahudi. 20Inós kuri firín as iwa hooti deelór hhaawakahe, ala inós aa ya/aniká. 21Paulo deelo gari dir'ín i oó', “Mungú bar ngaa slaá', aníng niqo malé kií/.” Iri tláy Efesór wa ale ar baraá tla/ángw tlawi. 22Iri hardáh ay Kaisaria, iri tsa/án, múk Kríshaanáy guri laaw'eesár áy. Aluuwo iri aweér ay Antiokia. 23Iwa amoodá' wa hoót deelór niinawe, iri malé quútl, iri waaraáhh ar baraá tla/ángw yaamaá Galatia nee Frigia, eeharuuse gari /uuruú i qamín baraá haratlintaaooro umuúqo gixsaro. 24Heeko wák oo Yahudi, umuuwós ku babay Apolo, nina hardáh ay Efeso. Inós a heé ta Iskanderiár wa laqwaál. Slám a heé sagalooár koóm baraá axweesanto, nee Gooír axweesantá Mungú ga ló'wa xuu'. 25Heewí inós kwaa intsaahhatimís loohír Aakoowo, slám muunuúwós i hamiis. Iri iimu/ún axweesanto nee intsaahhatimisuuwo ar gan'amu ar daanduú iidíguú Yesu. Ala inós baatiísmoó aa xuú' a kuduú Yohana kilós. 26Axweesantá Mungú gari alki/iít ar pihhu'uuma baraá doó saalíngw wa ale, tam Prisila nee Akila nguwa iiár i qaminé', kurir waátl, iidíguú loohír Aako kuri alki/iita hhe'eés ar adoodá' ir hariin. 27Inós iri waarahhamá slaá' ar baraá tlawi ay yaamaá Akaya. Hhae nguri harakeesiyé', barwá ngiri gooiné' amór eeharuuse as kuwa dahi'isi. Inós iwa amoodá' i hardáh, mukdá' aa haratlintii', guri ló'wa alee/iimiís ar /uuruudá' Mungú aa inós i haniís. 28Asma inós múk Yahudi guna ló'wa ar ba/a hhe'eés geerá muu sleémeero wa ale, ngiwa laqaqan ar Gooír axweesantá Mungú ar gídaabá Yesu an Kristo.

will be added

X\