LEHHEMA'AÁ YA/ABUUSE 16

1Paulo iri hardáh dír gixsár Derbe nee Listra, nee didaádane ee harusmoó wák i deer, umuuwós ku bay Timoteo. Inós a garmoó /ameenír kar Yahudi ar Mungú gwa haratlinti'. Ala baabuúwós a heé tlahhoó Yunani. 2Heewí a heé ta lamabu'ún kángw hhoó' alé nee hhae sleémeero awa baraá Listrár hootá' nee Ikonio. 3Paulo guna slaá' tiwa alkona' nee inós. Gurir tláy guri al/uútl, as múk Yahudi oo amoodí dirií', asma sleémeero ka xuu' gídaabá baabuúwós a heé tlahhoó Yunani. 4Naagáy tawa waraahhi ar tla/eeraá gixsaduudá', hhae kiri hara'ayín adoodá' kira hara'ayín nee ya/abuuse nee bariisee, tidá' Yerusalemúr i dirii'. 5Gawaá adoorihe Krishaanoó umuúqo diro kuri kwa/aás baraá haratlintaaoodae, faaror'ín iri doogigiín umuúqo deelooro. 6Tari waaraáhh ar baraá yaamaá Frigia nee Galatia. Qeeruú hhoohhoó' gaa aleeya/aniká axweesantá Mungú kawa alki/iiti baraá yaamaá Asiaro. 7Qoomár yaamaá Misia kiwa i qón, daqeemuú Bitinia kuri iiár, ala Qeeruú Yesu aa ya/aniká. 8Tari waaraáhh ar yaamaá Misia, tari aweér ay Troa. 9Paulo xweeraawo iigu'utu guri ár. Heé yaamaá Makedonia guna ár, i sihhimiit, i Paúló babay, “Waaraahháng amór yaamaá Makedonia, atén ti alee/isár eer.” 10Paulo iigu'utudá' arto nguwa hhe'eés, hamtidár kilae tleemuú Makedonia kuri sla'aán, asma aga tsaahhaán ar ló' gídaabá Mungú atén taa ateét, as iidíguú Ya/abtór hho' kuwa dir'ín i alki/ituú awaan. 11Tari tlawaán ar miringamo Troár wa ale, tari waarahhaán ay Samotrake, ala aga sihhiitaniiká. Nee bál tsár tari hardahaán ay Neapoli. 12Nee niwa didá' wa tlawaán, tari hardahaán ay gixsár Makedonia ar ta bay Filipi, an gixsár ur baraá ayaadae, slám an dír boómár múk Rumi i diri'. Tari hootaán baraá gixsadá' wa ale deelór hhaawaakahe. 13Bál deelór hungu/umaawo ana tlawaán nay ti'iitaán tsee/áy alé afkuú doó gixsaro, tari tlawaán afaá yaae. Asma atén ka xuaan gídaabá dír tawa firarin i deer. Tari iwiitaán tari axweesaán nee /ameenarka aa didí burumburit. 14/Ameenirka ta bay Lidia didaádae i deer. Inós inqwaruú siira/atén gun weermaamís. Inós ar baraá yaamaá Tiatira. Inós i Mungú ilaiwa/aa/át. Atén tiri iiár i qás, nee Aako muunaáwós guri gweér, axweesantadá' Paulo aa axweés gari ót. 15Inós baatiismoowo kawa hhe'eés nee múk do'ose, tiri harhheehhe'és iri ó', “Kuungá' bar aga aandé' gídaabá aníng Aako ugwa haratlintií', qwalaasé', hooté' baraá dooeé' wa ale.” Tiri harakés. 16Looarka wake tawa didár saalíngw kawaan, nee lawaalo'orka tina doogaán ar neetlaamér koom ar aaru'uuma. Inós daqaareerós gan daqaari'iimár yaariír ar aaeér ar loohír aaru'uuma. 17Paulo guri eehát, nee atene, i aluurén wa tseeamiín i kat, “Mukwí a sagadiyuusér Mungúduú gawtí dirií'. Inooín iidíguú loohír ba/ama kun alki/iit.” 18Adoorí gari tlehhít deelór yaarire. Ala Paulo iri gurhaamuút, gari i warqáy, neetlangwdá' guri báy, “Aníng kuúng u báw ar umuú Yesu Kristo, ti'iít gawaá lawaalo'oorihe.” Neetlangwdá' iri ti'iít siiwadár kilae. 19Daqaareerós adór haraxu'utír daqaari'iimar'ín ira qwát ngiwa aán, Paulo nee Sila kiri uhín, kiri duuruxún ay dír tla/ángw gixsa, dír doó kwasleema. 20Kiri huúw ay dír geerá bariisér uren ar kwasleema, tari oó', “Mukwí i tlaahhír qamín ló'wa aleeró baraá gixsarén tihe. Slám inooín a múk Yahudi. 21Inooín unaá atén wa hariima'aaká ilaooharo tam eeharto ngin intsaahhatimisiyá', asma atén a múk Rumi.” 22Boo/oó muu sleémeero iri tláy, kiri hara daqáy, Paulo nee Sila kiri inqwar duxún nee bariisér kwasleema. Nee bariiseedár kwasleema hara'aya gari hanís, kiwa muxi ar hhara. 23Nee kiwa hhe'eés muxtár yaarire, kiri kwaáhh baraá doó tseegamo. Xuumusmooduú doó tseegamór ga/áw kuri báy, “Mukwí xuumeek ló'wa ale.” 24Inós tí kwaa báy ngiwa axaás, giri kwahha hhe'eés baraá qul/ír baraá do', giri ya'a' tsegiít ar qutúr gawaá peehhoó iló'. 25Ala Paulo nee Sila qoomár amsiwo Mungú kuri firín, nee nguri i daaiyé' ar daa'ángw sluufaay. Nee mukduú hatlá' taa tseegiít ta axamiis. 26Hamtidár kilae kunseelír ur niri hardát, tam koo/ír do'duú tseegamo iri dingít. Nee hamtidár kilae afér do' iri gweerít, nee qutúruudá' muu sleémeero kura tsegiít iri slakwekwe'eét. 27Xuumusmooduú doó tseegamo iri daarkiít, adór afér doó tseegamo ira gweerít ngiwa ár, paánga gari taataáhh, ti gaasár wa slaa'. Asma inós ngi xui mukdá' taa tsegiít aa /akumiít. 28Ala Paulo iri tseé' ar afór ur, iri oó', “Miti gaasaar, asma atén sleémeero a diirí diriiaán.” 29Xuumusmoodá' tsaa'asi gari firín kawa huwi. Iri dáh ay baraá do', i hara daaraax as dae. Iri tumbarara'aát dír Paulo nee Sila. 30Paulo nee Sila ngirirar ti'iít tsee/áy alé, iri oó', “Bariiser'eé', aníng adór ni laaq a adoomá ar nir ba/am?” 31Kuri báy, “Aakoó Yesu na haratlintieek. Daqaní kuúng a ba/aán nee múk do'oge.” 32Axweesantá Aako kari dirós i alki/iít, inós nee múk do'ós sleémeerowo. 33Xuumusmoodá' Paulo nee Sila giri ar tláy siiwadár kilár xweeraawo, inkahhi'ii'ín giri hamaátl. Inós nee múk do'ós sleémeero kiri baatiís siiwadár kilae. 34Xuumusmoodá' Paulo nee Sila ngiri ar waátl amór do'ós i alé, giri muruú /aymár i tleéhh. Iri qwalalaá/ kángw kilá' wa aleeró, inós nee múk do'ós sleémeerowo, asma Mungú kwaa haratlintií'. 35Qoomár looa niwa tleér, bariiseedár kwasleema mukdá' urén oo askaári kuri ya/aáw, tari oó', “Mukdá' geemawaak, i tlay amor'ín ar ta slai.” 36Xuumusmooduú doó tseegamo axweesantadá' gari oó' dír Paulo gídaabá, “Bariiseedár kwasleema muu ngwa ya/áp gídaabá kuungá' tundu gweeri. Ala daxta ti'iité' tsee/áy aleeró, tlawsé' ar wayda.” 37Paulo giri báy, “Atén tina muúx dír geerá múk wa aleeró, ala atén taa sakwasleemuutiiká. Nee atén a múk Rumi. Slám atén tina kwahhiyé' baraá doó tseegamo. Nee hám qaytsiít, ti qawtí duuxár wa slaiyá'. Adoorí i ya/aandaaká. Inooíná kilá' i hardahiye', atén ti duuxár aye'.” 38Askaáridá' iidíguuwí guri húp amór bariiseedár kwasleema. Nee bariseedár kwasleema adoorí ngiwa axás, adór inooín tar múk Rumi, tari ló'wa da'ayuút. 39Bariiseedár kwasleema niri hardát, Paulo nee Sila kiri harhheehhe'eemiís. Nee kiwa hhe'eés tsee/áy duuxaro, kiri harhheehhe'eés gídaabá tawa ti'iiti baraá gixsarihe. 40Paulo nee Sila tindiwa ti'iít baraá doó tseegamooro, tari dáh baraá doó Lidia. Tiri doogiyé' nee hhae. Hhae kiri gurkwa/amís. Paulo nee Sila tari quútl.

will be added

X\