LEHHEMA'AÁ YA/ABUUSE 14

1Paulo nee Barnaba tawa Ikoníór i hardáh, tari dáh sleeme baraá doó saaliingw oo múk Yahudi, adoodá' taa tleéhh baraá Antiokiaro. Axweesantá Mungú kawa alki/iít, múk yaariír iri haratlintií', múk Yahudi nee múk Yunani. 2Ala múk Yahudi kudá' haratlintaao ga sla'aaká, múk xoordu guri dukún as hhae kiwa aahhi. 3Ya/abuuse iri amoodá' wa hót deelór yaarire. Iidíguú Aako kuri axweés ar pihhu'uuma. Aako aleesleemu guri haniís dir'ín i aleeró oo laya nee muruú xuawaslén kuwa tlehhiiti ar dabaaín. Gawaá adoorihe Aako gari laqán axweesantadá' ya/abuuse aa kát daanduú gurtleemuuwose adór tar ló'. 4Múk baraá gixsadá' tiri partliít, bahh'alé ta bartá múk Yahudi, nee bahh'alé bartá ya/abuuse. 5Múk xoordu nee múk Yahudi nee geeraharuuser'ín tari al'axweés adór ya/abuuse kar slahhe'eemisi nee kar tlaquuti ar tlaa/e. 6Ya/abuuse iidíguuwí guri axás, tari goów ay Listra nee Derbe, gixsadaá yaamaá Likaonia, nee yaamuudá' afiidá' i tseewá'. 7Ya/abtór hho' kari alki/iít amoodae. 8Baraá Listraro heeko wák i deer oo diqoó ya'aawós wananaá'. Heewí a taqoormo iimír kuwa laqwaali, inós digir gwa tu/iiká baloó wa ale. 9Heewí Paulo guna iiár i qamín qoomár iwa axweesi. Paulo heedaádá' guri ilaá i duxún, guri tsaáhh gídaabá heewí a heé haratlintaaór koóm, ar kuwa hungu/uusi. 10Paulo iri tseé' ar afór ur, “Sihhiita hhe'eés ar ya'aawók.” Heedaádá' iri sihhiít ar gaanslaay, iri hi'iimiít. 11Boo/aydá' adoodá' Paulo aa tleéhh ngiwa ár, tari tseeamín ar afór ur, tari oó' ar tsifrír Likaonia, “Mungui taa hara aweeriyé' ar slaqsa'aá muu.” 12Barnaba kuri báy Seu, nee Paulo kuri báy Herme, asma inós an heé aa ak axwees. 13Ilahhousmoó Seu, kudá' do'ós geerá gixsár i dirií', awee ngiri huúw, nee slamángw /ayo, ay dír afkuú gixsa, as ilahhooa kawa haniisi dinkwa nee muu. 14Ala Barnaba nee Paulo iidíguuwí kuwa axaás, inqwaruuín kuri feehhamiís, tari ta'aín, tari dáh baraá tla/ángw boo/aydá', 15ta tsimahhuus, ta kaahi, “Kuungá' hhawaáte, mas adoorí tlehhitá'? Atén sleeme a múk adór kuungá'. Atén Ya/abtór hho' ngin alki/iitaán dirhúng i alé, as kuungá' tawa warqeera' nee muruuwí hhitiruút kuwa meera', nee Mungúdá' slaáf kuwa i warqeera', kudá' doori nee yaamu nee tlawi gaa tleehh, nee muruudá' baraadí dirií' sleémeero. 16Inós aáng baraá qari sleémeero tidá' aa waarahh múk xoordu sleémeero guna máy as lohuduuín kiwa eehari. 17Ala muu gwa tawó mayká, ala adór muu inós ngur tsaahhi i deer. Inós hhoeemaawós gaa laqán dirhúng i alé ar tluwaydá' ni hanmamisi gawaá doorí wa ale, nee bu'uungw nguwa hanmamisi ar qoomaarós. Slám gur'erhúng ga aaxamiis muruú /aymaro, nee munerhúng ga qwal/atimis.” 18Ala /aymi'iiká' tam ka axweesi, boo/aydá' kwaa lak ilaa/iiká as mikiwa ilahhooár i haniís. 19Mukko oo Yahudi niri hardáh, i Antiokiár daahh nee Ikonio. Mukwí boo/aay guri harakeemiís, tam Paulo kuri tlaquút ar tlaa/e, kuri duuruxún ar yaamu ay tsee/aá gixsa. Inooín geeraawo ka xui aa qaroó gwaá'. 20Ala eeharuuse Paulo nguwa harwét bihhe sleémeero, iri sihhiít, iri dáh baraá gixsa. Nee bál tsár iri tláy baraadá' wa ale dinkwa nee Barnaba ay Derbe. 21Paulo nee Barnaba Ya/abtór hho' kari alki/iít baraá gixsadá' wa ale. Eeharuusér yaariir kari sláy. Tindiri kií/ ay Listra, nee Ikonio nee Antiokia. 22Munér eeharuuse kari gurkwa/amís nee kiri hara'ayiyín tawa kumiiti baraá haratlintaaooro. Nee tari oó', “Atén an dahaán baraá waawuti'iimár Mungú ar slahha'amaayér yaariir.” 23Dír umuúqo Kríshaanáy iwa deero bariisee kari qamín. Tari firín nee tari gwaawín. Inooín kiri geexáy baraá dabaá Aako, kudá' taa haratlintií'. 24Tari waaraáhh ar tla/ángw Pisidia tari hardáh ay Pamfilia. 25Ya/abtór Mungú kari alki/iít Pergér wa ale, aluuwo tari aweér ay Atalia. 26Tawa didá' wa tláy tari waaraáhh baraá tlawtár alé ay Antiokia. Diirí an didár múk Kríshaanáy inooín ngiwa aleefirín gídaabá /uuruú Mungú ku slay as gadiyeérí kawa tleehhi, tí hám taa hhe'eés. 27Tawa hardáh Antiokia, múk Kríshaanáy kuri dinkwár i ateét, muruudá' sleémeero oo Mungú aa tleéhh ar inooín, kuri dir'ín i alki/iít. Kiri báy gídaabá Mungú pa/aangw gwaa haniís as múk xoordaá hatlá' sleeme iwa haratlintii'i. 28Tari didá' wa hoót nee eeharuuse deelór yaarire.

will be added

X\